Ngaba Inkohlakalo Iya Kuze Iphele?

ABANTU abaninzi bayavuma ukuba ukuzingca ngunobangela oyintloko wenkohlakalo ehlabathini namhlanje. Imbewu eyatyalwa kwiminyaka emininzi eyadlulayo sisizukulwana sikandim phambili iye yavelisa abantu, uninzi lwabo oluxhalabele iziqu zabo. Abaninzi baxolele ukwenza nantoni na ukuze bafumane oko bakufunayo, ibe oko kudla ngokuphumela kwizenzo zenkohlakalo. Oku akupheleli nje ekwenziweni ngumntu omnye kuphela, kukhe kwenziwe nasisizwe xa sisonke.

Ubomi babantu abusaxatyiswanga. Abanye abantu bayakuthanda ukukhohlakala. Kuyabonwabisa, njengezaphuli-mthetho eziye zivume ukuba zenzakalisa abanye ngenjongo yokuzonwabisa. Kuthekani ngezigidi zabantu ezithanda iifilimu ezinogonyamelo nenkohlakalo nto leyo ebangela ukuba abavelisi bezi filimu benze imali eninzi ngazo? Ukusoloko bebona izenzo zenkohlakalo kwezolonwabo nakumajelo eendaba kwenza abaninzi bangabi naluvelwano.

Amaxhoba okuphathwa ngenkohlakalo adla ngokuphazamiseka engqondweni nangokwemvakalelo ibe nawo asenokuphatha abanye ngendlela efanayo. Ethetha ngogonyamelo olubangelwa yinkohlakalo, uNoemí Díaz Marroquín, ofundisa kwiNational Autonomous University of Mexico, uthi: “Ugonyamelo luyafundwa, luyinxalenye yendlela esiphila ngayo . . . Siye sifunde ugonyamelo xa indlela esikhula ngayo ikhuthaza oko.” Ngenxa yoko, abo baye baxhatshazwa nabo basenokuxhaphaza abanye, mhlawumbi ngendlela kanye ababexhatshazwa ngayo.

Kwezinye iimeko, abo basebenzisa kakubi utywala neziyobisi basenokuphatha abanye ngenkohlakalo. Abanye abangamele kulityalwa ngabo bangakholiswayo ngurhulumente ngenxa yokusilela kwiimfuno zabantu. Bezimisele ukuvakalisa iimbono zabo, abanye babhenela kwizenzo zenkohlakalo bekhuthaza ubugrogrisi, ibe oko kudla ngokwenzakalisa abantu abamsulwa.

Noko ke usenokuzibuza: ‘Ngaba abantu baye bazifundela ukuba nenkohlakalo? Yintoni ebangele ukuba babe nje?’

Ngubani Oyena Nobangela Wenkohlakalo?

IBhayibhile isixelela ukuba uSathana uMtyholi unempembelelo enkulu kweli hlabathi, imbiza ngokuba ‘nguthixo wale nkqubo yezinto.’ (2 Korinte 4:4) Ngoyena mntu uzingcayo nokhohlakeleyo kwindalo iphela. UYesu wamchaza kakuhle xa esithi “sisibulala-mntu . . . noyise wabo ubuxoki.”—Yohane 8:44.

Ukususela ekungathobelini kuka-Adam noEva, abantu baye baphantsi kwempembelelo enamandla kaSathana. (Genesis 3:1-7, 16-19) Malunga neenkulungwane ezili-15 emva kokuba abantu bokuqala bemshiyile uYehova, iingelosi ezinemvukelo zazambathisa imizimba yabantu, zalala namabhinqa, zaza zazala amabhastile abizwa ngokuba ziiNefili. Yintoni ezazisaziwa ngayo? Igama lazo lisinika impendulo. Lithetha “abaWisi,” okanye “abo babangela abanye bawe.” Kucacile ukuba, ezi Nefili zazinogonyamelo, zinenkohlakalo nokuziphatha okubi, okwakunokupheliswa nguMkhukula kaThixo kuphela. (Genesis 6:4, 5, 17) Nangona ezi Nefili zatshatyalaliswayo nguMkhukula, ooyise babuyela kummandla womoya baba ziidemon ezingabonakaliyo.—1 Petros 3:19, 20.

Inkohlakalo yezi ngelosi zinemvukelo inokubonwa kwimeko yenkwenkwe eyayinedemon ngomhla kaYesu. Le demon yayibangela ukuba ixhuzule ngokuphindaphindiweyo, iyiphosa emlilweni nasemanzini izama ukuyibulala. (Marko 9:17-22) Kucacile ukuba, ‘imikhosi yoomoya abangendawo’ ayinanceba kanye njengenkokeli yayo ekhohlakeleyo, uSathana uMtyholi.—Efese 6:12.

