Ukushumayela Kwindawo EyayinamaKristu Amaninzi Ngenkulungwane Yokuqala
ELASEITALI, usingasiqithi welizwe elimile njengebhuti elinabe langena kuLwandle lweMeditera, belisoloko liyindawo yeziganeko zonqulo eziye zaphembelela imbali yehlabathi. Lithandwa zizigidi zabakhenkethi abatsalwa ziindlela ezahlukeneyo elime ngazo, imisebenzi yobugcisa edumileyo neendidi zezibiliboco eziphekwa apho ngendlela eyahlukileyo. Kwakweli lizwe awumanga ndawonye nomsebenzi wokufundisa iBhayibhile.
UbuKristu bokwenyaniso busenokuba baqala eRoma—ikomkhulu legunya lehlabathi langoko—xa amaYuda nababeguqukele ebuYudeni ababa ngamaKristu ngePentekoste yowama-33 C.E. babuya bevela eYerusalem. Malunga nowama-59 C.E., umpostile uPawulos watyelela okokuqala eItali. EPuteyoli engaselunxwemeni ‘wafumana abazalwana’ bakhe.—IZenzo 2:5-11; 28:11-16.
Njengoko uYesu nabapostile baxela kwangaphambili, ingekapheli nenkulungwane yokuqala yeXesha Eliqhelekileyo, amaqela abawexuki azahlula kubuKristu bokwenyaniso. Noko ke, ngaphambi kokuphela kwale nkqubo yezinto ingendawo, abafundi bokwenene bakaYesu baye batyhalela phambili nokushumayela iindaba ezilungileyo ehlabathini lonke—kuquka naseItali.—Mateyu 13:36-43; IZenzo 20:29, 30; 2 Tesalonika 2:3-8; 2 Petros 2:1-3.
Isiqalo Esinganiki Themba
Ngowe-1891, uCharles Taze Russell, owayekhokela kumsebenzi wokushumayela ehlabathini lonke waBafundi beBhayibhile (indlela awayebizwa ngayo amaNgqina kaYehova ngoko), watyelela okokuqala kwiidolophu ezithile zaseItali. Evuma ukubuya kwakhe ephaca apho wathi: “Asikhange sifumane kwanto isinika ithemba lesivuno eItali.” Entwasahlobo yowe-1910, uMzalwan’ uRussell wabuyela eItali waza wanikela intetho esekelwe eBhayibhileni kwiziko lomthambo laseRoma. Yaba njani imiphumo yoko? Wanikela le ngxelo: “Iziphumo zaloo ntlanganiso azizange zinike themba.”
Eneneni, ukushunyayelwa kweendaba ezilungileyo akuzange kube nankqubela kangako eItali, kuba amaNgqina kaYehova ayetshutshiswa ngoozwilakhe bolawulo lobuFasi. Ngoko, kwakukho amaNgqina kaYehova amalunga ne-150 kwelo lizwe, inkoliso yawo ifunde inyaniso yeBhayibhile kwizalamane okanye abahlobo abahlala kwamanye amazwe.
Inkqubela Emangalisayo
Emva kweMfazwe Yehlabathi II, kwathunyelwa iqela labavangeli basemazweni eItali. Kodwa njengokuba iingxelo zikaRhulumente eziselugcinweni zibonisa, izikhulu ezithile zaseVatican zacela urhulumente ukuba abagxothe abavangeli basemazweni. Kungekho nto banokuyenza, balinikel’ umva elo abavangeli basemazweni.
Phezu kwayo nje imiqobo, izihlwele zabantu baseItali ziye zangumsinga ukuya ‘entabeni’ kaYehova yonqulo. (Isaya 2:2-4) AmaNgqina aye anda ngokuphawulekayo. Ngowama-2004 bekukho incopho yabavakalisi beendaba ezilungileyo abangama-233 527, umntu om-1 kwabangama-248 kubemi belo, ibe kweza abangama-433 242 kwiSikhumbuzo sokufa kukaKristu. Kukho amabandla amaNgqina kaYehova angama-3 049 ahlanganisana kwiiHolo zoBukumkani ezifanelekileyo. Kutshanje, ngokukhethekileyo kukho amaqela abantu anda ngendlela ephawulekayo.
Ukushumayela Ngentlaninge Yeelwimi
Abaphambukeli abaninzi baseAfrika, eAsia naseMpuma Yurophu bakwelo laseItali beye kufuna umsebenzi okanye amadlelo aluhlaza, maxa wambi bebaleka iimeko ezimaxongo ngasemva. Ezi zigidi zabantu zinokuncedwa njani ngokomoya?
