Ukwenza UYehova Abe NguThixo Wakho

NGAMAXESHA okubhalwa kweBhayibhile, kwakukho abantu ababekunandipha ukuba nolwalamano olusondeleyo noYehova kangangokuba wayebizwa ngokuba nguThixo wabo. Ngokomzekelo, kwiZibhalo uYehova uchazwa ngokuba “nguThixo ka-Abraham,” “uThixo kaDavide,” ‘noThixo kaEliya.’—Genesis 31:42; 2 Kumkani 2:14; 20:5.

Asondela njani kuThixo la madoda? Yintoni esinokuyifunda kuwo ukuze nathi sakhe ulwalamano oluqinileyo noMdali noluya kuhlala luhleli?

UAbraham ‘Wakholwa KuYehova’

UAbraham waba ngumntu wokuqala iBhayibhile ethi wakholwa kuYehova. Ukholo yayiluphawu olubalaseleyo awayenalo uAbraham olwabangela ukuba akholiswe nguye uThixo. Enyanisweni, uYehova wayekholiswa nguAbraham kangangokuba kamva xa uMdali wayethetha noMoses wathi ‘unguThixo ka-Abraham’ nowonyana wakhe uIsake, nomzukulwana wakhe uYakobi.—Genesis 15:6; Eksodus 3:6.

Kwenzeka njani ukuze uAbraham abe nokholo olunje kuThixo? Okokuqala, uAbraham walwakhela kwisiseko esiqinileyo ukholo lwakhe. Kusenokwenzeka ukuba wafundiswa iindlela zikaYehova ngunyana kaNowa uShem, owazibonela ngawakhe izenzo zikaThixo zokusindisa. UShem waba lingqina lokuzibonela ukuba uYehova “wagcina uNowa, umshumayeli wobulungisa ekhuselekile nabanye abasixhenxe xa wazisa unogumbe phezu kwehlabathi labantu abangenabuthixo.” (2 Petros 2:5) Kusenokwenzeka ukuba uAbraham weva ngoShem ukuba, xa uYehova ethembisa, ngokuqinisekileyo uyasizalisekisa eso sithembiso. Phofu ke, xa uAbraham wathenjiswa nguThixo, wavuya waza ubomi bakhe wabuphila eqinisekile ukuba eso sithembiso siya kuzaliseka.

Ekubeni ukholo luka-Abraham lwalunesiseko esiqinileyo, lomelezwa nayimisebenzi yakhe. Umpostile uPawulos wabhala: “Ngokholo uAbraham, xa wabizwayo, wathobela waphuma waya kwindawo awayemiselwe ukuyifumana njengelifa, waphuma, nangona wayengazi apho aya khona.” (Hebhere 11:8) Eso senzo sokuthobeka salomeleza ukholo luka-Abraham, kangangokuba umfundi uYakobi wathi: “Uyabona ukuba ukholo lwakhe lwaluhambisana nemisebenzi yakhe, lwaza lwenziwa lwagqibelela ukholo lwakhe ngayo imisebenzi yakhe.”—Yakobi 2:22.

Ukongezelela, uYehova wavumela ukholo luka-Abraham ukuba luvavanywe, elwenza lomelele ngakumbi. UPawulos uhlabela mgama enjenje: “Ngokholo uAbraham, xa wavavanywayo, kwafana nokuba wayemnikele uIsake.” Uvavanyo luyaluhlambulula luze lulomeleze ukholo, lulwenze lube ‘nexabiso elikhulu ngakumbi kunegolide.’—Hebhere 11:17; 1 Petros 1:7.

Nangona uAbraham wafa engekayiboni inzaliseko yako konke awayekuthenjiswe nguThixo, wayekuvuyela ukubona abanye ababelandela umzekelo wakhe. Umfazi wakhe uSara kunye namanye amalungu amathathu entsapho yakhe—uIsake, uYakobi noYosefu—nabo kuthethwa kakuhle ngabo eBhayibhileni ngenxa yokholo lwabo olubalaseleyo.—Hebhere 11:11, 20-22.

Ukholo Olufana Noluka-Abraham Namhlanje

Ukholo lubalulekile kuye nabani na ofuna ukwenza uYehova abe nguThixo wakhe. UPawulos wabhala: ‘Ngaphandle kokholo akunakwenzeka ukumkholisa kakuhle uThixo.’ (Hebhere 11:6) Namhlanje umkhonzi kaThixo unokulwakha njani ukholo olomelele njengoluka-Abraham?

