Nikela Ingqalelo ‘Kubugcisa Bakho Bokufundisa’
“Lishumayele ilizwi, . . . yohlwaya, khalimela, bongoza, ngako konke ukuzeka kade umsindo nobugcisa bokufundisa.”—2 TIM. 4:2.
1. UYesu wabayalela ukuba benze ntoni abafundi bakhe, yaye wabamisela wuphi umzekelo?
NAKUBA wayesenza imimangaliso, ephilisa abagulayo ngoxa wayelapha emhlabeni, eyona nto wayedume ngayo uYesu kukufundisa. (Marko 12:19; 13:1) Ukuvakalisa iindaba ezilungileyo zoBukumkani bukaYehova kwakuyeyona nto ibalulekileyo kuYesu, ibe kusenjalo nanamhlanje kubalandeli bakhe. AmaKristu athunywe ukuba aqhubeke esenza abafundi, afundise abantu ukuba bazigcine zonke izinto eziyalelwe nguYesu.—Mat. 28:19, 20.
2. Yintoni ekufuneka siyenze ukuze siphumeze uthumo lokushumayela?
2 Ukuze siluphumeze uthumo lokwenza abafundi, kufuneka siqhubeke sizama ukuphucula indlela esifundisa ngayo. Xa wayebhalela uTimoti awayehamba naye kumsebenzi wokushumayela, umpostile uPawulos wabalaselisa ukubaluleka kokuba nobuchule bokufundisa. Wathi: “Zilumkele wena nemfundiso yakho. Hlala kwezi zinto, kuba ngokwenza oko uya kuzisindisa wena nabo bakuphulaphulayo.” (1 Tim. 4:16) Imfundiso awayethetha ngayo uPawulos yayingekokudluliselwa nje kolwazi. Abalungiseleli abangamaKristu abafundisa kakuhle bafikelela iintliziyo zabo babafundisayo baze babakhuthaze ukuba batshintshe indlela abaphila ngayo. Ifuna ubugcisa ke loo nto. Ngoko, sinokubuphucula njani ‘ubugcisa bokufundisa’ xa sishumayela iindaba ezilungileyo zoBukumkani bukaThixo?—2 Tim. 4:2.
Ukuphucula ‘Ubugcisa Bokufundisa’
3, 4. (a) Sinokubuphucula njani ‘ubugcisa bokufundisa’? (b) ISikolo Sobulungiseleli Sobuthixo sisinceda njani ukuba sibe ngabafundisi abanobuchule?
3 Esinye isichazi-magama sithi “ubugcisa,” ‘bubuchule obufunyanwa ngokufunda, ukuqhelisela, nokubukela.’ Kufuneka sinikel’ ingqalelo kwinkalo nganye kwezi ukuze sibe ngabafundisi abaphumelelayo. Ukuze siwuqonde kakuhle umbandela esiza kufundisa ngawo kufuneka siwufunde size siwuthandazele. (Funda INdumiso 119:27, 34.) Xa sibukela indlela abafundisa ngayo abalungiseleli abanobuchule sitsho sivune nto kubo size sibaxelise. Yaye ukuba sisoloko sizabalazela ukuqhelisela oko siye sakufunda kubo, siya kubuphucula ubuchule bethu.—Luka 6:40; 1 Tim. 4:13-15.
4 UYehova nguMyaleli wethu Ozukileyo. Esebenzisa inxalenye ebonakalayo yentlangano yakhe, ubonisa abakhonzi bakhe abasemhlabeni indlela abanokuluphumeza ngayo uthumo abalunikiweyo lokushumayela. (Isa. 30:20, 21) Ngenxa yoku, veki nganye kuwo onke amabandla kuqhutywa iSikolo Sobulungiseleli Sobuthixo, esenzelwe ukunceda bonke ababhalise kuso ukuba babe ngabavakalisi boBukumkani bukaThixo abanobuchule. Eyona ncwadi isetyenziswayo kwesi sikolo yiBhayibhile. LiLizwi likaYehova eliphefumlelweyo elisixelela into emasiyifundise. Ngaphezu koko, libonisa iindlela zokufundisa eziphumelelayo nezifanelekileyo. ISikolo Sobulungiseleli Sobuthixo sisoloko sisikhumbuza ukuba siya kuba ngabafundisi abanobuchule obungakumbi ukuba iimfundiso zethu sizisekela kwiLizwi likaThixo, sifundisa ngendlela ecacileyo size sibe nomdla wokwenene kwabanye. Makhe siziqwalasele ngokwahlukahlukeneyo ezi nkalo. Emva koko siza kuxubusha indlela yokufikelela iintliziyo zabafundi.
