Ilizwi LikaYehova Linwenwa Okomlilo Wedobo ‘Kwilizwe Lokhozi’

“ILIZWE Lokhozi.” Le yindlela abantu baseAlbania abalibiza ngayo ilizwe labo ngolwimi lwabo. Eli lizwe lingqamene noLwandle iAdriatic kuSingasiqithi weBalkan, liphakathi kweGrisi nelo lalisakuba yiYugoslavia. Nangona kukho iimbono ezininzi ngemvelaphi yabemi balapho, ababhali-mbali abaninzi bayavuma ukuba abantu baseAlbania nolwimi lwabo baphuma kumnombo wabantu baseIllyria, abanezithethe ezisusela emva ngowama-2000 B.C.E. ngokutsho kweThe Encyclopædia Britannica.

IAlbania lilizwe elihle elineentaba ezingamajikojiko emantla, namanxweme anesanti emhlophe kumazantsi eAdriatic. Noko ke, eyona nto intle kakhulu ngabantu balapho. Banothando nobubele, bangamaqhakraqhakra, bafundiseka lula, amaqhaji ahlala edlamkile xa ethetha.

Utyelelo Lomvangeli Wasemazweni Owaziwayo

Ubuntu babemi balapha obubangel’ umdla nobuhle belizwe labo ngokungathandabuzekiyo kwaba nomtsalane kumhambi othile okhethekileyo kwiinkulungwane ezadlulayo. Malunga nowama-56 C.E., umpostile uPawulos owahamba hamba gqitha wabhala wathi: “Ndaya kufikelela eIliriko ndizishumayela ngokucokisekileyo iindaba ezilungileyo ezingoKristu.” (Roma 15:19) Amazantsi eIliriko ayekwindawo okuyo umbindi nomntla weAlbania namhlanje. La mazwi uPawulos wawabhala eseKorinte, eGrisi, ekumazantsi eIliriko. Isibakala sokuba wabhala esithi washumayela ngokucokisekileyo ‘waya kufikelela eIliriko’ sibonisa ukuba wanyuka waya kufikela kumda waseIliriko okanye ngaphakathi kuyo. Enoba kwenzeka ntoni, washumayela kwindawo ngoku eyaziwa ngokuba kusemazantsi eAlbania. NguPawulos ekunokuthiwa waba ngowokuqala ukushumayela ngoBukumkani eAlbania.

Kwaqengqeleka iinkulungwane, nabalawuli besina bededelana. Amagunya asemzini alawula kulo mmandla umncinane waseYurophu de iAlbania yaba lilizwe elizimeleyo ngowe-1912. Malunga neminyaka elishumi emva koko, ilizwi elingoBukumkani bukaYehova laphinda laviwa eAlbania.

Iziqalelo Ezichwayitisayo Zale Mihla

Ngeminyaka ye-1920, abemi baseAlbania ababefudukele eUnited State baza banxulumana naBafundi beBhayibhile beZizwe ngeZizwe, njengoko amaNgqina kaYehova ayesaziwa njalo ngelo xesha, babuyela eAlbania ukuze baxelele abanye oko bakufundileyo. Omnye wabo yayinguNasho Idrizi. Abanye bazivuyela ezo ndaba. Ukuze kunyanyekelwe abantu abanomdla abandayo, ngowe-1924 iofisi yaseRomania yanikwa isabelo sokongamela umsebenzi wokushumayela eAlbania.

UThanas Duli (okanye uAthan Doulis) wayengomnye wabo bafunda ngoYehova eAlbania ebudeni baloo minyaka. Wathi: “Ngowe-1925 kwakukho amabandla amathathu eAlbania, naBafundi beBhayibhile abakwanti nabantu abanomdla abakwiindawo ezahlukahlukeneyo kulo lonke elo. Babethandana gqitha ngokwahlukileyo . . . kubantu ababangqongileyo!”a

Ukuba mbi kweendlela zokuhamba kwakusenza kube nzima gqitha ukuhamba. Sekunjalo, abavakalisi abanenzondelelo babehamba ngoxa kunjalo. Ngokomzekelo, kunxweme olusemazantsi eVlorë, uAreti Pina wabhaptizwa ngowe-1928, xa wayeneminyaka eli-18 ubudala. Wanyuka esihla kwimixethuka yeentaba eshumayela, ephethe iBhayibhile ngesandla. Wayengomnye wabo babekwibandla elinenzondelelo laseVlorë ebutsheni beminyaka yowe-1930.