NjengoAbraham, ukholo lwethu lumele lwakhelwe kwisiseko esiqinileyo. Oko sinokukwenza ngokufunda iBhayibhile kunye neempapasho ezisekelwe eBhayibhileni. Ukufunda iBhayibhile nokucamngca ngoko sikufundayo kunokusibangela siqiniseke ukuba izithembiso zikaThixo ziya kuzaliseka. Oku kuya kusibangela ukuba siphile ngokuvisisana nolo lindelo luqinisekisiweyo. Ukholo lwethu lomelezwa ngakumbi kukuthobela, okuquka ukuba nenxaxheba ekushumayeleni esidlangalaleni nokubakho kwiintlanganiso zamaKristu.—Mateyu 24:14; 28:19, 20; Hebhere 10:24, 25.

Ngokuqinisekileyo ukholo lwethu luza kuvavanywa, mhlawumbi ngokuchaswa, ngokugula okungaginyisi mathe, ngokufelwa ngumntu esimthandayo okanye ngenye indlela. Xa sihlala sithembekile kuYehova nakubeni sivavanywa, ukholo lwethu luyomelela, luba nexabiso elikhulu kunegolide. Enoba siyaphila ukuze sibone ukuzaliseka kwazo zonke izithembiso zikaThixo okanye siyafa, ukholo lwethu luya kusisondeza kuYehova. Ngaphezu koko, umzekelo wethu uya kukhuthaza nabanye ukuba baxelise ukholo lwethu. (Hebhere 13:7) Kwakunjalo ngoRalph, owayondele ukholo lwabazali bakhe waza waluxelisa. Uthi:

“Ngoxa ndandisahlala ekhaya, abazali babesikhuthaza sonke njengentsapho ukuba sivuke kwangoko ukuze sifunde iBhayibhile kunye. Ngaloo ndlela sasiyifunda yonke iBhayibhile.” Nanamhlanje uRalph usafunda iBhayibhile ntsasa nganye, yaye oku kumbangela ukuba aluqale kakuhle usuku. URalph wayedla ngokuya entsimini noyise veki nganye. “Ndafunda ngoko ukwenza amabuyelo nokuqhuba izifundo zeBhayibhile.” Ngoku uRalph ungumsebenzi wokuzithandela kwenye iofisi yesebe lamaNgqina kaYehova eYurophu. Onjani wona umvuzo obangelwe lukholo lwabazali bakhe!

Indoda Evunyiweyo Yintliziyo KaYehova

UDavide, owazalwa kwiminyaka engama-900 emva koAbraham, ungomnye wabakhonzi ababalaseleyo bakaYehova ekuthethwa ngabo kwiZibhalo. Ngokuphathelele uDavide owakhethwa nguYehova ukuba abe ngukumkani wexa elizayo, umprofeti uSamuweli wathi: “UYehova uya kuzifumanela indoda evunyiweyo yintliziyo yakhe.” UYehova noDavide babenolwalamano olusondeleyo olwabangela ukuba kamva uIsaya axelele uKumkani uHezekiya ‘ngoYehova uThixo kaDavide ukhokho wakhe.’—1 Samuweli 13:14; 2 Kumkani 20:5; Isaya 38:5.

Nangona uDavide wayevunyiwe yintliziyo kaYehova, ngamany’ amaxesha wayevumela iminqweno yakhe imongamele. Wenza iimpazamo ezinkulu izihlandlo ezithathu: Wavumela ukuba ityeya yomnqophiso isiwe eYerusalem ngendlela engafanelekanga; wakrexeza noBhatshebha waza wenzela umyeni wakhe u-Uriya iyelenqe lokuba abulawe; waza wabala abantu bakwaSirayeli nabakwaYuda ngaphandle komyalelo kaYehova. Kwisihlandlo ngasinye kwezi, uDavide wawugqitha uMthetho kaThixo.—2 Samuweli 6:2-10; 11:2-27; 24:1-9.

Noko ke, xa wayebuzwa ngezi zinto, uDavide wazivuma izono zakhe, akabek’ ityala kwabanye abantu. Wavuma ukuba iTyeya ayizange ihanjiswe ngendlela efanelekileyo, waza wongezelela ngelithi ‘asimfunanga uYehova ngokwesiko.’ Xa umprofeti uNatan wabhenca ukukrexeza kukaDavide, uDavide waphendula wathi: “Ndonile kuYehova.” Yaye emva kokuba uDavide eqondile ukuba wenze ubudenge ngokubala abantu, wavuma wenjenje: “Ndonile kakhulu ngoko ndikwenzileyo.” UDavide waguquka kwizono zakhe waza wahlala esondele kuYehova.—1 Kronike 15:13; 2 Samuweli 12:13; 24:10.

