Ngaba Inyaniso Ithwala Isiqhamo Kwabo Ubafundisayo?
XA UERIC oselula wathi akasafuni ukwaziwa njengeNgqina likaYehova, abazali bakhe baxheleka. Abazange bacinge ukuba oku kungaze kwenzeke. Ngoxa wayesemncinane, uEric wayebakho kwisifundo seBhayibhile sentsapho, esiya kwiintlanganiso zamaKristu, yaye esiba nenxaxheba kumsebenzi wokushumayela kunye nebandla. Ngokungathi kunjalo, wayebonakala ehamba enyanisweni. Kodwa akuba ebashiyile, abazali bakhe baqonda ukuba inyaniso yeBhayibhile ayizange ingene kuye. Xa bakuqondayo oko kwabothusa yaye kwabadanisa.
Bambi baziva belahlekelwe ngendlela efanayo xa isifundo seBhayibhile ngokungalindelekanga siyeka ukufunda. Xa kunjalo, abantu badla ngokuzibuza, ‘Kutheni ndingabonanga ukuba oku kuza kwenzeka?’ Kakade ke, ngaba kunokwenzeka ukuba ubone ngaphambi kokuba intlekele yokomoya ihle enoba inyaniso ithwala isiqhamo kwabo sibafundisayo? Eneneni, sinokuqiniseka njani ukuba inyaniso iyasebenza kuthi nakwabo sibafundisayo? Kumzekelo wakhe owaziwayo womhlwayeli, uYesu usinika uncedo ekuphenduleni le mibuzo.
Inyaniso Imele Ifikelele Intliziyo
UYesu wathi: “Imbewu lilizwi likaThixo. Leyo ke [ihlwayelwe] kumhlaba omhle, ngabo bathi, emva kokuliva ilizwi ngentliziyo entle nelungileyo, baligcine baze bathwale isiqhamo ngonyamezelo.” (Luka 8:11, 15) Ngoko ke ngaphambi kokuba inyaniso yoBukumkani ivelise nasiphi na isiqhamo kwabo sifunda nabo, ifanele imile ezintliziyweni zabo zokomfuziselo. UYesu usiqinisekisa ukuba njengembewu entle kumhlaba omhle, yakuba inyaniso kaThixo ifikelele intliziyo elungileyo, ngokukhawuleza iyasebenza ize ivelise isiqhamo. Yintoni esifanele siyijonge?
Simele siphawule indlela eyiyo intliziyo, kungekhona nje imbonakalo yangaphandle. Ukuba nenzondelelo nje kunqulo akusoloko kutyhila oko ngokwenene kusentliziyweni kabani. (Yeremiya 17:9, 10; Mateyu 15:7-9) Sifanele sondele nzulu. Kufanele kubekho utshintsho olupheleleyo kwiminqweno kabani, kwiinjongo zakhe nakwizinto azigqala njengezona zibalulekileyo. Ubani ufanele abonakalise ubuntu obutsha, obuvisisana nokuthanda kukaThixo. (Efese 4:20-24) Ngokomzekelo: Xa abaseTesalonika beva iindaba ezilungileyo, uPawulos uthi bengaphozisanga maseko bazamkela njengelizwi likaThixo. Kodwa yayilunyamezelo lwabo, ukuthembeka nothando abalubonakalisa kamva olwamenza waqiniseka ukuba inyaniso ‘iyasebenza kubo.’—1 Tesalonika 2:13, 14; 3:6.
Kakade ke, oko kusentliziyweni yomfundi kuya kubonakala kungekudala kwindlela aziphatha ngayo, njengoko umzekelo kaEric ubonisa. (Marko 7:21, 22; Yakobi 1:14, 15) Okubuhlungu kukuba, ngexesha laxa imikhwa emibi ethile ibonakala ngokupheleleyo kwizenzo zikabani, mhlawumbi kudla ngokuba sekonakele. Ngoko ke, ucelomngeni lukukuba, kuzanywe ukubonwa ubuthathaka obuthile ngaphambi kokuba bube ngumqobo ngokomoya. Sifanele sifumane indlela yokubona intliziyo yokomfuziselo. Sinokukwenza njani oko?