Sekela Imfundiso Yakho KwiLizwi LikaThixo
5. Imfundiso yethu ifanele isekelwe entwenini, yaye ngoba?
5 UYesu, oyena mfundisi ubalaseleyo kubo bonke abakhe bakho, wayezisekela kwiZibhalo iimfundiso zakhe. (Mat. 21:13; Yoh. 6:45; 8:17) Wayengathethi izinto eziphuma kuye, kodwa wayethetha egameni laLowo wamthumayo. (Yoh. 7:16-18) Nguloo mzekelo kanye esiwuxelisayo. Ngoko, into esiyithetha kwindlu ngendlu okanye kwizifundo zeBhayibhile ifanele isekelwe kwiLizwi likaThixo. (2 Tim. 3:16, 17) Enokuba siqiqa ngendlela ekrelekrele kangakanani na, asinakufikelela kumandla eZibhalo eziphefumlelweyo. IBhayibhile ligunya lethu. Nayiphi na ingongoma esifuna umfundi ayiqonde, eyona ndlela izodlula zonke kukuba simvumele azifundele ngokwakhe oko kuthethwa ziZibhalo.—Funda amaHebhere 4:12.
6. Umfundisi unokuqiniseka njani ukuba isifundo siyawuqonda umbandela abawufundayo?
6 Noko ke, asithethi kuthi akuyomfuneko ukuba umfundisi ongumKristu alungiselele ngaphambi kokuba aye kuqhuba isifundo seBhayibhile. Ngokwahlukileyo koko, umele acingisise kakuhle ngezibhalo ezicatshuliweyo aza kuzifunda eBhayibhileni xa eqhuba isifundo. Kudla ngokuba kuhle ukuba kufundwe izibhalo ezixhasa iinkolelo zethu. Kubalulekile nokunceda isifundo siqonde isibhalo ngasinye esisifundayo.—1 Kor. 14:8, 9.
Yisebenzise Kakuhle Imibuzo
7. Kutheni ukubuza imibuzo kuyeyona ndlela iluncedo yokufundisa?
7 Ukuyisebenzisa ngobuchule imibuzo kubangela ukuba umntu acinge yaye kunceda umfundisi afikelele intliziyo yomfundi. Ngoko endaweni yokuba uzicacise ngokwakho izibhalo, cela loo mntu umfundelayo azicacise. Maxa wambi kuye kufuneke ubuze umbuzo okanye imibuzo engekhoyo encwadini ukuze uncede isifundo sakho siwuqonde umbandela. Enyanisweni xa usenjenjalo, uyasinceda ukuba sizenzele isigqibo ngoko sikufundayo, kunokusuka samkele nje loo nto isencwadini kuphela.—Mat. 17:24-26; Luka 10:36, 37.
8. Sinokuyiqonda njani into esentliziyweni yomfundi?
8 Iimpapasho zethu zifundisa ngemibuzo neempendulo. Ngokuqhelekileyo, abantu abaninzi ofunda nabo iBhayibhile bazifumana lula iimpendulo zemibuzo xa bezikhangela esiqendwini. Sekunjalo, umfundisi ofuna ukufikelela intliziyo akayi kwaneliswa nje kukuba isifundo siye saphendula ngokuchanileyo. Ngokomzekelo, isifundo sinokukwazi ukukuchaza kakuhle oko iBhayibhile ikutshoyo ngohenyuzo. (1 Kor. 6:18) Noko ke, ukubuza imibuzo echuliweyo kunokukunceda uqonde eyona nto icingwa ngumfundi ngale nto ayifundayo. Ngoko umfundisi unokubuza: “Kutheni iBhayibhile ikugatya ukuba neentlobano zesini ngaphandle komtshato? Ucinga ntoni ngalo mthetho kaThixo? Ucinga ukuba zikho iingenelo esizifumanayo xa siphila ngemilinganiselo kaThixo yokuziphatha?” Indlela ayiphendula ngayo loo mibuzo inokukubonisa oko kusentliziyweni yakhe.—Funda uMateyu 16:13-17.
Fundisa Ngendlela Elula
9. Yintoni esimele siyikhumbule xa sinikela inkcazelo yeZibhalo?
9 Ubukhulu becala inyaniso eseLizwini likaThixo ayikho nzima. Kusenokwenzeka ukuba abantu esifunda nabo iBhayibhile badidekile ziimfundiso zonqulo lobuxoki. Indima yethu njengabafundisi kukwenza iBhayibhile iqondakale lula. Abafundisi abanobuchule bafundisa ngendlela elula, ecacileyo nechanileyo. Ukuba siyalulandela olu lwalathiso, asisayi kuyenza intsonkothe ngokungeyomfuneko inyaniso ebantwini. Masiziphephe iinkcukacha ezingenamsebenzi. Akuyomfuneko ukuba sigqabaze ngayo yonke into ekwisibhalo esisifundileyo. Simele sigxininise nje kuphela koko kuza kuphuhlisa ingongoma esixubusha ngayo. Isifundo siya kuyiqonda ngokuthe ngcembe inyaniso ekwiZibhalo njengoko sisenza inkqubela.—Heb. 5:13, 14.
