“Undikhokelela Kumkhondo Wobulungisa”

Kubalisa uOlga Campbell

Udadewethu uEmily wathi: “Umzekelo omhle unjengentsimbi ebiza abanye abantu ukuba balandele. Wakhalisa intsimbi ndaza ndasabela.” Wabhala watsho xa wayevuyisana nam kuba ndigqibe iminyaka engama-60 kwinkonzo yexesha elizeleyo. Makhe ndikubalisele ngobomi bam ndiselula nesizathu sokuba ndizikhethele ukwenza lo msebenzi ubomi bam bonke.

NDAZALWA ngoJanuwari 19, 1927, kwifama yentsapho yaseUkraine, kufutshane neWakaw, eSaskatchewan, kumbindi ntshona weKhanada. Mna newele lam uBill sasingabantwana besithandathu nowesixhenxe kubantwana abasibhozo. Thina bantwana sasincedisa utata owayesebenza nzima emasimini. Kwelo khaya lethu lincinane umama wayesiqeqesha nangona wayenesifo samathambo esibizwa ngokuba yirheumatoid arthritis yaye ekugqibeleni wasutywa kukufa ngenxa yaso. Wayeneminyaka engama-37 xa itshoba lalal’ umbethe yaye mna ndandineminyaka emine kuphela.

Emva kweenyanga ezintandathu umama eswelekile utata waphinda watshata. Kwakugquba usukuzwano ekubeni ngoku sasinoodadewethu abahlanu abatsha. Ndazama ukumhlonela umama wethu wesibini kodwa kwakunzima kubhuti wethu uJohn.

Ngasekupheleni kweminyaka yee-1930, mna noBill saya kwisikolo samabanga aphakathi ngaloo ndlela sibaleka iingxushungxushu zasekhaya. Ekubeni kwakumbovu ukuba kuqhambuke iMfazwe Yehlabathi II kwakukho umoya wokuthand’ izwe. Utitshala wethu omtsha wathi makukhahlelwe indwe kodwa enye intombazana ayizange ivume. Le ntombazana yayucwa ngabafundi ngezithuko. Kodwa ndachukumiseka yindlela eyayikhaliphe ngayo yaye ndayibuza isizathu sokuba ingayikhahleli. Yandixelela ukuba yayinguMfundi weBhayibhile, njengokuba amaNgqina kaYehova ayedla ngokubizwa ngolo hlobo yaye yona yayimele inyaniseke kuThixo kuphela.—Eksodus 20:2, 3; IZenzo 5:29.

Ukuzimela Ngenkqayi Elangeni

Ngowe-1943 ndafumana umsebenzi ePrince Albert, ndandilayisha yaye ndisothula ilori yeziselo ezibandayo. Ngenxa yokuba ndandikulambele ukutya kokomoya, ndathenga iBhayibhile kodwa kwakunzima ukuyiqonda yaye oku kwakundenza ndicele kule nto yabantwana. Ekuphela kwento endandiyazi ngeBhayibhile yayinguBawo Wethu Osemazulwini.—Mateyu 6:9-13.

Ngenye imini ngeCawa, umnikazimzi endandiqeshe kuye wayezingomb’ isifuba ngokuba eye wagxotha “ibhinqa elalishumayela ngeBhayibhile” endlwini yakhe. Ndandizibuza ukuba, ‘Kutheni ekrwada kangaka?’ KwiiCawa ezimbalwa ezalandelayo ndandingaziva mnandi yaye andizange ndiye ecaweni. Ngaloo mini laphinda lafika ela “bhinqa lalishumayela ngeBhayibhile.”

Landibuza lathi: “Ngaba ukhe uthandaze?”

Ndaphendula ndathi: “Ndikhe ndimenze uBawo Wethu Wasemazulwini.”

Njengokuba lalicacisa intsingiselo yamazwi kaYesu, ndandiphulaphule ngenyameko. Lathi liza kubuya ngoLwesithathu weveki ezayo.