Funda KuYesu
Kakade ke, uYesu wayekwazi ukufunda iintliziyo ngokuchanileyo. (Mateyu 12:25) Akukho namnye kuthi onokwenza oko. Sekunjalo, wasibonisa ukuba nathi sinokuwubona umnqweno kabani, iinjongo zakhe nezona zinto zibalulekileyo kuye. Kanye njengokuba ugqirha esebenzisa iindlela ezahlukahlukeneyo zokuxilonga ukuze abone undonakele kwintliziyo yokoqobo yomntu ogulayo, uYesu wasebenzisa iLizwi likaThixo ‘ukuzitsala zinyuke’ aze azityhile “iingcamango notyekelo lwentliziyo,” kwanaxa zingekabonakali ebantwini.—IMizekeliso 20:5; Hebhere 4:12.
Ngokomzekelo, ngesinye isihlandlo uYesu wanceda uPetros ukuba aqonde ngesiphoso kamva esaba ngumqobo. UYesu wayesazi ukuba uPetros uyamthanda. Eneneni, uYesu wayesandul’ ukunika uPetros “izitshixo zobukumkani.” (Mateyu 16:13-19) Noko ke, kwakhona uYesu wayesazi ukuba, uSathana ujolise iintolo zakhe kubapostile. Kwiintsuku eziza kulandela, babeza kuba phantsi kwengcinezelo eqatha yokuba balalanise. Kuyabonakala ukuba uYesu wayeqonda ukuba ukholo lwabanye babapostile bakhe lwalungomelelanga. Ngoko ke akazange athingaze ekuchazeni ngokungqalileyo into ababefanele bayiphucule. Qwalasela indlela awayiqalisa ngayo le ngxoxo.
UMateyu 16:21 uthi: “Ukususela ngelo xesha kuse phambili uYesu Kristu wababonisa abafundi bakhe ukuba umele . . . afumane imbandezelo . . . [aze] abulawe.” Phawula ukuba, uYesu akazange nje abaxelele oko kwakuza kwenzeka kuye, kodwa wababonisa. Kusenokwenzeka ukuba wasebenzisa iindinyana zeBhayibhile, ezinjeNdumiso 22:14-18 okanye uIsaya 53:10-12, ezibonisa ukuba uMesiya wayeza kubandezeleka aze afe. Eneneni, ngokufunda okanye ukucaphula ngokuthe ngqo eZibhalweni, uYesu wanika uPetros nabanye ithuba lokuba bachaze oko kusezintliziyweni zabo. Babeza kuhlangabezana njani nentshutshiso ababeza kujamelana nayo?
Okumangalisayo kukuba, nangona uPetros wayebonakala ekhaliphile yaye enenzondelelo, ukuphendula kwakhe ngokungxama kwesi sihlandlo kwatyhila indlela ephosakeleyo acinga ngayo. Wathi: “Yiba nobubele kuwe, Nkosi; akuyi kuba nesi siphelo konke konke.” Ngokucacileyo uPetros wayecinga ngendlela ephosakeleyo, kuba njengoko uYesu wabonisa, wayecinga “kungekhona iingcamango zikaThixo, kodwa ezabantu”—isiphoso esinzulu esasinokukhokelela kwintlekele. Ngoko ke, uYesu wenza ntoni? Emva kokukhalimela uPetros, uYesu wathi kuye nakwabanye abafundi: “Ukuba nabani na ufuna ukundilandela, makazincame, athabathe isibonda sakhe sentuthumbo aze aqhubeke endilandela.” Ethetha ngeengongoma ezikwiNdumiso 49:8 nakweyama-62:12, ngobubele wabakhumbuza ukuba ithemba labo elingunaphakade lixhomekeke, kungekhona emntwini, ongenalusindiso, kodwa kuThixo.—Mateyu 16:22-28.
Nangona kamva uPetros okwexeshana wafikelwa luloyiko waza wamkhanyela uYesu izihlandlo ezithathu, le ngxubusho nezinye ngokuqinisekileyo zamnceda ukuze akhule ngokukhawuleza ngokomoya. (Yohane 21:15-19) Kwiintsuku nje ezingama-50 kamva, ngenkalipho uPetros wema phambi kwezihlwele eYerusalem enikela ubungqina ngovuko lukaYesu. Kwiiveki, iinyanga neminyaka eyalandelayo, wajamelana ngenkalipho nokubanjwa izihlandlo ngezihlandlo, ebethwa yaye efakwa entolongweni, emisela umzekelo obalaseleyo wokugcina ingqibelelo ngokungenaloyiko.—IZenzo 2:14-36; 4:18-21; 5:29-32, 40-42; 12:3-5.