10. Ziziphi iinkalo ezigqibayo ngobungakanani bombandela ofanele ugutyungelwe xa kuqhutywa isifundo seBhayibhile?
10 Ungakanani umbandela ofanele ugutyungelwe kwisifundo ngasinye? Apha kufuneka ingqiqo. Ubuchule neemeko zomfundi kunye nomfundisi azifani, kodwa masingalibali ukuba injongo yethu njengabafundisi kukunceda umfundi abe nokholo olomeleleyo. Ngoko simnika ixesha elaneleyo lokuba afunde, aqonde aze ayamkele inyaniso yeLizwi likaThixo. Asigubungeli umbandela ongaphezu kwamandla akhe. Kwangaxeshanye, asixhentsi ndawonye. Sakuba isifundo siyibambile ingongoma, sidlulela kwelandelayo.—Kol. 2:6, 7.
11. Sisiphi isifundo esisifumana kumpostile uPawulos ngendlela yokufundisa?
11 Umpostile uPawulos wayeshumayela ngendlela eza kuqondwa lula ngabo basebatsha. Nangona wayefunde wayityekeza, wayekuphepha ukusebenzisa ulwimi oluntsonkothileyo. (Funda Eyoku-1 kwabaseKorinte 2:1, 2.) Abantu abanyanisekileyo bayatsaleleka yaye bayaneliseka yindlela ecace ngayo inyaniso yeZibhalo. Akufuneki umntu ade abe yinkcuba-buchopho ukuze ayiqonde.—Mat. 11:25; IZe. 4:13; 1 Kor. 1:26, 27.
Nceda Izifundo Ziyixabise Into Eziyifundayo
12, 13. Yintoni enokukhuthaza isifundo ukuba senze ngokuvisisana noko sikufundayo? Yenza umzekelo.
12 Ukuze siphumelele, kufuneka sifundise ngendlela echukumisa intliziyo yomfundi. Umele ayiqonde indlela anokuncedwa ngayo nguloo mbandela awufundayo, nendlela obuya kuphucuka ngayo ubomi bakhe xa ethobela ulwalathiso lweZibhalo.—Isa. 48:17, 18.
13 Ngokomzekelo, kusenokwenzeka ukuba sixubusha amaHebhere 10:24, 25, nakhuthaza amaKristu ukuba ahlanganisane ukuze akhuthazane ngeZibhalo aze athandane. Ukuba isifundo asikayi ezintlanganisweni, sinokusithela gqaba-gqaba ngendlela eziqhutywa ngayo nokuba kuza kuxutyushwa ngantoni kwiintlanganiso ezilandelayo. Sinokutsho nokuba iintlanganiso ziyinxalenye yonqulo lwethu yaye mntu ngamnye uyangenelwa kuzo. Emva koko sinokusimema ukuba size kwiintlanganiso. Ukuthobela kwaso imiyalelo yeZibhalo kufanele kubangelwe ngumnqweno esinawo wokuthobela uYehova, kungekhona ukukholisa lowo usifundelayo.—Gal. 6:4, 5.
14, 15. (a) Yintoni enokufundwa sisifundo seBhayibhile ngoYehova? (b) Sinokungenelwa njani isifundo seBhayibhile xa sisazi ubuntu bukaThixo?
14 Eyona ngenelo ifunyanwa zizifundo xa zifunda iBhayibhile zize zenze oko ikutshoyo kukuba ziye zimazi zize zimthande uYehova njengomntu wokwenene. (Isa. 42:8) AkangoBawo onothando, uMdali noMnini wendalo nje kuphela, kodwa ubabonisa ubuntu namandla akhe abo bamthandayo baze bamkhonze. (Funda iEksodus 34:6, 7.) Xa uMoses wayesele eza kukhokela uhlanga lwakwaSirayeli alukhuphe kubukhoboka baseYiputa, uYehova wazichaza ngolu hlobo: “Ndinguye lowo ndiya kuzingqina ndinguye.” (Eks. 3:13-15) Oku kubonisa ukuba uYehova wayeza kuba yiyo nantoni na afuna ukuba yiyo ukuze afeze injongo yakhe ngabantu awayebanyulile. Ngoko amaSirayeli amazi uYehova njengoMsindisi, uMphumi-mkhosi, uMlungiseleli, uMzalisekisi Wezithembiso, nangezinye iindlela.—Eks. 15:2, 3; 16:2-5; Yosh. 23:14.