AmaNgqina amaninzi aseItali aye aqalisa ukufunda iilwimi ezinzima, njengesiAlbania, isiAmharic, isiArabhu, isiBengali, isiPunjabi, isiSinhala, isiTagalog nesiTshayina. Ukususela ngowama-2001, kwafundiswa abo banomdla ukuze bashumayela ngeelwimi zasemzini. Kule minyaka mithathu edluleyo, ngama-3 711 amaNgqina aye akho kwizifundo ezingama-79 eziqhutywa ngeelwimi ezili-17. Oku kuye kwanceda ekusekeni nasekomelezeni amabandla ali-146 namaqela angama-274 eelwimi ezahlukahlukeneyo ezingama-25. Ngoko abantu abaninzi abanyanisekileyo batsho beva iindaba ezilungileyo baza baqalisa ukufunda iBhayibhile. Imiphumo yoku isoloko iba ngaphaya koko bekulindelwe.
Elinye iNgqina likaYehova laxubusha ngeBhayibhile noGeorge, indoda yaseIndiya ethetha isiMalayalam. Phezu kwako nje ukuba neengxaki ezinzima zomsebenzi, uGeorge wasamkela ngovuyo isifundo seBhayibhile. Kwiintsuku ezimbalwa emva koko, umhlobo kaGeorge, uGil, umfo waseIndiya othetha isiPunjabi waya kwiHolo yoBukumkani ibe kwaqaliswa naye isifundo seBhayibhile. UGil waya kwazisa uDavid, waseIndiya othetha isiTelugu kumaNgqina. Akuzange kube kudala uDavid wafunda iBhayibhile. Kukho amanye amadoda amabini aseIndiya, uSonny noShubash, awayehlala ndlwininye noDavid. Nawo afundelwa iBhayibhile.
Emva kweeveki ezimbalwa, amaNgqina afumana umnxeba ovela kuDalip, othetha isiMarathi. Wathi: “Ndingumhlobo kaGeorge. Ndicela nindifundise iBhayibhile.” Kwaba sekufika uSumit othetha isiTamil naye efuna ukufundelwa. Ekugqibeleni, kwafowuna omnye umhlobo kaGeorge, naye ecela isifundo seBhayibhile. UGeorge weza nenye indoda, uMax, kwiHolo yoBukumkani. Nayo yacela ukufundelwa. Namhlanje kuqhutywa izifundo zeBhayibhile ezithandathu ibe kwenziwa amalungiselelo okuqhuba ezinye ezine. Ziqhutywa ngesiNgesi nakuba kusetyenziswa iimpapasho zesiHindi, isiMalayalam, isiMarathi, isiPunjabi, isiTamil, isiTelegu nesiUrdu.
Izithulu “Ziva” Iindaba Ezilungileyo
Bangaphezu kwama-90 000 abantu abangevayo eItali. Phakathi kwiminyaka ye-1970, amaNgqina anikela ingqalelo ekubafundiseni inyaniso yeBhayibhile. Ekuqaleni, amaNgqina angevayo afundisa abanye abalungiseleli ababenomdla wokunceda kule ntsimi Intetho Yezandla YaseItali. Baba baninzi abantu abangevayo abanomdla eBhayibhileni. Namhlanje, bangaphezu kwe-1 400 abantu abasebenzisa Intetho Yezandla YaseItali abaya kwiintlanganiso zamaKristu. Kukho amabandla ali-15 namaqela angama-52 aqhuba iintlanganiso zawo ngeNtetho Yezandla YaseItali.
Ekuqaleni, ukushumayela kubantu abangevayo kwakuxhomekeke kakhulu kwintsabelo yamaNgqina athile. Noko ke, ngowe-1978, iofisi yesebe lamaNgqina kaYehova laseItali yalungiselela iindibano ezinkulu zabantu abangevayo. NgoMeyi waloo nyaka, kwachazwa ukuba indibano yezizwe ngezizwe eyayiza kuba seMilan, iza kuba nocwangciso lwentetho yezandla. NgoFebruwari 1979 kwabakho indibano yesiphaluka yokuqala yabantu abangevayo kwiHolo yeNdibano yaseMilan.