Yintoni esiyifundayo koku? Ngaba uyakubona oko uYesu wakwenzayo ukutsala nokutyhila oko kwakusentliziyweni kaPetros? Okokuqala, wakhetha izibhalo ezifanelekileyo ukuthimba ingqalelo kaPetros kwinkalo ethile exhalabisayo. Okwesibini, wanika uPetros ithuba lokuthetha ngokuphuma entliziyweni. Okokugqibela, wanikela isiluleko esingakumbi sesiBhalo ukuze ancede uPetros alungise indlela acinga navakalelwa ngayo. Usenokuvakalelwa kukuba le ndlela yokufundisa akunakuyifikelela, kodwa makhe siqwalasele amava abonisa indlela ukulungiselela nokuthembela kuncedo lukaYehova okunokusinceda ngayo sonke ukuba silandele umzekelo kaYesu.
Ukutsala Oko Kusentliziyweni
Xa omnye ubawo ongumKristu weva ukuba oonyana bakhe ababini abakumabanga (grades) okuqala nawesibini bathabathe ilekese katitshala ebisetafileni, wahlala nabo waza wabaqiqisa. Kunokuba oku akuthabathe njengento engenabungozi, imfeketho yobuntwana, lo bawo uthi: “Ndazama ukubona ngokuphuma kwiintliziyo zabo oko kubabangele ukuba benze le nto imbi.”
Lo bawo wawakhumbuza la makhwenkwe ngoko kwenzeka kuAkan, njengoko kubhalwe kuYoshuwa isahluko 7. Ngokukhawuleza la makhwenkwe ayifumana ingongoma aza alivuma ityala lawo. Isazela sawo sasisele siwakhathaza. Ngoko ke uyise wathi makafunde kwabase-Efese 4:28, ethi: “Lowo ubayo makangabi seba, kunoko makasebenze nzima . . . ukuze abe nento yokwabela lowo usweleyo.” Lo bawo wathi aba bantwana mabahlawule ityala labo ngokuthenga ilekese baze bayinike utitshala nto leyo eyabethelela esi siluleko seZibhalo.
Lo bawo uthi: “Sasiye sizame ukususa oyena nobangela wokwenza okubi sakuba sikuphawulile oku, size sihlakulele iingcinga ezintle ngokuqiqa nabantwana.” Ngokuxelisa umzekelo kaYesu xa befundisa abantwana babo, aba bazali ngokuqinisekileyo ekuhambeni kwexesha bafumana imiphumo emihle. Ekugqibeleni bobabini aba nyana baba ngamalungu ekomkhulu kwiBheteli yaseBrooklyn, apho omnye asasebenza khona emva kweminyaka engama-25.
Phawula indlela omnye umKristu awakwazi ngayo ukunceda isifundo sakhe seBhayibhile. Esi sifundo sasisiya ezintlanganisweni nasentsimini yaye sasisele siwuchazile umnqweno waso wokubhaptizwa. Noko ke, sasibonakala sizithembile kunokuba sikholose ngoYehova. Eli Ngqina libalisa lisithi: “Njengebhinqa elingatshatanga, sasingafuni ncedo lwamntu yaye sasingakuqondi oku. Ndaba nexhala lokuba oku kwakuza kusenza sibe noxinezeleko okanye sife ngokomoya.”
Ngoko ke eli Ngqina laya kulo mfundi laza laqiqa naye ngencwadi kaMateyu 6:33, laza lamkhuthaza ukuba enze uhlengahlengiso ngezona zinto zibalulekileyo kuye, abeke uBukumkani kwindawo yokuqala aze abe nentembelo yokuba uYehova uya kuziphumelelisa zonke izinto. Ngokuphandle lambuza: “Ngaba maxa wambi kuba uhlala wedwa oko kwenza kube nzima ukuba uthembele kwabanye, kuquka noYehova?” Lo mfundi wavuma ukuba ebesele eyeka ukuthandaza. Ngoko ke lo mvakalisi wamkhuthaza ukuba alandele icebiso elifumaneka kwiNdumiso 55:22 aze alahlele umthwalo wakhe kuYehova kuba njengoko eyoku-1 kaPetros 5:7 isiqinisekisa isithi, “unikhathalele.” Loo mazwi amchukumisa. Eli Ngqina lithi: “Eso yayisesinye sezihlandlo ezimbalwa ndimbona elila.”
