Ihlabathi Elikhohlakeleyo Lanamhlanje

UMARÍA wayeneminyaka engama-64 ubudala ibe wayehlala yedwa. Wafunyanwa efile emzini wakhe, ebethiwe waza wakrwitshwa ngocingo.

Ihlokondiba elinomsindo labetha amapolisa amathathu, liwatyhola ngokuqweqwedisa amakhwenkwana amabini. Eli hlokondiba lagalela amabini ngepetroli laza lawantumeka ngomlilo, atsha angqongqa. Elesithathu labhunca laba liyasinda.

Umntu othile ongaziwayo watsalela abakwantsasana umnxeba ebabizela kwindawo enombono omanyumnyezi nowothusayo. Kwafunyanwa imizimba yamadoda amane awayeye kubethwa ngumoya kuloo ndawo engcwatywe egadini. Ayevalwe amehlo ebotshelelwe nezandla. Utyando lwatyhila ukuba angcwatywa ephila.

Ezi zenzo zenkohlakalo azingomabali nje enzeka kwiimovie ezinogonyamelo. Ziziganeko zokwenene ezenzeke kutshanje nezaziyimixholo ephambili ezindabeni kwelinye lamazwe akwiLatin America. Sekunjalo, eli asikokuphela kwelizwe ezenzeka kulo ezi zenzo zenkohlakalo.

Izenzo zenkohlakalo yinto yomhla nezolo. Ukuqhushumba kweebhombu, ukuhlaselwa ngabanqolobi, ukuxhatshazwa, ukudutyulwa nokudlwengula zizenzo nje ezimbalwa zenkohlakalo. Mihla le, amajelo eendaba anikela iingxelo zezenzo zenkohlakalo, ibe abantu abaninzi ayisabothusi into yokuva okanye ukubona inkohlakalo enjalo.

Usenokuba uyazibuza: ‘Yintoni eyenzeka ehlabathini namhlanje? Ngaba abantu abasenalo uvelwano ngabanye nentlonelo ngobomi?’ Kutheni siphila kwihlabathi elinje?

Ngoku khawucinge ngoHarry, indoda eneminyaka engama-69 ubudala nenomhlaza. Inkosikazi yakhe inesifo sokuqinelwa yimithambo, kodwa abamelwane nabahlobo babo bayabanceda. UHarry uthi: “Andazi ukuba besiya kuba ngabakabani ngaphandle koncedo lwaba bantu.” EKhanada, apho ahlala khona, uhlolisiso lubonisa ukuba abantu abangaphezu kwama-50 ekhulwini abanyamekela abantu abadala banceda abantu abangezizo izalamane zabo. Akuthandabuzeki ukuba, unabo abantu obaziyo nabaqhelekileyo abadla ngokubonisa ububele benceda abanye. Ewe, abantu bayakwazi ukuba nemfesane nobubele kunokuba bakhohlakale.

Ukuba ke kunjalo, kutheni kukho inkohlakalo engaka? Yintoni eyenza abantu bakhohlakale? Ngaba banokutshintsha abo baphatha abanye ngenkohlakalo? Ngaba inkohlakalo iya kuze iphele? Ukuba kunjalo, iya kuphela njani ibe nini?

[Inkcazelo Ngomfanekiso okwiphepha 3]

Train: CORDON PRESS