Xa Sinxaxha

Kumgudu esiwenzayo wokwenza uYehova abe nguThixo wethu, umzekelo kaDavide uyasikhuthaza. Ukuba indoda eyayivunywe kangaka yintliziyo kaYehova yayikwazi ukwenza izono ezinzulu ngolo hlobo, masingaphelelwa lithemba xa sinxaxha okanye sisenza iimpazamo ezinzulu ngamathub’ athile phezu kwayo nje imigudu esiyenzayo. (INtshumayeli 7:20) Sinokukhuthazwa kukuba xa uDavide waguqukayo, izono zakhe zaxolelwa. Oku kwenzeka ku-Uwea kwiminyaka eyadlulayo.

U-Uwe wayengumdala kwibandla lamaNgqina kaYehova. Ngesinye isihlandlo wayekelela kwiminqweno emibi waza waziphatha kakubi ngokwesini. Ekuqaleni, u-Uwe, njengoKumkani uDavide, wazama ukusifihla isenzo sakhe, enethemba lokuba uYehova uya kusibetha ngoyaba isono sakhe. Ekugqibeleni, isazela sikaUwe asizange simnike kuphumla wada waya kuzixela komnye umdala kwaza kwathatyathwa amanyathelo okumnceda ukuze achache kwintlekele yokomoya awayekuyo.

U-Uwe waguquka waza wahlala esondele kuYehova nasebandleni. Waluxabisa kakhulu uncedo awalunikwayo kangangokuba kwiiveki ezithile kamva wabhalela abadala ebabulela ngokwenene ngoncedo abamnike lona. Wathi: “Ngoncedo lwenu ndiye ndalihlambulula igama likaYehova kugculelo.” U-Uwe waphinda wanobuhlobo noYehova yaye ekuhambeni kwexesha waphinda wamiselwa njengesicaka kwakwelo bandla.

“Umntu Oneemvakalelo Ezinjengezethu”

UEliya, owayephila kwinkulungwane emva kwexesha likaDavide, wayengomnye wabaprofeti ababalaseleyo kwaSirayeli. UEliya wayelumele ngokwenene unqulo lokwenyaniso ngexesha laxa kwakuxhaphake ukonakala nokuziphatha okubi ngokwesini, yaye akazange agungqe kuzinikelo lwakhe kuYehova. Alimangalisi elokuba ngasihlandlo sithile uElisha, owangena ezihlangwini zakhe wambiza uYehova ngokuthi, “uThixo kaEliya”!—2 Kumkani 2:14.

Sekunjalo, uEliya wayefana nabanye abantu. UYakobi wabhala: “UEliya wayeneemvakalelo ezinjengezethu.” (Yakobi 5:17) Ngokomzekelo, emva kokuba eboyisile abanquli bakaBhahali kwaSirayeli, uKumkanikazi uIzebhele wamsongela ngokumbulala. Wasabela njani? Woyika waza wasabela entlango. Ehleli phantsi komthi womtshayelo, uEliya wenza isimbonono esithi: “Kwanele! Owu Yehova, wuthabathe umphefumlo wam, kuba andilunganga ngaphezu kookhokho bam.” UEliya wayengasafuni ukuba ngumprofeti, kunoko wayekhetha ukufa.—1 Kumkani 19:4.

Noko ke, uYehova wabonisa ukuba uyayiqonda indlela awayevakalelwa ngayo uEliya. UThixo wamomeleza uEliya, emqinisekisa ukuba wayengeyedwa, ekubeni babekho nabanye ababenyanisekile kunqulo lokwenyaniso. Ngaphezu koko, uYehova akazange ayeke ukumthemba uEliya yaye wayembekele umsebenzi awayeza kuwenza.—1 Kumkani 19:5-18.

Ukuxheleka kukaEliya emoyeni kwakungabonisi ukuba akasakholiswa nguye uThixo. Kwiminyaka eli-1 000 kamva, xa uKristu Yesu wenziwa kumila kumbi phambi koPetros, uYakobi noYohane, ngubani owakhethwa nguYehova ukuba abonakale emi noYesu? NguMoses noEliya. (Mateyu 17:1-9) Licacile elokuba uYehova wamamkela uEliya njengomprofeti ongumzekelo. Nangona uEliya “wayengumntu oneemvakalelo ezinjengezethu,” uThixo wayekuxabisa ukuzibhokoxa kwakhe ekubuyiseleni unqulo lokwenyaniso nasekungcwaliseni igama Lakhe.