Namhlanje, impembelelo yeedemon ikhuthaza inkohlakalo ebantwini, njengokuba iBhayibhile yatshoyo isithi: “Ngemihla yokugqibela kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, . . . abazidlayo, abanekratshi, . . . abangenambulelo, abanganyanisekanga, abangenawo umsa wemvelo, abangayifuni kwaphela imvisiswano, abanyelisi, abangenakuzeyisa, iindlobongela, abangathandi kulunga, abangcatshi, abaneentloko ezilukhuni, abakhukhumele likratshi, abathandi beziyolo kunokuba bathande uThixo, benembonakalo yozinikelo lobuthixo kodwa bengaphili ngokuvisisana nalo.”—2 Timoti 3:1-5.

Iziprofeto zeBhayibhile zibonisa ukuba siphila kwixesha lamanqam ngokukhethekileyo kuba emva kokusekwa koBukumkani bukaThixo nguKristu Yesu ngowe-1914, uSathana nomkhosi wakhe weedemon bagxothwa emazulwini. IBhayibhile ithi: “Yeha kuwo umhlaba nakulo ulwandle, ngenxa yokuba uhlile weza kuni uMtyholi, enomsindo omkhulu, esazi ukuba ixesha analo lifutshane.”—ISityhilelo 12:5-9, 12.

Ngaba oku kuthetha ukuba le meko ayinakuze itshintshe? UDíaz Marroquín, okhankanywe ngaphambilana, uthi “abantu banako ukuyiyeka” imikhwa engathandekiyo. Noko ke, ngenxa yokuba namhlanje ihlabathi lizaliswe yimpembelelo kaSathana, kunokuba nzima ukuba ubani ayiyeke le mikhwa ngaphandle kokuba uvumela amandla awahlukileyo naphakamileyo aphembelele indlela acinga nenza ngayo izinto. Ngawaphi la mandla?

Ngaba Kunokwenzeka Ukuba Ubani Atshintshe?

Okuvuyisayo kukuba, umoya oyingcwele kaThixo ngawona mandla makhulu akhoyo, ibe anokoyisa nayiphi na impembelelo yeedemon. Ukhuthaza uthando nempilo-ntle yabantu. Ukuze bazaliswe ngumoya kaThixo, bonke abo bafuna ukukholisa uYehova bamele baphephe ukuba nenkohlakalo. Oku kuquka ukutshintsha ubuntu bethu size siphile ngokuvisisana nokuthanda kukaThixo. Kuyintoni oko kuthanda kwakhe? Kukuba sixelise uThixo kangangoko sinako. Oku kuthetha ukujonga abanye ngendlela uThixo abajonga ngayo.—Efese 5:1, 2; Kolose 3:7-10.

Ukufunda indlela kaThixo yokwenza izinto kuya kukwenza ubone ukuba uYehova akakhe angabi namdla ebantwini. Akazange akhe abaphathe kakubi abantu, nkqu nezilwanyana.a (Duteronomi 22:10; INdumiso 36:7; IMizekeliso 12:10) Uyithiyile inkohlakalo nabo bonke abanayo. (IMizekeliso 3:31, 32) Ubuntu obutsha uYehova afuna amaKristu abuhlakulele buwanceda agqale abanye njengabongamileyo aze abahlonele. (Filipu 2:2-4) Obo buntu butsha bamaKristu buquka “umsa wemfesane, ububele, ukuthobeka kwengqondo, ubulali, nokuzeka kade umsindo.” Enye into engafanele ityeshelwe luthando, “kuba lungumxokelelwane ogqibeleleyo womanyano.” (Kolose 3:12-14) Ngaba akuvumi ukuba umhlaba ubuya kwahluka gqitha ukuba abaninzi bebenezi mpawu?

Noko ke, usenokuzibuza enoba abantu bangakwazi kusini na ukutshintsha ubuntu babo baze bahlale benjalo. Khawukhe uqwalasele lo mzekelo wokwenene. UMartínb wayedla ngokuthetha rhabaxa nomfazi wakhe phambi kwabantwana babo aze ambethe kanobom. Ngesinye isihlandlo, imeko yaba mbi gqitha kangangokuba abantwana babaleka baya kucela uncedo kubamelwane. Emva kweminyaka eliqela, le ntsapho yaqalisa ukufunda iBhayibhile namaNgqina kaYehova. UMartín wafunda indlela yokuziphatha nafanele abaphathe ngayo abanye. Ngaba wakwazi ukutshintsha? Umfazi wakhe uphendula athi: “Ngaphambili, umyeni wam wayesiba ngomnye umntu xa enomsindo. Ngenxa yoku, saphila ubomi bentshontsho ixesha elide. Ndiswele amazwi okumbulela uYehova ngokunceda uMartín atshintshe. Ngoku ungutata nomyeni olungileyo.”

Apha kwenziwe nje umzekelo omnye. Ehlabathini lonke, kukho izigidi zabantu abaye bayeka ukukhohlakala emva kokufunda iBhayibhile namaNgqina kaYehova. Ewe, umntu unako ukutshintsha.

