Imibuzo Evela Kubafundi
Kwakutheni ukuze iintlobano zesini ezithile zokwemvelo kuthiwe zimenza ubani abe “ngongahlambulukanga” kuMthetho kaMoses?
Yadalwa nguThixo into yokuba abantu babe neentlobano zesini ukuze bazale abantwana nokuze izibini ezitshatileyo zikwazi ukuziyolisa. (Genesis 1:28; IMizekeliso 5:15-18) Kodwa kwiLevitikus isahluko 12 nese-15 sifumana iinkcukacha zemithetho ephathelele ukungahlambuluki okubangelwa kukuphuma amadlozi, kukuba sexesheni nakukuzalwa komntwana. (Levitikus 12:1-6; 15:16-24) KumaSirayeli amandulo loo mithetho yayikhuthaza ukuba ahlale esempilweni, enemilinganiselo ephakamileyo yokuziphatha, yaye ibethelela ubungcwele begazi nemfuneko yokucanyagushelwa kwezono.
Phakathi kwezinto ezaphuculwa nguMthetho kaMoses ophathelele iintlobano zesini, wanceda amaSirayeli ahlala esempilweni. Incwadi ethi The Bible and Modern Medicine ithi: “Ukwalelwa kokuba neentlobano zesini xa umntu esexesheni kwangqineka kuluncedo gqitha ekuthinteleni izifo ezithile ezidluliselwa ngeentlobano zesini . . . yaye oko kungundoqo ekukhuseleni nasekuthinteleni umhlaza wesibeleko.” Loo mithetho yakhusela abantu bakaThixo kwizifo abasenokuba babengazazi okanye bengaziqondi. Ukuhlala kwabo becocekile yaye besempilweni kumbandela weentlobano zesini kwabanceda banda ngakumbi ekuzaleni eso sizwe sasikelelwa nguThixo ngesithembiso sempumelelo. (Genesis 15:5; 22:17) Oko kwakubanceda nangokweemvakalelo abantu bakaThixo. Ngokuthobela le mithetho, amadoda nabafazi bafunda ukulawula inkanuko yesini.
Noko ke, undoqo kulo mba yayikukuba, ukuba neentlobano zesini kwezi meko zokungahlambuluki kwakusenza umntu ophe gqitha. Imithetho kaYehova ephathelele igazi yayinganeli nje ukubethelela kumaSirayeli ubungcwele balo kodwa yayibethelela nendima ekhethekileyo yegazi ekunquleni uYehova, ngokwenza amadini nokucamagushela izono.—Levitikus 17:11; Duteronomi 12:23, 24, 27.
Izinto ezichazwe ngeenkcukacha ezazifunwa nguMthetho kule nkalo zaziphathelele ukungafezeki kwabantu. AmaSirayeli ayesazi ukuba emva kokona kwabo, uAdam noEva babengenakuzala abantwana abafezekileyo. Yonke inzala yabo yayiza kuzuza ilifa lesono—ukungafezeki nokufa. (Roma 5:12) Ngenxa yoku, abazali babenokudlulisela ukungafezeki nesono ebantwaneni babo, nakuba amalungu okuzala abantu ayenzelwe ukuzala abantwana abafezekileyo kwilungiselelo lomtshato.
Imfuneko yokucoceka yoMthetho yayingayi kukhumbuza amaSirayeli ngokuba nesono kwawo nje kuphela, yayiza kuwakhumbuza nangemfuneko yedini lentlawulelo lokugubungela izono nokubuyiselwa koluntu emfezekweni. Eneneni ke, amadini ezilwanyana zange akuphumeze oko. (Hebhere 10:3, 4) Injongo yoMthetho kaMoses yayikukuwakhokelela kuKristu nokuwanceda aqonde ukuba lidini lobomi bukaYesu obufezekileyo kuphela elalinokwenza axolelwe ngokwenene, livulele abo bathembekileyo indlela esa kubomi obungunaphakade.—Galati 3:24; Hebhere 9:13, 14.