Ngaba Ukholelwa Ngokwenene Ukuba UMtyholi Ukho?

IZIBHALO zimchaza uMtyholi njengomntu wokwenene. Akabonakali emehlweni abantu kanye njengokuba noThixo enjalo. “UThixo unguMoya,” itsho iBhayibhile. (Yohane 4:24) UMtyholi sisidalwa somoya. Noko ke, ngokungafaniyo noMdali, uMtyholi waba nesiqalo.

UYehova uThixo wadala izidalwa zomoya ezininzi ngaphambili kakhulu kunokuba adale abantu. (Yobhi 38:4, 7) EBhayibhileni ezi zidalwa zomoya zibizwa ngokuba ziingelosi. (Hebhere 1:13, 14) UThixo wazidala zonke zafezeka—akukho nanye eyayingumtyholi okanye eneempawu ezimbi. Ngoko ke, wabakho njani uMtyholi? Igama elithi “umtyholi” lithetha “umhlebi” yaye likwathetha umntu othetha ubuxoki obungendawo ngomnye umntu. Elithi “Sathana” lithetha “uMchasi” okanye umphikisi. Kanye njengendoda ebikade inyanisekile ngaphambili nezenza isela ngokuthi ibe, omnye woonyana bokomoya bakaThixo waba nomnqweno ongafanelekanga waza ngaloo ndlela wazenza uSathana uMtyholi. IBhayibhile iyasichazela indlela okwenzeka ngayo oku isithi: “Ngamnye ulingwa ngokutsalwa nokuwexulwa ngumnqweno wakhe. Wandule ke umnqweno, xa uthe wakhawula, uzale isono; isono, xa sithe safezwa, sivelisa ukufa.”—Yakobi 1:14, 15.

Kwenzeka kanye loo nto. Xa uYehova uThixo wadala abantu bokuqala, uAdam noEva, ingelosi ekwakusele kumbovu ukuba ivukele yayijongile. Yayisazi ukuba uYehova wayalela uAdam noEva ukuba bazalise umhlaba ngabantu abangamalungisa, ababeza kunqula uMdali. (Genesis 1:28) Le ngelosi yabona ukuba likho ithuba lokuba ingazukiswa nokuba igqalwe njengebalulekileyo. Iqhutywa kukubawa, yanqwenela ukunqulwa nto leyo eyayifanele yenziwe kuMdali. Kunokuba iwugatye lo mnqweno ungafanelekanga, le ngelosi yawukhulisa, nto leyo ekugqibeleni eyayibangela ukuba ibe lixoki nomvukeli. Khawuphulaphule oko yakwenzayo.

Ingelosi engumvukeli yasebenzisa inyoka ukuba ithethe nomfazi wokuqala, uEva. Inyoka yabuza kumfazi: “Utshilo ngokwenene na uThixo ukuba nize ningadli kuyo yonke imithi yomyezo?” Xa uEva eyichazela ngomyalelo kaThixo nesohlwayo sokungawuthobeli, inyoka yathi: “Ngokuqinisekileyo anisayi kufa. Kuba uThixo uyazi ukuba mhla nithe nadla kuzo aya kuvuleka amehlo enu nize nibe njengoThixo, nazi okulungileyo nokubi.” (Genesis 3:1-5) UThixo wayetyholwa ngokungabaxeleli nyaniso uAdam noEva. Ngokutya kwiziqhamo zaloo mthi, kwakungathi uEva uza kufana noThixo, abe negunya lokuzigqibela ngokulungileyo nokubi. Obo bubuxoki bokuqala obakha bathethwa. Ukuthetha kwayo ngolo hlobo kwayibangela le ngelosi yaba ngumhlebi. Kwakhona yaba lutshaba lukaThixo. Ngenxa yoko, iBhayibhile ilufanisa olu tshaba lukaThixo ‘nenyoka yantlandlolo, leyo ibizwa ngokuba nguMtyholi, noSathana.’—ISityhilelo 12:9.

“Hlalani Nilindile”

UEva wabukholelwa ubuxoki bukaMtyholi. IBhayibhile ithi: “Ngenxa yoko umfazi wabona ukuba umthi wawulungele ukudliwa kwanokuba wawulangazeleleka emehlweni, ewe, kwakunqweneleka ukuwujonga umthi lowo. Ngoko wathabatha eziqhameni zawo waza wadla. Emva koko wanika nendoda yakhe isakuba kunye naye yaza nayo yadla.” (Genesis 3:6) UEva wamkholelwa uSathana waza akamthobela uThixo. Wakwazi nokubangela ukuba uAdam ophule umthetho kaThixo. UMtyholi waphumelela ukubangela uAdam noEva bavukele uThixo. Ukususela ngoko, uSathana uye wabaphembelela abantu bengaqondanga. Yintoni azimisele ukuyenza? Kukuyekisa abantu ukuba banqule uThixo oyinyaniso baze banqule yena. (Mateyu 4:8, 9) Ngesizathu esivakalayo, iZibhalo ziyalumkisa: “Hlalani nithe qwa, nilindile. Utshaba lwenu, uMtyholi, luhambahamba njengengonyama egqumayo, efuna ubani engamqwengayo.”—1 Petros 5:8.