Xa kwafika umnikazimzi endandiqeshe kuye ndamxelela ndichulumancile ‘ngebhinqa elalishumayela ngeBhayibhile’ nelaliliNgqina likaYehova. Umnikazimzi wandityityimbisela umnwe esithi, “Ukuba likhe labeka imicondwana yalo apha ngoLwesithathu, inene, ndiza kunigxotha nobabini apha kwam.”

Ndahamba ndibuzisa kubamelwane ukuba abakhange bambone na uNksk. Rampel owayeliNgqina. Ndamfumana ndaza, ndamxelela ingxaki endandikuyo ndaza ndamcela ukuba andixelele yonke into ayaziyo ngeBhayibhile. Kwakungathi sigubungele ukusuka kwiGenesis ukusa kwiSityhilelo! Wathelekisa imihla yethu nemihla kaNowa, uThixo watshabalalisa ihlabathi elingendawo waza wasindisa uNowa nentsapho yakhe kwihlabathi elicociweyo.—Mateyu 24:37-39; 2 Petros 2:5; 3:5-7, 12.

Emva kwaloo ngxubusho uNksk. Rampel wathi: “Ndiyabona ukuba uzamkele ezi mfundiso zeBhayibhile njengeziyinyaniso. Kwiiveki ezimbini ezilandelayo kuza kubakho indibano yamaNgqina kaYehova yaye umele ubhaptizwe.” Andizange ndibuthi cwe ubuthongo ngaloo ngokuhlwa ndicinga ngazo zonke izinto endizifundileyo. Ukubhaptizwa kwakungathi linyathelo elibalulekileyo. Kodwa ndandifuna ukukhonza uThixo! Nakuba ndandingenalwazi lungako ngeBhayibhile ndabhaptizwa ndineminyaka eli-16 ubudala, ngo-Oktobha 15, 1943.

Ukufudukela EMpuma

NgoNovemba ubhuti wam uFred wandicela ukuba ndisebenze, ndicoca umzi onemigangatho emithathu kwisixeko saseToronto kwimpuma yeKhanada. Ndavuma ndicinga ukuba ndisenokumnqula ngokukhululekileyo uYehova apho. Ngaphambi kokuba ndihambe ndatyelela usis’ Ann owayehlala kufuphi naseSaskatchewan. Wayeneendaba awayefuna ukundixelela zona—yena nomnye udadewethu uDoris babefunda iBhayibhile namaNgqina kaYehova yaye wayefuna nam ndifunde kunye nawo. Nam ndabaxelela ukuba ndiliNgqina elibhaptiziweyo!

Ndahamba nodadewethu omncinane uEmily uhambo olude oluya eToronto. UBill wasiphuthuma kwisikhululo sikaloliwe waza wasisa endlwini ababehlala kuyo noFred noJohn. Ndabuza kuFred ukuba ngubani omnye ohlala nani. Wathi: “Soze uyikholelwe ke le ndiza kukuxelela yona. Usamkhumbula uAlex Reed? Uhlala kwigumbi elingasentla yaye uthe phithi thwanga ngaBafundi beBhayibhile!” Kwakungathi ndibonwa yintoni na nje.

Ndanyuka ngoko nangoko ndaya kuAlex yaye ndalungiselela ukuba siye kwiintlanganiso zebandla kanye ngolo rhatya. Ndandifuna ukuya ngoko nangoko ukuze oobhuti bangazami ukundithintela. Ngokukhawuleza emva koko, ndingekafundelwa nakangako iBhayibhile, ndaya kushumayela okokuqala. Ndandikuthanda ukushumayela ngesiUkraine, ndisebenzisa ulwimi lwam lweenkobe.