Sekumbovu Ukuba Iphele Inkohlakalo

Kungekudala, uBukumkani bukaThixo—urhulumente osekwe ezulwini onoMlawuli onemfesane, uKristu Yesu—buza kulawula umhlaba ngokupheleleyo. Sele bumlahlele ngaphandle kwamazulu uSathana needemon zakhe, unobangela wayo yonke le nkohlakalo. Kungekudala, uBukumkani bukaThixo buza kwanelisa iimfuno zabo bathandi boxolo baza kulawulwa bubo. (INdumiso 37:10, 11; Isaya 11:2-5) Seso kuphela isicombululo sokwenene seengxaki zehlabathi. Kodwa kuthekani ukuba, ngoxa usalindele obu Bukumkani uphathwa ngenkohlakalo?

Ukuziphindezela akuyi kukunceda nganto. Kunoko kuya kubangela inkohlakalo engakumbi. IBhayibhile isikhuthaza ukuba sikholose ngoYehova, oya kuthi ngexesha lakhe elifanelekileyo ‘anike ngamnye ngokweendlela zakhe, ngokwesiqhamo sezenzo zakhe.’ (Yeremiya 17:10) (Funda ibhokisi ekweli nqaku ethi, “Into Onokuyenza Xa Uphathwa Ngenkohlakalo.”) Yinyaniso ukuba, umntu usenokuba lixhoba lenkohlakalo. (INtshumayeli 9:11) Sekunjalo, uThixo unako ukuwuphelisa nawuphi na umonakalo obangelwe yinkohlakalo, nkqu nokufa. Ngokwesithembiso sakhe, abo bakwinkumbulo yakhe abaye baphulukana nobomi babo ngenxa yezenzo zenkohlakalo baya kubuyela ebomini.—Yohane 5:28, 29.

Nakuba sisenokuba ngamaxhoba enkohlakalo, sithuthuzelwa kukuba nolwalamano oluhle noThixo kunye nokholo olomeleleyo kwizithembiso zakhe. Cinga ngoSara owakhulisa oonyana bakhe ababini ngaphandle kwendoda yakhe waza waqiniseka ukuba bafumana imfundo efanelekileyo. Wathi akwaluphala, bamshiya kwesinomhlwa, bengamniki nesenti okanye bamnyamekele xa egula. Noko ke, uSara, ongumKristu ngoku, uthi: “Nangona ndibuhlungu, uYehova akandishiyanga. Uyandixhasa esebenzisa abazalwana noodadewethu bokomoya, abasoloko bendinyamekela. Ndikholelwa ukuba kungekudala uza kuphelisa kungekhona iingxaki zam kodwa nezabo bakholosa ngamandla akhe basenza oko akufunayo.”

Ngoobani abazalwana noodade bokomoya athetha ngabo uSara? Ngamanye amaKristu, angamaNgqina kaYehova. Angabazalwana abasehlabathini lonke abanemfesane nabaqinisekileyo ukuba kungekudala inkohlakalo iza kuphela. (1 Petros 2:17) Akukho namnye umntu onenkohlakalo oya kusala kuquka oyena nobangela wayo, uSathana uMtyholi. Le “mihla yenkohlakalo,” njengoko omnye umbhali eyibiza njalo, ayisayi kubakho. Kutheni ungaqhagamshelani nomnye wamaNgqina kaYehova uze uhlolisise eli themba?

[Imibhalo esemazantsi]

[Ibhokisi ekwiphepha 6]

Into Onokuyenza Xa Uphathwa Ngenkohlakalo

ILizwi likaThixo linamacebiso aluncedo xa siphathwa ngenkohlakalo. Qwalasela indlela onokuwasebenzisa ngayo la mazwi obulumko alandelayo:

“Musa ukuthi: ‘Ndiya kububuyekeza ububi!’ Thembela kuYehova, yaye uya kukusindisa.”—IMizekeliso 20:22.

“Ukuba ubona kucinezelwa osweleyo, kuhluthwa nesigwebo ngogonyamelo nobulungisa . . . , musa ukuthi manga yiloo nto, kuba ophakame ngakumbi kunalowo uphakamileyo ujongile.”—INtshumayeli 5:8.

“Banoyolo abo banomoya wobulali, kuba baya kuwudla ilifa umhlaba.”—Mateyu 5:5.

“Zonke izinto, ngoko, enifuna abantu bazenze kuni, yenzani ngokunjalo nani kubo.”—Mateyu 7:12.

“Musani ukubuyisela ububi ngobubi nakubani na. Yenzani okuhle emehlweni abantu bonke. Ukuba kunokwenzeka, zamani ngokusemandleni enu, ukuba noxolo nabantu bonke. Musani ukuziphindezelela, zintanda, kodwa yikhweleleni ingqumbo; kuba kubhaliwe kwathiwa: ‘Impindezelo yeyam; kuya kubuyekeza mna, utsho uYehova.’”—Roma 12:17-19.

“Kuba noKristu wabandezeleka ngenxa yenu, enishiya nomzekelo, ukuze nilandele emanyathelweni akhe ngokusondeleyo. . . . Xa wayetshabhiswa, akazange aphindise atshabhise. Xa wayebandezeleka, akazange asongele, kodwa wahlala ezinikele kulowo ugweba ngobulungisa.”—1 Petros 2:21-23.

[Imifanekiso ekwiphepha 7]

UYehova uye wafundisa abaninzi ukuba bayeke ukukhohlakala