Ngowe-1930 umsebenzi wokushumayela eAlbania waba phantsi kweofisi yesebe laseAthens, eGrisi. Ngowe-1932 umveleli ohambahambayo waseGrisi watyelela eAlbania ukuze akhuthaze aze omeleze abazalwana. Inkoliso yabo babefunda inyaniso yeBhayibhile ngelo xesha babenethemba lokuya ezulwini. Ukwaziwa kwabo ngokucoceka nokuthi tye kwabenza bahlonelwa ngokunzulu kuyo yonke indawo. Umsebenzi waba bazalwana bathembekileyo waba yimpumelelo gqitha. Nyaka ngamnye kowe-1935 nowe-1936, kwahanjiswa iincwadi zeBhayibhile ezimalunga nama-6 500 eAlbania.

Ngenye imini, embindini waseVlorë, uNasho Idrizi wadlala enye yeentetho zikaJ. F. Rutherford kwigramafoni. Abantu bavala amashishini abo baza kuphulaphula njengoko uMzalwan’ uIdrizi wayeguqulela loo ntetho ngesiAlbania. Inzondelelo yabo bafundisi beBhayibhile bokuqala, yavuzwa. Ngowe-1940 kwakukho amaNgqina angama-50 eAlbania.

Ilizwe Elingakholelwayo KuThixo

Ngowe-1939, amaFasi aseItali alithabathela kuwo elo lizwe. Unqulo lwamaNgqina kaYehova lwayekwa ukugqalwa njengolusemthethweni, yaye umsebenzi wawo wokushumayela wavalwa. Kungekudala emva koko, eli lizwe lahlaselwa yimikhosi yaseJamani. Ekupheleni kweMfazwe Yehlabathi II, kwavela inkokeli yomkhosi eliqhaji, uEnver Hoxha. Umbutho wakhe wamaKomanisi waphumelela kunyulo lowe-1946, waza waba yinkulumbuso. Iminyaka eyalandelayo emva koko yayibizwa ngokuba lixesha lenkululeko, kodwa kubantu bakaYehova yayilixesha lengcinezelo.

Ngokuthe ngcembe, lo rhulumente waya ephelelwa ngumdla kunqulo. Ngenxa yokungathabathi cala kwezopolitiko njengamaKristu, amaNgqina kaYehova eAlbania ala ukuphatha izixhobo nokubandakanyeka kwezopolitiko. (Isaya 2:2-4; Yohane 15:17-19) Amaninzi avalelwa entolongweni, enganikwa kutya okanye izinto eziyimfuneko. Kwiimeko ezininzi, oodade bokomoya abangaphandle babewahlambela iimpahla baze bawaphekele.

Ukungoyiki Ngoxa Bejamelene Nentshutshiso

Ebutsheni beminyaka ye-1940, uFrosina Xheka, owayekwishumi elivisayo ngelo xesha kwidolophana ekufuphi nasePërmet, weva oko abanakwabo abadala kuye babekufundiswa liNgqina elingumkhandi wezihlangu uNasho Dori.b Abasemagunyeni babewaphethel’ imbengwana amaNgqina kaYehova, kodwa ukholo lukaFrosina lomelela ngakumbi nangona abazali bakhe babengathandi. “Babefihla izihlangu zam baze bandibethe ukuba ndiye kwiintlanganiso zamaKristu. Bazama ukunditshatisa nomntu ongakholwayo. Ndathi ndakwala, bandigxotha. Lalikhithika ngalo mini. UNasho Dori wacela uMzalwan’ uGole Flloko waseGjirokastër ukuba andincede. Benza amalungiselelo okuba ndiye kuhlala nentsapho yakhe. Abanakwethu babevalelwe entolongweni iminyaka emibini ngenxa yokungathabathi cala kwezopolitiko. Emva kokuba bekhululwe, ndafudukela eVlorë ukuze ndiye kuhlala nabo.

“Amapolisa azama ukundinyanzela ukuba ndibe nenxaxheba kwezopolitiko. Andizange ndivume. Andivalela, andisa kwigumbi elithile aza andingqinga. Elinye landisongela lisithi: ‘Uyayazi into esinokukwenza yona?’ Ndaphendula ndathi: ‘Ninokwenza kuphela into uYehova anivumela ukuba niyenze.’ Laphendula lathi: ‘Andiqondi ukuba unayo le iphantsi kweenwele! Phum’ uphele apha!’”

Kuloo minyaka abazalwana baseAlbania babenyaniseke ngolo hlobo. Ngowe-1957 abavakalisi boBukumkani bafikelela incopho yama-75. Ebutsheni beminyaka ye-1960, ikomkhulu lamaNgqina kaYehova lalungiselela ukuba uJohn Marks, ummi waseAlbania owafudukela eUnited States, atyelele eTiranë ukuya kunceda ekulungelelaniseni umsebenzi wamaKristu.c Noko ke, kungekudala, uLuçi Xheka, uMihal Sveci, uLeonidha Pope nabanye abazalwana abaneembopheleleko bathunyelwa kwiinkampu ekusetyenzwa nzima kuzo.

