Sondela KuThixo
Umbuyiseli Wobomi
NGABA unesalamane esisutywe kukufa? Ukuba kunjalo, uye watyhubela eyona nto ibuhlungu. UMdali wethu uyayiqonda intlungu okuyo. Ngaphezu koko unokuluphelisa ulwamvila lokufa. IBhayibhile, iineengxelo ezininzi zabantu abavusiweyo nto leyo ebonisa ukuba akanguye nje uMniki wobomi kodwa ukwanguMbuyiseli wabo. Makhe sixubushe ngabanye abantu abavuswa nguYesu Kristu uNyana wakhe. Lo mmangaliso ukwincwadi kaLuka 7:11-15.
Kwakungonyaka wama-31 C.E. uYesu wayesiya kwisixeko saseGalili ekuthiwa yiNayin. (Indinyana 11) Kwakusele kuza kurhatyela xa wayesondela kwesi sixeko. IBhayibhile ithi: “Njengoko wayesondela kwisango lesixeko, khangela! nanko kuthwalelwa umntu ofileyo ngaphandle, unyana okuphela kozelweyo ngunina. Ngapha koko, wayengumhlolokazi. Nesihlwele esikhulu esivela esixekweni sasikunye naye.” (Indinyana 12) Ngaba unokuyithelekelela intlungu awayekuyo loo mhlolokazi? Ekufeni kokuphela konyana wakhe, waphulukana nomondli nomkhuseli wakhe isihlandlo sesibini.
UYesu wanikel’ ingqalelo kumama owayesintlungwini, ekunokwenzeka ukuba wayehamba ecaleni kwethala elalithwele umzimba wonyana wakhe ongasekhoyo. Ingxelo ihlabela mgama isithi: “Yathi yakumbona iNkosi, yaba nosizi ngaye, yaza yathi kuye: ‘Musa ukulila.’” (Indinyana 13) UYesu wachukumiseka gqitha yintlungu yalo mhlolokazi. Mhlawumbi wayecinga ngonina, owayesele engumhlolokazi kakade, nowayeza kuba sezintlungwini ezingathethekiyo ngenxa yakhe.
UYesu wasondela kodwa ke wayengezanga kulo mngcwabo. Ngegunya wamisa isihlwele waza ‘wachukumisa ithala.’ Ethetha ngelizwi lomntu onegunya phezu kokufa wathi: “‘ Mfana, ndithi kuwe, Vuka!’ Wavuka umfi wahlala nkqo waza wathetha, wandula ke wamnikela kunina.” (Indinyana 14, 15) Unina walo mfana waphulukana naye esakufa. Xa uYesu “wamnikela kunina,” baba yintsapho kwakhona. Intliziyo yalo mhlolokazi eyayilihlwili yazaliswa luvuyo.
Ngaba ulangazelela ukufumana uvuyo olunjalo—lokuba uphinde udibane nesalamane okanye umhlobo wakho ofileyo? Qiniseka ukuba uThixo uyavelana nawe. Uvelwano olwaboniswa nguYesu kumhlolokazi owayesentlungwini lwabonisa uvelwano analo uThixo, kuba uYesu wabubonisa ngokugqibeleleyo ubuntu bukaYise. (Yohane 14:9) IBhayibhile isifundisa ukuba uThixo ulangazelela ukubabuyisela ebomini kwakhona abafileyo abakwinkumbulo yakhe. (Yobhi 14:14, 15) ILizwi lakhe, iBhayibhile, lisinika ithemba elingummangaliso, lokuphila kumhlaba oyiparadisi size sibone xa kuvuswa abantu bethu esibathandayo. (Luka 23:43; Yohane 5:28, 29) Kutheni ungafundi okungakumbi ngoMbuyiseli wobomi nendlela onokwenza ngayo ukuze ube nelo themba?
[Umfanekiso okwiphepha 23]
“Wavuka umfi wahlala nkqo waza wathetha, wandula ke wamnikela kunina”