IBhayibhile imchaza ngokucacileyo uMtyholi njengomntu wokwenene nowokomoya—ingelosi engendawo nekwayingozi! Inyathelo lokuqala khon’ ukuze sikwazi ukuba ngabantu abaphaphileyo kukuqonda ukuba ukho ngokwenene. Kodwa ukuhlala siphaphile nokuhlala sivul’ amehlo kubandakanya okungakumbi. Kwakhona kubalulekile ukuba siwazi “amacebo” kaSathana neendlela zakhe zokulahlekisa abantu. (2 Korinte 2:11) Ngawaphi amacebo akhe? Yaye sinokuwaxhathisa njani?

UMtyholi Usebenzisa Eyona Nto Bayifuna Ngokwenene

UMtyholi wayesoloko ebajongile abantu ukususela ekudalweni kwabo. Uyazazi iimpawu zabantu—iintswelo zabo, izinto abanomdla kuzo, neminqweno yabo. USathana wazi kakuhle ukuba abantu badalwe benentswelo yokomoya, yaye uye wayisebenzisa kakubi loo ntswelo. Ukwenze njani oko? Ngokufundisa abantu iimfundiso zonqulo ezibubuxoki. (Yohane 8:44) Unqulo lobuxoki Iufundisa izinto ezininzi ezahlukahlukeneyo nezididayo ngoThixo. Ucinga ukuba ngubani osemva kwayo yonke le nto? Iimfundiso eziphikisanayo azinakuba yinyaniso zonke. Ngoko ke, ngaba akunakwenzeka kuthi kanti iimfundiso ezininzi zonqulo lobuxoki ziqulunqwe yaye zisetyenziswa nguSathana ukulahlekisa abantu? IBhayibhile ibhekisela kuye ‘njengothixo wale nkqubo yezinto,’ oye wamfamekisa ingqondo zabantu.—2 Korinte 4:4.

Inyaniso evela kuThixo iyamkhusela umntu ekukhohlisweni lunqulo lobuxoki. IBhayibhile ifanisa inyaniso eseLizwini likaThixo nebhanti eyayinxitywa lijoni lamandulo ukukhusela isinqe. (Efese 6:14) Ukuba ungenisa ulwazi lweBhayibhile uze uphile ngokuvumelana noko ukufundileyo, ngokungathi uyibhinqile, iya kukukhusela ekukhohlisweni lunqulo lobuxoki.

Umnqweno wabantu wokufuna ukunqula uye wakhokelela ekubeni bafun’ ukwazi izinto ezingaziwayo. Oko kuye kwababeka esichengeni selinye iqhinga likaSathana lokubakhohlisa. Esebenzisa ukufuna kwabantu ukwazi izinto ezingaqhelekanga neziyimimangaliso, uSathana uye wasebenzisa ukusebenzelana nemimoya ukuze alawule abantu. Njengokuba umzingeli esebenzisa isithiyelo ukubambisa ixhoba, uSathana usebenzisa ukuxela iziganeko kwangaphambili, ukuvumisa ngeenkwenkwezi, ukulalisa abantu ngomlingo, ubugqwirha, ukuvumisa ngokufunda imigca esesandleni nomlingo ukubambisa abantu ehlabathini lonke.—Levitikus 19:31; INdumiso 119:110.

Unokuzikhusela njani ekubanjisweni ngumgibe wokusebenzelana nemimoya. IDuteronomi 18:10-12 ithi: “Maze kungafunyanwa namnye kuwe udlulisa unyana wakhe okanye intombi yakhe emlilweni, novumisayo, noqhelisela umlingo, nohlaba izihlabo nokhafulayo, nobopha ngoomabophe, nobuza koneshologu, noyinkunkqele ekuxeleni iziganeko kwangaphambili, nobuzisa kwabafileyo. Kuba uYehova uyamcekisa wonke ubani ozenzayo ezi zinto, yaye kungenxa yezi zinto zicekisekayo le nto uYehova uThixo wakho azigxothayo phambi kwakho.”

Icebiso leZibhalo lingqalile: Kuphephe ukusebenzelana nemimoya. Kuthekani ukuba ubukade usebenzelana nemimoya yaye ngoku ufuna ukwahlukana nayo? Unokulandela umzekelo wamaKristu okuqala esixeko sase-Efese. IBhayibhile ithi: Xa alamkelayo ilizwi likaYehova “abaliqela noko kwabo babeqhelisela ubugcisa bomlingo bazizisa ndawonye iincwadi zabo baza bazitshisa phambi kwakhe wonk’ ubani.” Ezo ncwadi zazibiza imali eninzi. Zazixabisa amaqhosha esilivere angama-50 000. (IZenzo 19:19, 20) Sekunjalo, amaKristu ase-Efese akazange athandabuze ukuzitshisa ezo ncwadi.