Ukususela ngoko iofisi yesebe yanikela ingqalelo engakumbi ekondleni ngokomoya abantu abangevayo ngokukhuthaza iqela elandayo labashumayeli beendaba ezilungileyo ukuba baphucule ubuchule babo kwintetho yezandla. Ukususela ngowe-1995, kuye kwathunyelwa oovulindlela abakhethekileyo (abashumayeli beendaba ezilungileyo bexesha elizeleyo) kwamanye amaqela ukuze baqeqeshe amaNgqina angevayo kubulungiseleli nokuze akwazi ukulungiselela iintlanganiso zamaKristu. Kukho iiHolo zeNdibano ezintathu ezifakwe izixhobo zale mihla zevidiyo ukuze abantu babone kakuhle xa kuqhutywa ucwangciso. Zikho neekhasethi zevidiyo eziqulethe iimpapasho zamaKristu ukuze kuncedwe abantu abangevayo bafumane ukutya kokomoya.
Kukho abantu abaye baphawula ukuba amaNgqina azinyamekela kakuhle iintswelo zokomoya zabantu abangevayo. Iphephancwadi iP@role & Segni elipapashwa nguMbutho Wezithulu WaseItali, licaphula ileta eyathunyelwa ngomnye umfundisi wamaKatolika esithi: “Kunzima ukuba sisithulu kuba umntu osisithulu usoloko efuna ingqalelo. Ngokomzekelo, kulula ukuza ecaweni ehamba yedwa, kodwa ufuna umntu oza kumtolikela ukuze eve xa kufundwa naxa kuthethwa, okanye xa kuculwa.” Eli phephancwadi lihlabela mgama lithi: “Lo mfundisi uyavuma ukuba, ngelishwa icawa ayikakulungeli ukuhlangabezana nale ngxaki, ibe utsho phandle ukuba abantu abangevayo banyanyekelwa kakuhle kwiiHolo zoBukumkani zamaNgqina kaYehova kunokuba kunjalo ecaweni.”
Iindaba Ezilungileyo Zishunyayelwa Kumabanjwa
Ngaba unokukhululeka umntu ngoxa esentolongweni? Ewe, kuba iLizwi likaThixo linamandla ‘okubakhulula’ abo balamkelayo baze balisebenzise kubomi babo. Isigidimi esavakaliswa nguYesu “kubathinjwa” yayikukukhululeka esonweni nakunqulo lobuxoki. (Yohane 8:32; Luka 4:16-19) EItali kufumaneka imiphumo emihle gqitha ngokushumayela ezintolongweni. Phantse angama-400 amaNgqina kaYehova aye afumana imvume yokutyelela amabanjwa kuRhulumente ukuze awancede ngokomoya. AmaNgqina kaYehova aba yintlangano yokuqala ngaphandle kwamaKatolika ukucela imvume enjalo aze ayinikwe.
Isigidimi seBhayibhile sinokusasazwa nangezinye iindlela ezingakhange zicingwe. Amabanjwa aye ancokole namanye ngomsebenzi wokufundisa iBhayibhile wamaNgqina kaYehova. Nawo loo mabanjwa aye acele ukutyelelwa liNgqina. Okanye amalungu entsapho afundelwa iBhayibhile aye akhuthaze amabanjwa ukuba acele ukutyelelwa ngamaNgqina. Amanye agwetywe ubomi entolongweni ngokubulala okanye ulwaphulo-mthetho olunzulu aye aguquka aza enza iinguqu eziphawulekayo kubomi bawo. Oku kuwenza alungele ukuzahlulela kuYehova uThixo nokubhaptizwa.
Kwezinye iintolongo, kuye kwalungiselwa ukunikela iintetho zesidlangalala ezisekelwe eBhayibhileni, ukubhiyozela iSikhumbuzo sokufa kukaYesu, nokubonisa iikhasethi zevidiyo ezisekelwe eBhayibhileni zamaNgqina kaYehova. Amabanjwa adla ngokufika engumdolomba kwezi ntlanganiso.
Ukuze kuncedwe abo basezintolongweni, amaNgqina aye asasaza amaphephancwadi axubusha ngemibandela ebangel’ umdla neluncedo kumabanjwa. Elinye lawo yaba nguVukani! kaMeyi 8, 2001, owayexubusha ngombandela othi “Ngaba Amabanjwa Anokutshintshwa?” Elinye yinkupho ka-Aprili 8, 2003, elalixubusha umxholo othi “Ukusetyenziswa Kakubi Kweziyobisi Entsatsheni—Unokwenza Ntoni Ngale Ngxaki?” Kuye kwasasazwa amawaka emibhalo yala maphephancwadi kumabanjwa. Ngenxa yoko, kuqhutywa amakhulu ezifundo zeBhayibhile. Kukho nabalindi bentolongo abaye banomdla kwisigidimi seBhayibhile.