15 Kusenokwenzeka ukuba abantu esibafundelayo abakabi namava okuzibonela ngokoqobo izinto abazenzelwa nguYehova ebomini babo njengoko kwakunjalo ngoMoses. Sekunjalo, njengoko besiya bekhula elukholweni, bekuxabisa oko bakufundayo baze baqalise ukukusebenzisa ebomini babo, ngokungathandabuzekiyo baya kubona ukuba kufuneka bakholose ngoYehova ukuze abanike inkalipho, ubulumko, aze abakhokele. Njengoko besenjenjalo, nabo baya kumazi uYehova njengoMcebisi onobulumko nonokuthenjwa, uMkhuseli naLowo ubalungiselela zonke izinto eziyimfuneko.—INdu. 55:22; 63:7; IMize. 3:5, 6.
Yiba Nomdla Wokwenene
16. Kutheni ubuchule bemvelo bungeyiyo eyona nto ibalulekileyo ukuze siphumelele njengabafundisi?
16 Xa uvakalelwa kukuba akunabuchule bokufundisa ngendlela obungathanda ngayo, ungatyhafi. NguYehova noYesu abalathisa umsebenzi wokufundisa owenziwayo ehlabathini namhlanje. (IZe. 1:7, 8; ISityhi. 14:6) Banokusikelela imigudu esiyenzayo ukuze oko sikuthethayo kube nemiphumo encumisayo kubantu abaneentliziyo ezinyanisekileyo. (Yoh. 6:44) Ukumthanda ngokunyanisekileyo lowo umfundisayo kunokukunceda naxa ungenabo ubuchule bemvelo. Umpostile uPawulos wabonisa ukuba uyakuqonda ukubaluleka kokuthanda abafundi.—Funda eyoku-1 kwabaseTesalonika 2:7, 8.
17. Sinokuwubonisa njani umdla wokwenene kwisifundo ngasinye?
17 Ngokufanayo, sinokuba nomdla wokwenene kwisifundo ngasinye ngokuzipha ithuba lokusazi kakuhle. Njengoko sixubusha naso iZibhalo, siya kuzazi iimeko esiphila phantsi kwazo. Sisenokufumanisa ukuba sele siphila ngokuvisisana nezinye izinto esizifunde eBhayibhileni. Mhlawumbi kwezinye izinto kusafuneka senze uhlengahlengiso. Xa sinceda isifundo siqonde indlela esinokuyisebenzisa ngayo inkcazelo esiyifumana eBhayibhileni, sinokuba ngumfundi onyanisekileyo kaKristu.
18. Kutheni kubalulekile ukuthandaza nesifundo uze usikhankanye emthandazweni?
18 Okona kubaluleke ngakumbi kukuba sinokuthandaza nesifundo size sisikhankanye emthandazweni. Simele siqonde ukuba injongo yethu kukusinceda simazi uMdali waso, sisondele kuye, size sifumane iingenelo zokhokelo lukaThixo. (Funda INdumiso 25:4, 5.) Xa sicela uYehova ukuba ancede umntu esimfundelayo kwimigudu ayenzayo yokusebenzisa oko akufundileyo, unokutsho aqonde ukubaluleka kokuba ‘ngumenzi welizwi.’ (Yak. 1:22) Yaye njengoko isifundo siphulaphula xa sithandaza ngokunyanisekileyo, naso siya kufunda indlela yokuthandaza. Kuvuyisa ngokwenene ukunceda umfundi weBhayibhile aphucule ulwalamano lwakhe noYehova.
19. Yintoni eza kuxutyushwa kwinqaku elilandelayo?
19 Kuyakhuthaza ukwazi ukuba ehlabathini lonke amaNgqina angaphezu kwezigidi ezithandathu ezinesiqingatha azabalazela ukuba ‘nobugcisa bokufundisa,’ ukuze ancede abantu abaneentliziyo ezinyanisekileyo bagcine zonke izinto abaziyalelwe nguYesu. Umsebenzi wethu wokushumayela uba nayiphi imiphumo? Impendulo yalo mbuzo siza kuyixubusha kwinqaku elilandelayo.
Uyakhumbula Na?
• Kutheni amaKristu efanele ahlakulele ‘ubugcisa bokufundisa’?
• Yiyiphi indlela yokufundisa esinokuyisebenzisa ukuze siphumelele?
• Yintoni enokuba luncedo nakwabo bangenabo ubuchule bemvelo bokufundisa?
[Umfanekiso okwiphepha 9]
Ngaba ubhalisile kwiSikolo Sobulungiseleli Sobuthixo?
[Umfanekiso okwiphepha 10]
Kutheni kubalulekile ukuba ucele isifundo ukuba siyifunde ngokwaso iBhayibhile?
[Umfanekiso okwiphepha 12]
Thandaza nesifundo sakho uze usikhankanye emthandazweni