USathana Usebenzisa Ubuthathaka Bethu

Ingelosi efezekileyo yaba nguSathana uMtyholi ngenxa yokonganyelwa kukuzingca. Kwakhona wabangela uEva wanekratshi, ngokuzingca wafuna ukufana noThixo. Namhlanje, uSathana ulahlekisa abantu abaninzi ngokubenza babe nekratshi. Ngokomzekelo, abanye bacinga ukuba uhlanga lwabo, okanye isizwe sabo sibhetele kunezinye. Hayi indlela okwahluke ngayo oku koko kufundiswa yiBhayibhile! (IZenzo 10:34, 35) IBhayibhile ithi: “[UThixo] wazenza ngokuphuma kumntu omnye zonke iintlanga zabantu.”—IZenzo 17:26.

Indlela yokuzikhusela kuSathana kukubonisa ukuthobeka. IBhayibhile isiyalela ukuba ‘singazicingeli ngaphezu koko simelwe ukuzicingela ngako.’ (Roma 12:3) Ithi: “UThixo ubachasile abanekratshi, kodwa ubanika ububele obungasifanelanga abathobekileyo.” (Yakobi 4:6) Eyona ndlela esinokukuxhathisa ngayo ukulahlekiswa nguSathana kukwenza umgudu wokubonisa ukuthobeka nezinye iimpawu akholiswa zizo uThixo.

Kwakhona uMtyholi ukwasebenzisa nobuthathaka bethu ukuze soyiswe yiminqweno yesini engafanelekanga. UYehova uThixo wayefuna abantu babunandiphe ubomi. Xa loo minqweno izaliseka ngokuvumelana nokuthanda kukaThixo, oko kuya kuphumela kulonwabo lokwenene. Kodwa uSathana ulinga abantu ukuba banelise iinkanuko zesini ngokuziphatha okubi. (1 Korinte 6:9, 10) Eyona nto ibhetele kukuba sigcine iingqondo zethu zimiliselwe kwizinto ezinyulu nezinesidima. (Filipu 4:8) Oku kuya kukunceda ulawule iingcinga zakho nendlela ovakalelwa ngayo.

Mchase UMtyholi

Ngaba ungaphumelela ukumchasa uMtyholi? Ewe, unako. IBhayibhile isiqinisekisa isithi: “Mchaseni uMtyholi, wonibaleka.” (Yakobi 4:7) Enoba uyamchasa uSathana, akasoze akhawuleze ayekelele aze ayeke ukukubangela ukuba ube sengxakini njengoko ungenisa ulwazi ngoThixo. UMtyholi uya kuzama kwakhona ekhangela ‘elinye ixesha elimlungeleyo.’ (Luka 4:13) Noko ke, akuyomfuneko ukuba umoyike uMtyholi. Ukuba uqhubeka umchasa, akanakukwazi ukukubangela umshiye uThixo oyinyaniso.

Noko ke, ukuze umchase uMtyholi ufanele umazi uze wazi nendlela abalahlekisa ngayo abantu nendlela onokuzikhusela ngayo kumaqhinga akhe. Mnye kuphela umthombo ochanileyo wolo lwazi—liLizwi likaThixo, iBhayibhile. Zenzele isigqibo sokufunda iZibhalo eziphefumlelweyo, uze ukusebenzise ebomini bakho oko ukufundileyo. AmaNgqina kaYehova asekuhlaleni angakuvuyela ukukunceda simahla ngesifundo seBhayibhile ngexesha elikulungeleyo. Qhagamshelana nawo ngokukhawuleza okanye ubhalele abapapashi beli phephancwadi.

Njengokuba usamkela isifundo seBhayibhile, kufuneka uqonde ukuba uSathana unokusebenzisa inkcaso okanye intshutshiso ukuze uyeke ukufunda inyaniso eseLizwini likaThixo. Abanye babahlobo bakho basenokucaphuka kuba ufunda iBhayibhile. Oku kunokwenzeka kuba abazazi izinto ezimangalisayo ozifundayo kuyo. Abanye basenokuhlekisa ngawe. Kodwa ngaba ukunikezela kuya kumkholisa uThixo? USathana ufuna ukukudimaza ukuze uyeke ukufunda ngoThixo oyinyaniso. Musa ukumvumela akoyise. (Mateyu 10:34-39) Akukho nto umtyala yona. Utyala uYehova ubomi bakho. Ngoko ke, zimisele ukumchasa uMtyholi uze ‘uvuyise intliziyo kaYehova.’—IMizekeliso 27:11.

[Umfanekiso okwiphepha 6]

Abo baba ngamaKristu bazitshisa iincwadi zokusebenzelana nemimoya

[Umfanekiso okwiphepha 7]

Zenzele isigqibo sokufunda iBhayibhile