Emva kokufumana imvume ekhethekileyo kwabasemagunyeni, elinye ibanjwa uCostantino labhaptizwa kwiHolo yoBukumkani eSan Remo, phambi kwamaNgqina alapho ali-138. Echukumisekile emva kweso siganeko, uCostantino wathi: “Ndandingazi nokuba ndithini bububele obabulapho.” Iphephandaba lalapho lapapasha amazwi omnye umlindi wentolongo esithi: “Isivuyisa gqitha . . . into yokuba siye savuma kwenzeke oku. Kumele kunikelwe ingqalelo kuyo nantoni na enokuba luncedo ekuhlaleni, ebantwini nasekuvuseleleni imeko yokomoya yebanjwa.” Bechukunyiswe yindlela ulwazi oluchanileyo lweBhayibhile oluye lwachaphazela ngayo ubomi bukaCostantino, inkosikazi nentombi yakhe bathi: “Sizingca gqitha ngeenguqulelo azenzileyo. Uthanda uxolo, yaye uya esixhalabela ngakumbi. Siyakwazi kwakhona ukumthemba nokumhlonela.” Nabo baye baqalisa ukufunda iBhayibhile nokuya kwiintlanganiso zamaKristu.
USergio, owabanjelwa ubusela, ukuphanga exhobile, ukuthubelezisa iziyobisi nokubulala, wagwetyelwa ukuthothoza de kube ngowama-2024. Emva kokuhlolisisa iZibhalo iminyaka emithathu waza wenza neenguqu kubomi bakhe, uSergio wagqiba ekubeni abhaptizwe. Libanjwa le-15 ukubhaptizwa libe liNgqina likaYehova kwintolongo yasePorto Azzurro, ekwisiqithi sase-Elba. Phambi kweqela lamabanjwa awayekho, wabhaptizwa kwiqula elenziwayo kwibala lemidlalo lentolongo.
ULeonardo, othothoza iminyaka engama-20 wafumana imvume ekhethekileyo yokubhaptizwa kwiHolo yoBukumkani eParma. Edlan’ indlebe nephephandaba lalapho, uLeonardo wathi “ufuna ukuyenza icace into yokuba ugqibe ekubeni abe liNgqina likaYehova, kungekhona ngenjongo yokuphuma entolongweni, kodwa ukuze azanelise kwintswelo yokomoya.” Wathi: “Bendiphila ubomi obubi, kodwa ngoku ndiyishiye ngasemva loo ndlela. Nditshintshile, kodwa oko akwenzekanga lula. Kusafuneka ndiqhubeke ndisenza okulungileyo.”
USalvatore, obanjelwe ukubulala ukwintolongo eluqilima yaseSpoleto. Abaninzi bachukunyiswa gqitha kukubhaptizwa kwakhe okwenzeka entolongweni. Umlindi-ntolongo walapho wathi: “Ukukhetha izinto ezibalulekileyo eziphucula ukuziphatha kwabantu kumele kuqhwatyelw’ izandla, ngenxa yokuba kuluncedo kwabo basentolongweni nakuluntu ngokubanzi.” Ngenxa yotshintsho lukaSalvatore, inkosikazi nentombi yakhe ngoku bayaya kwiintlanganiso zamaNgqina kaYehova. Elinye ibanjwa awashumayela kulo uSalvatore nalo labhaptizwa laba ngumkhonzi kaYehova.
I-Itali yenye yeendawo ezazinolwando lwamaKristu okuqala. (IZenzo 2:10; Roma 1:7) Kweli xesha lokuvuna, kusaqhubeka kukho ulwando kwezo ndawo uPawulos namanye amaKristu babezibhokoxa kuzo beshumayela iindaba ezilungileyo.—IZenzo 23:11; 28:14-16.
[Imaphu ekwiphepha 13]
(Ukuba ufuna inkcazelo ehlahlelwe kakuhle, yiya kwimpapasho)
EITALI
ERoma
[Imifanekiso ekwiphepha 15]
IHolo yeNdibano yaseBitonto nebandla leNtetho Yezandla YaseItali eRoma
[Umfanekiso okwiphepha 16]
Amabanjwa ‘ayakhululwa’ yinyaniso yeBhayibhile
[Imifanekiso ekwiphepha 17]
Ulwando lokomoya lusaqhubeka kwindawo eyayinamaKristu amaninzi ngenkulungwane yokuqala