UBill wayekuthanda ukufunda iMboniselo, endandizibeka kwigumbi lakhe. Kamva wafudukela kwiBritish Columbia kwintshona yeKhanada yaye ndandimthumelela isipho somrhumo weMboniselo. Nakuba ngokuqhelekileyo engeloncoko wandibhalela ileta enamaphepha alishumi echaza indlela anombulelo ngayo. Ekuhambeni kwexesha wazahlulela kuYehova waza waba ngumveleli ongumKristu onenzondelelo. Kwandivuyisa kakhulu ukubona abantwana bakamama—uBill, uAnn, uFred, uDoris noEmily—besiba ngabakhonzi bakaYehova abazahluleleyo!

NgoMeyi 22, 1945, urhulumente waseKhanada wavula umsebenzi wamaNgqina kaYehova.a Phofu, ndandingazi nokuba umsebenzi wethu uvaliwe de kwenziwa eso saziso. Mna nomhlobo wam uJudy Lukus sangenela inkonzo yexesha elizeleyo njengoovulindlela kummandla othetha isiFrentshi eQuebec. Xa uDoris noEmily beva ukuba singoovulindlela nabo baba ngabo baza bafudukela eVancouver, kwiBritish Columbia kwelinye icala lelizwekazi.

Ukungathandwa Konqulo EQuebec

Andizange ndifudukele eQuebec kuba nje ndithanda. AmaNgqina alapho ayejamelene nentshutshiso ekrakra kumsebenzi wawo wokushumayela.b Sakuvuyela ukusasaza iphecana elalinomxholo othi Quebec’s Burning Hate for God and Christ and Freedom Is the Shame of All Canada. Eso sigidimi sinamandla sakubhenca ukungathandwa kwamaNgqina.

Kangangeeveki ezili-16, sasiqala ngentsimbi yesibini ekuseni ukufaka amaphecana ngaphantsi kweengcango. Sakufika kwenye indlu eqeshisayo safumanisa ukuba amapolisa ayasilandela. Sazimela ukuze singabanjwa. Ngosuku olulandelayo sabuyela ezitratweni ukuze sisasaze iMboniselo noVukani! Emva kweenyanga eziliqela, amapolisa asivalela izihlandlo ezininzi kangangokuba asisakhumbuli ukuba yayizizihlandlo ezingaphi. Ndilungiselela ukulala eziseleni ndandidla ngokuphatha ibrashi yamazinyo ne-eyebrow pencil.

NgoNovemba 1946, uNathan Knorr, owayekhokela umsebenzi wamaNgqina ehlabathini lonke wasityelela evela eBrooklyn, eNew York. Wamema oovulindlela abangama-64 baseQuebec ukuba baye kwiklasi yethoba yeSikolo seBhayibhile seWatchtower saseGiliyadi eSouth Lansing, eNew York. Kwesi sikolo sahlohlwa ngeemfundiso zeBhayibhile iinyanga ezintlanu. Emva kokuphumelela kwesi sikolo ngoAgasti 1947, sathunyelwa kwiidolophu ezahlukeneyo zaseQuebec ukuze siqalise amabandla amatsha.

Imiphumo Emihle Entsimini

Sasingamabhinqa amane aselula awathunyelwa kwisixeko saseSherbrooke. Sasipitiliza isiFrentshi xa sasisiya entsimini naxa sibuya. Ngamanye amaxesha sasingenayo imali yokuthenga ukutya ngoko sasigoduka ukuze sifundisise. Iqabane lam uKay Lindhorst wayeyazi kakuhle imigaqo-ntetho yolwimi. Waqala wandifundisa eyesiNgesi ukuze kube lula ukufunda eyesiFrentshi.

Eyona mbalasane yenkonzo yobuvulindlela yabaseVictoriaville idolophu enabantu abangama-15 000. Kwakunzima ukufumana umntu othetha isiNgesi ngoko lo yayingumhlaba omhle ukuze siphucule isiFrentshi sethu. Iveki yethu yokuqala yayisemagqabini. Kuzo zonke iindawo esasishumayela kuzo abantu babelwamkela uncwadi lwethu. Ekubuyeleni kwethu yonke imizi yayivalwe mba. Kwakutheni?