Izinto Ziqalisa Ukulunga

Ngaphambi kowe-1967 zonke iinkonzo zazichasiwe eAlbania. Emva koko zazingafunwa kwaphela. Akukho mfundisi ungumKatolika, ungumOthodoki okanye ungumSilamsi owayenokwenza nayiphi na inkonzo yonqulo. Iicawa nezakhiwo zonqulo zamaSilamsi zazivalwa okanye ziguqulwe zibe ziiholo zokwenza umthambo, iimyuziyam okanye iimarike. Akukho mntu wayevumelekile ukuba neBhayibhile. Kwakungekho nomntu owayevumelekile ukuthetha ngokukholelwa kwakhe kuThixo.

Ukushumayela nokuhlanganisana kwakuyinto enzima gqitha. Ngqina ngalinye lalisenza konke okusemandleni alo ukukhonza uYehova nangona ayehlukanisiwe. Ukususela ngeminyaka ye-1960 ukusa kweye-1980, inani lamaNgqina lancipha gqitha. Sekunjalo ayeqinile ngokomoya.

Ngasekupheleni kweminyaka ye-1980, iinguqulelo kwezopolitiko zazihamba kancinane. Ukutya nempahla zazinqongophele. Abantu babengonwabanga. Iinguqu ezazisenzeka eMpuma Yurophu zafikelela ebutsheni beminyaka ye-1990 eAlbania. Emva kweminyaka engama-45 yolawulo lobuzwilakhe, urhulumente omtsha wavumela abantu ukuba babe nenkululeko yonqulo kwakhona.

Zisalathiswa liQumrhu Elilawulayo lamaNgqina kaYehova, iiofisi zamasebe eOstriya naseGrisi ngokukhawuleza zaqalisa ukuqhagamshelana nabazalwana baseAlbania. Abazalwana abangamaGrike ababelwazi ulwimi lwaseAlbania bazisa iincwadi ezisekelwe eBhayibhileni ezisandul’ ukuguqulelwa eTiranë naseBerat. Abazalwana basekuhlaleni ababethe saa bavuya gqitha xa badibana namaNgqina avela kwamanye amazwe okwesihlandlo sokuqala emva kweminyaka.

Oovulindlela Basemzini Abanenzondelelo Bathabath’ Ukhokelo Emsebenzini Wokushumayela

Ebutsheni bowe-1992, iQumrhu Elilawulayo lalungiselela ukuba uMichael noLinda DiGregorio, isibini esingabavangeli basemazweni esinemvelaphi yaseAlbania, bafudukele apho. Baqhagamshelana neenkonde ezithembekileyo, bazinceda ukuba ziphinde zimanyane nentsapho yokomoya yezizwe ngezizwe. NgoNovemba kwafika iqela leziquququ zoovulindlela abakhethekileyo okanye abavangeli bexesha elizeleyo baseItali abali-16 kunye noovulindlela abane abangamaGrike. Kwalungiselelwa iklasi yokufundisa aba vulindlela ulwimi lwasekuhlaleni.

Ubomi babunzima kwaba vulindlela basemzini. Umbane wawungasoloko ukho. Ebusika kwakubanda yaye kufumile. Abantu kwakufuneka beme emigceni ixesha elide ukuze bafumane ukutya nezinye izinto. Sekunjalo, eyona ngxaki inkulu ababenayo abazalwana yayikukufumana isakhiwo esikhulu ngokwaneleyo esasinokuginya izihlwele zabantu abanomdla ababesamkela inyaniso!

Oovulindlela ababesokola ukuthetha isiAlbania baqonda ukuba ukuthetha ulwimi kakuhle sisixhobo nje sokuphumeza okuthile. Omnye umfundisi weBhayibhile onamava wathi kubo: “Akufuneki sisebenzise igrama egqibeleleyo ukuze sincumele abazalwana bethu okanye sibange. Abantu baseAlbania baza kutsalwa luthando olusuka entliziyweni kungekhona yigrama yenu egqibeleleyo. Musani ukuxhalaba, baza kukuqonda oko nikuthethayo.”

