Imibuzo Yabafundi

Kutheni AmaNgqina KaYehova Engawusebenzisi Umnqamlezo Xa Enqula?

AmaNgqina kaYehova akholelwa kwelokuba ukufa kukaYesu Kristu kwaba yintlawulelo eyavula umnyango wobomi obungunaphakade kwabo banokholo kuye. (Mateyu 20:28; Yohane 3:16) Nakuba kunjalo, awakholelwa ukuba uYesu wafela emnqamlezweni njengokuba kudla ngokuboniswa kweminye imifanekiso. Akholelwa kwelokuba uYesu wafela kwisibonda esime nkqo kungekhona emnqamlezweni.

Umnqamlezo wawusetyenziswa eMesopotamiya kwiminyaka engamawaka amabini ngaphambi kokufika kukaKristu. Kwakukho iminqamlezo eyayikrolwe ematyeni ngamaXesha Obhedu, kwiinkulungwane ngaphambi kokuzalwa kukaYesu. USven Tito Achen umbhali-mbali waseDenmark, oyingcali yemifanekiso ekroliweyo, kwincwadi yakhe ethi Symbols Around Us uthi, aba bahedeni babesebenzisa umnqamlezo “njengomqondiso womlingo . . . ukuze bakhuseleke bafumane namathamsanqa.” Ayimangalisi ke ngoko into yokuba iNew Catholic Encyclopedia isithi: “Umnqamlezo wawusetyenziswa ngaphambi kwexesha lobuKristu nangabahedeni apho ingumqondiso wezinto ezisesibhakabhakeni okanye ezemvelo.” Kutheni ke iicawa zikhetha umnqamlezo njengomqondiso ongcwele?

UW. E. Vine, umphengululi ohlonitshwayo waseBritani, uthi: “Embindini wenkulungwane yesithathu kwiXesha Eliqhelekileyo abahedeni bamkelwa ezicaweni yaye bavunyelwa ukuba basebenzise imifanekiso eqingqiweyo yobuhedeni. Ngoko ke, iTau okanye unobumba omncinane onguT, wamkelwa.”—Vine’s Expository Dictionary of Old and New Testament Words.

OkaVine uhlabela mgama esithi isibizo “umnqamlezo” nesenzi “ukunqamlezisa” sibhekisela “kwisibonda esahlukileyo kumnqamlezo.” Ivumelana noku iOxford University’s Companion Bible ithi: “Ubungqina bubonisa ukuba . . iNkosi yafela esibondeni kungekhona emnqamlezweni.” Licacile elokuba iicawa ziye zamkela isithethe esingasekelwanga eBhayibhileni.

Umbhali-mbali ocatshulwe ngasentla uAchen, uthi: “Kwiinkulungwane ezimbini emva kokufa kukaYesu akunakwenzeka ukuba amaKristu ayesebenzisa umnqamlezo.” Walek’ umsundulu ngokuthi, kumaKristu okuqala umnqamlezo “wawuthetha ukufa okanye ubungendawo njengokuxhonywa kwizizukulwana zamva.”

Okona kubalulekileyo kukuba, kungakhathaliseki ukuba uYesu wabulawa ngantoni awukho umfanekiso oqingqiweyo omele usetyenziswe kunqulo lwamaKristu. IBhayibhile isiyalela isithi: “Sabani kulo unqulo-zithixo.” (1 Korinte 10:14) UYesu wasinika olona phawu lwabalandeli bakhe bokwenyaniso. Wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.”—Yohane 13:35.

Kuzo zonke iinkalo zonqulo lwawo, amaNgqina kaYehova, njengamaKristu enkulungwane yokuqala, azabalazela ukulandela iBhayibhile kunokulandela izithethe. (Roma 3:4; Kolose 2:8) Ngenxa yoko, akawusebenzisi umnqamlezo xa enqula.

[Umfanekiso okwiphepha 22]

Umfanekiso obonisa ukumkani waseAsiriya enxibe umnqamlezo, ecirca ngowama-800 B.C.E.

[Inkcazelo]

Photograph taken by courtesy of the British Museum