Umfundisi wasekuhlaleni walumkisa abantu ukuba bangasiphulaphuli. Njengokuba sasingena kwindlu ngendlu abantwana babesilandela besigibisela ngamatye nangekhephu. Kodwa babekho ababefuna ukuva isigidimi seBhayibhile. Ekuqaleni babesivumela ukuba size ngorhatya. Njengokuba babesenza inkqubela kulwazi lweBhayibhile babefunda ekuhleni nakuba babechaswa ngabamelwane babo.

Ngowe-1950 mna nodadewethu satyelela eWakaw. Sabalisa amava kwintlanganiso zebandla. Emva koko, umveleli owongamelayo wathi: “Umama wenu uya kuvuya gqitha xa evuswa aze afumanise ukuba abantwana bakhe ngamaNgqina kaYehova!” Wasixelela ukuba wayefunda neNgqina likaYehova ngaphambi kokuba asweleke. Sayengezelisa iinyembezi zovuyo sakuva ukuba wayefunda iinyaniso zeBhayibhile nesiqinisekileyo ukuba wayeza kusifundisa zona ukuba wayephile ixesha elide.

Ukutshata Nokuba Kunye Enkonzweni

Ngowe-1956, ndadibana noMerton Campbell, iNgqina elalichithe iinyanga ezingama-27 lithothoza entolongweni ngenxa yokungangeneleli kwezopolitika ebudeni beMfazwe Yehlabathi II. Wayesele ekhonze kwikhomkhulu lamaNgqina kaYehova eBrooklyn phantse iminyaka elishumi. UMerton wayeneempawu ezintle zokomoya yaye ndabona ukuba wayeza kuba ngumyeni ofanelekileyo. Sabhalelana iinyanga eziliqela yaye sathandana.

Mna noMerton satshata ngoSeptemba 24, 1960. Bekuluvuyo ukuchitha iminyaka engama-47 edluleyo nendoda yokomoya efana naye. UMerton uye wasebenza iminyaka engama-58 kwiSebe Lenkonzo, esalathisa amabandla amaNgqina kaYehova kulo lonke elaseUnited States. Ngaphezu kweminyaka engama-30 bendihombisa amagumbi eendwendwe zaseBrooklyn yaye kamva neeHolo zeNdibano kummandla wesixeko saseNew York. Ngowe-1995, mna noMerton safudukela kwiZiko Lemfundo LeWatchtower lasePatterson, malunga neekhilomitha ezili-110 kumantla wesiXeko saseNew York.

Ukuhamba kwam ekhaya ndineminyaka eli-12, andizange ndiyicinge into yokuba ndiya kuze ndingqongwe yintsapho enkulu kangaka yokomoya equka abantwana basekhaya. Ndikhangele phambili kwihlabathi elitsha likaThixo axa siya kuhlala nomama simbalisela izinto eziye zenzeka ngoxa yena ebelele—ngakumbi indlela uYehova uThixo aye wasinyamekela ngayo ngokomoya njengabantwana bakhe. Sivuya ngokwenene kuba uYehova ‘usikhokelele kumkhondo wobulungisa.’—INdumiso 23:3.

[Imibhalo esemazantsi]

[Imifanekiso ekwiphepha 27]

Abazali bam nekhaya esasihlala kulo nabantwana basekhaya abasixhenxe

[Umfanekiso okwiphepha 29]

Ndikunye nabantu endandishumayela nabo eOttawa, ngowe-1952

[Umfanekiso okwiphepha 29]

Ndikunye nabantwana basekhaya (ukusuka ekhohlo ukusa ekunene) uAnn, uMary,uFred, uDoris, uJohn, mna, uBill, noEmily

[Umfanekiso okwiphepha 29]

Ndikunye noMerton namhlanje