Ukulwa Kwethu Neemvakalelo

Namhlanje abakhonzi bakaYehova basenokuziva bedandathekile okanye besoyika. Hayi indlela ekuthuthuzela ngayo ukwazi ukuba noEliya wayeneemvakalelo ezifana nezabo! Yaye kusisiqinisekiso ukwazi ukuba kanye njengokuba uYehova wayeziqonda iimvakalelo zikaEliya, uyawuqonda umlo esinawo neemvakalelo zethu.—INdumiso 103:14.

Siyamthanda uThixo kunye nabo sikhonza nabo yaye sinqwenela ukwenza umsebenzi kaYehova wokushumayela iindaba ezilungileyo zoBukumkani. Ukanti, kwelinye icala, sinokudimazeka ngenxa yokuba abantu bengasabeli kumsebenzi wethu okanye side sixhalatyiswe zizisongelo ezenziwa ziintshaba zonqulo lwenyaniso. Sekunjalo, kanye njengokuba uYehova waxhobisa uEliya ukuba aqhubeke, nanamhlanje usabaxhobisa abakhonzi bakhe. Ngokomzekelo, khawuqwalasele le meko kaHerbert noGertrud.

Ngowe-1952 uHerbert noGertrud babhaptizwa njengamaNgqina kaYehova eLeipzig, kwilizwe elalisakuba yiGerman Democratic Republic. Ngelo xesha kwakunzima kakhulu kubakhonzi bakaThixo, kuba umsebenzi wabo wokushumayela wawuvaliwe. Wayevakalelwa njani uHerbert ngokushumayela kwindlu ngendlu?

“Ngamathub’ athile sasiba nexhala kakhulu. Xa sisiya kwindlu ngendlu, sasingazi enoba kungasuke kuthi gqi abasemagunyeni baze basibambe.” Yintoni eyanceda uHerbert nabanye ukuze bayeke ukoyika? “Sasiyifundisisa ngokwenene iBhayibhile. Ibe uYehova wasipha amandla okuqhubeka nomsebenzi wethu wokushumayela.” Entsimini, uHerbert wayefumana amava amaninzi awayemomeleza nawayemhlekisa.

UHerbert wadibana nomnye umama owaba nomdla eBhayibhileni. Kamva xa uHerbert wayebuyela kuye, kwakukho umfana othile owayeyiphulaphule le ncoko. Emva kwemizuzu embalwa uHerbert wathi tshe into ethile eyambangela wangcangcazela. Kwisitulo esasisekoneni kuloo ndlu kwakukho umnqwazi wepolisa. Wawungowalo mfana, ekucacayo ukuba wayezimisele ukubamba uHerbert.

Wathi: “UliNgqina likaYehova! Khupha isazisi (ID) sakho.” UHerbert wamnika isazisi. Emva koko kwenzeka into ebingalindelekanga. Lo mama walijonga eli polisa waza wathi: “Ukuba kukhe kwenzeka nantoni na kule ndoda kaThixo, awuphindi ulibeke elakho apha.”

Lo mfana wathi xhungu okomzuzwana, wanika uHerbert isazisi sakhe, waza wamyeka wahamba. Kamva uHerbert weva ukuba lo mfana wayethandana nentombi yalo mama. Ngokuqinisekileyo wabona ukuba kubhetele aqhubeke ethandana naloo ntombazana kunokuba abambe uHerbert.

Masimenze uThixo Wethu UYehova

Sifunda ntoni kwezi ziganeko? NjengoAbraham, simele sibe nokholo olomeleleyo kwizithembiso zikaYehova. NjengoDavide, sifanele siguquke ngokwenene xa sisona size sibuyele kuYehova. Yaye njengoEliya, kufuneka sayame ngoYehova ukuze sifumane amandla ngamaxesha eenzingo. Xa sisenjenjalo, sinokumenza uThixo wethu uYehova ngoku nangonaphakade, ekubeni ‘enguThixo ophilayo, onguMsindisi wazo zonke iintlobo zabantu, ngokukodwa abo bathembekileyo.’—1 Timoti 4:10.

[Umbhalo osemazantsi]

[Imifanekiso ekwiphepha 25]

Ukuthobela kwalomeleza ukholo luka-Abraham

[Umfanekiso okwiphepha 26]

NjengoDavide, sifanele siguquke xa sonile

[Umfanekiso okwiphepha 28]

Njengoko uYehova wayeziqonda iimvakalelo zikaEliya, uyaziqonda nezethu