“Hlalani Nilindile”

KUMAXESHA amandulo, abagcini-masango babesima kumasango esixeko nawetempile yaye, kwezinye iimeko, kwiminyango yamakhaya abantu. Ngaphandle kokuqinisekisa ukuba amasango avaliwe ebusuku, abagcini-masango ayekwangabalindi. Lo yayingumsebenzi obaluleke gqitha, kuba ukuze isixeko sibe sinqabisekile kwakuxhomekeke ekubeni balumkise abantu ngengozi ezayo.

UYesu Kristu wayeqhelene nomsebenzi wabagcini-masango, abakwabizwa ngokuba ngabagcini-mnyango. Ngesinye isihlandlo, wafanisa abafundi bakhe nabagcini-mnyango waza wabakhuthaza ukuba bahlale belindile ngokuphathelele isiphelo senkqubo yezinto yamaYuda. Wathi: “Hlalani nikhangele, hlalani niphaphile, kuba anazi ukuba ixesha elimisiweyo linini na. Kufana nomntu owahambela kwenye indawo washiya indlu yakhe waza . . . wayalela umgcini-mnyango ukuba ahlale elindile. Ngoko ke hlalani nilindile, kuba anazi ukuba inkosi yendlu iza kufika nini.”—Marko 13:33-35.

Ngokufanayo, ngoku ngaphezu kweminyaka eli-125, lo lindixesha, IMboniselo, uye wadlulisela ukhuthazo oluvela kuYesu ‘lokuhlala silindile.’ Njani? Njengoko kuchazwe kwiphepha 2 leli phephancwadi, “Isoloko isondela iziganeko zehlabathi njengokuba zizalisekisa isiprofeto seBhayibhile. Ithuthuzela bonke abantu ngeendaba ezilungileyo zokuba uBukumkani bukaThixo kungekudala buza kutshabalalisa abo bacinezela abanye abantu kwanokuba buza kuguqula umhlaba ube yiparadesi.” Njengoko kushicilelwa imibhalo engaphezu kwezi-26 000 000 ehlabathini lonke ngeelwimi ezili-150, IMboniselo lelona phephancwadi lisasazwa ngokubanzi ehlabathini. Ngalo, amaNgqina kaYehova, njengabagcini-masango bamandulo, abongoza abantu kuzo zonke iindawo ukuba ‘bahlale bephaphile’ ngokomoya kuba iNkosi, uYesu Kristu, sele eza kubuya aze agwebe le nkqubo yezinto.—Marko 13:26, 37.