Emva kweklasi yokuqala yokufunda olo lwimi, oovulindlela baqalisa ukusebenza eBerat, eDurres, eGjirokastër, eShkodër, eTiranë naseVlorë. Kungekudala kwamiselwa amabandla amaninzi kwezo zixeko. UAreti Pina, owayesele eneminyaka engaphezu kwama-80 ubudala nempilo enkenenkene, wayesahlala eVlorë ngelo xesha. Kwathunyelwa oovulindlela abakhethekileyo ababini ukuba baye kushumayela noAreti. Abantu bamangaliswa kukubona abantu basemzini bethetha isiAlbania yaye babesithi: “Abavangeli basemazweni bezinye iinkonzo bafuna sifunde isiNgesi okanye isiTaliyane ukuba sifuna ukuva oko bakufundisayo. Nimele ukuba nisithanda ngokwenene yaye kukho into ebalulekileyo enifuna ukusixelela yona, xa nide nifunde isiAlbania!” UAreti wagqiba ikhondo lakhe lasemhlabeni ngokuthembeka ngoJanuwari 1994, yaye washumayela de kwangumzuzu wokugqibela. Inzondelelo awayenayo yena nabanye oovulindlela yasikelelwa. Ngowe-1995 kwaphinda kwamiselwa ibandla laseVlorë. Namhlanje, kukho amabandla amathathu anolwando naxakekileyo eshumayela kweso sixeko sinezibuko.

Kulo lonke eli lizwe, abantu bebelamba ngokomoya yaye bengaluchasanga kangako unqulo. Babezamkela yaye bezifunda ngolangazelelo naziphi na iincwadi ezisekelwe eBhayibhileni abazifumana kumaNgqina. Abaselula abaninzi baqalisa ukufunda baza bakhawuleza ukwenza inkqubela.

Angaphezu kwama-90 amabandla namaqela aqhubeka “eqiniswa elukholweni yaye esanda ngenani imihla ngemihla” kulo lonke elo. (IZenzo 16:5) AmaNgqina aseAlbania angama-3 513 asenomsebenzi omninzi afanele awenze. NgoMatshi 2005, kwiSikhumbuzo sokufa kukaKristu kweza abantu abangama-10 144. Iingxubusho zeBhayibhile kunye nabantu baseAlbania abanobubele ziye zenza kwakho izifundo zeBhayibhile ezingaphezu kwama-6 000. Licacile ke ngoko elokuba, INguqulelo Yehlabathi Elitsha yesiAlbania esandul’ ukukhululwa iza kuba yingenelo kubantu abaninzi. Ngokwenene, ilizwi likaYehova linwenwa okomlilo wedobo ‘Kwilizwe Lokhozi’ ukuze adunyiswe.

[Imibhalo esemazantsi]

[Ibhokisi ekwiphepha 20]

UMLO WOBUHLANGA UYAPHELA EKOSOVO!

Ngasekupheleni kweminyaka ye-1990 elaseKosovo laba ngundaba-mlonyeni ngenxa yemfazwe eyabangelwa lukruthakruthwano ngemihlaba nentiyo yobuhlanga nto leyo eyabangela ukuba kungenelele amazwe asemzini.

Ebudeni bemfazwe kwiiBalkans, kwanyanzeleka ukuba amaNgqina amaninzi abalekele kumazwe asebumelwaneni. Emva kokuba imfazwe iphelile, iqela lawo elincinane labuyela eKosovo, lilungele ukwenza umsebenzi wokushumayela. Oovulindlela abakhethekileyo baseAlbania naseItali bafudukela eKosovo ukuze bancede abemi balapho abazizi-2 350 000. Amabandla amane namaqela amathandathu, anabavakalisi abamalunga ne-130 abakhonza uYehova kulo mmandla.

Ngentwasahlobo yowama-2003, ePriština kwabakho indibano ekhethekileyo yosuku olunye yaye kweza abantu abangama-252. Kwabo babezile kwakukho nabantu abanemvelaphi yaseAlbania, eJamani, eItali, eRomania naseSerbia. Emva kwentetho yobhaptizo isithethi sabuza imibuzo emibini. Kwaphakama abantu abathathu baza baphendula ngokuqiniseka: aba yayingumAlbania, umRomania nomSerbia.

Emva kokuba abo babekho beve abo baza kubhaptizwa bephendula ngaxeshanye besithi: “Ewe!” ngeelwimi zabo ezahlukahlukeneyo batsho ngentswahla yezandla. Aba bathathu bangana. Babesifumene isicombululo kwingxaki yobuhlanga eyayizinzile neyayithwaxe ilizwe labo.

[Imaphu ekwiphepha 17]

(Ukuba ufuna inkcazelo ehlahlelwe kakuhle, yiya kwimpapasho)

Mediterranean Sea

ITALY

ALBANIA

GREECE

[Umfanekiso okwiphepha 18]

AmaNgqina aselula axelisa inzondelelo yabakhulileyo

[Umfanekiso okwiphepha 18]

UAreti Pina wakhonza ngokuthembeka ukususela ngowe-1928 de kwasa ekufeni kwakhe ngowe-1994

[Umfanekiso okwiphepha 19]

Iqela lokuqala loovulindlela basemzini ababekwiklasi eyayifundisa ulwimi lwesiAlbania

[Inkcazelo Ngomfanekiso okwiphepha 16]

Eagle: © Brian K. Wheeler/VIREO