Gcina Inyaniso Isebenza Kuwe
Ukubona abo sibafundisayo besamkela inyaniso yeBhayibhile kusivuyisa gqitha. Noko ke, ukuze imigudu yethu yokunceda abanye iphumelele, nathi sifanele simisele umzekelo omhle. (Yude 22, 23) Sonke sifanele ‘sihlale silufezekisa usindiso lwethu ngoloyiko nangokungcangcazela.’ (Filipi 2:12) Oko kuquka ukukuvumela rhoqo ukukhanya kweZibhalo kukhanye ezintliziyweni zethu, sikhangele izimo zengqondo, iminqweno neemvakalelo ezinokufuna ukulungiswa.—2 Petros 1:19.
Ngokomzekelo, ngaba inzondelelo yakho kwimisebenzi yobuKristu ithothile mvanje? Ukuba kunjalo, kutheni? Esinye isizathu kusenokuba uyazithemba. Unokubona njani ukuba oko kunjalo? Funda uHagayi 1:2-11, uze ngokunyaniseka ucinge ngendlela uYehova aqiqa ngayo nala maYuda abuyiselweyo. Yandula ke uzibuze: ‘Ngaba ndizixhalabise ngokugqith’ emgceni ngokuba nemali nezinto eziphathekayo? Ngaba ngokwenene ndikholose ngoYehova ukuba uya kuyinyamekela intsapho yam ukuba izinto zokomoya ndizibeka kwindawo yokuqala? Okanye ndivakalelwa kukuba ndifanele ndizinyamekele kuqala?’ Ukuba kufuneka ulungise indlela ocinga novakalelwa ngayo, musa ukuthingaza ekwenzeni oko. Isiluleko seZibhalo, njengeso sifumaneka kuMateyu 6:25-33, kuLuka 12:13-21, nakweyoku-1 kuTimoti 6:6-12, sisinika isizathu sokuba sifanele sibe nembono elungeleleneyo ngezinto eziphathekayo nangezinto esinazo, nto leyo enokwenza ukuba uYehova aqhubeke esisikelela.—Malaki 3:10.
Ukuzihlolisisa ngokuphandle ngolu hlobo kunokuxhokonx’ ingcinga. Ukuvuma ubuthathaka obuthile xa sibuboniswa kunokuba buhlungu. Sekunjalo, xa ngobubele uthabath’ inyathelo ekuncedeni umntwana wakho, isifundo sakho seBhayibhile okanye kuquka nawe—enoba umbandela ungowobuqu okanye unobuzaza kangakanani—usenokuba uthabatha inyathelo lokuqala ekusindiseni ubomi babo okanye obakho.—Galati 6:1.
Noko ke, kuthekani ukuba imigudu yakho iwa phantsi? Musa ukunikezela ngokukhawuleza. Ukulungisa intliziyo engafezekanga kusenokufuna ubuchule, kunokuchitha ixesha yaye maxa wambi kunokudimaza. Kodwa kusenokuba nomvuzo.
UEric oselula, okhankanywe ekuqaleni, ekugqibeleni wabuyela ezingqondweni waza waphinda waqalisa ‘ukuhamba enyanisweni.’ (2 Yohane 4) Uthi: “Xa ndakuqondayo oko ndiphulukene nako ndabuyela kuYehova.” Ngenxa yokuncedwa ngabazali bakhe, uEric ngoku ukhonza uThixo ngokuthembeka. Nangona wayekhe wayichasa imigudu yabazali bakhe yokumenza ahlolisise intliziyo yakhe, ngoku ukuxabisa ngokunzulu oko bakwenzayo. Uthi: “Abazali bam balungile. Abazange bayeke ukundithanda.”
Ukwenza iLizwi likaThixo likhanye ezintliziyweni zabo sibafundisayo kubonisa ukuba nobubele bothando. (INdumiso 141:5) Qhubeka uhlolisisa intliziyo yabantwana bakho nabo ufunda nabo iBhayibhile ukuze ubone enoba babonakalisa ubuntu obutsha bobuKristu kusini na. Hlala usenza inyaniso isebenze kwabanye nakuwe ‘ngokuliphatha ngokufanelekileyo ilizwi lenyaniso.’—2 Timoti 2:15.
[Umfanekiso okwiphepha 29]
Amazwi kaYesu atyhila ubuthathaka bukaPetros
[Umfanekiso okwiphepha 31]
Sebenzisa iBhayibhile ukutsala oko kusentliziyweni