Idini Lemisa Imvelaphi Yesi Sithethe

EHLABATHINI ngokubanzi abantu benza lo mbhiyozo rhoqo—kungakhathaliseki ukuba zizihlandlo ezininzi kangakanani ngonyaka, ngeveki, okanye suku ngalunye. Nangona kunjalo kuthiwa yimfihlelo yokholo yaye abantu abaninzi abenza lombhiyozo bathi abawuqondi kakuhle. Ujongwa njengongcwele yaye kuthiwa uhambisana nemilingo.

Lo mbhiyozo LiDini LeMisa—inxalenye yeMisa yamaKatolika apho umfundisi ethandazela isonka newayini lize ibandla lithelele uKristu kuMthendeleko Ongcwele.a UPopu Benedict XVI uthi: KumaKatolika, lo mbhiyozo “ngowona ungundoqo wokholo lwethu.” Mvanje, icawa iye yabhiyozela “Unyaka WeDini LeMisa” ngenjongo “yokuvuselela ukholo kwidini lemisa.”

Nkqu namaKatolika aya manqaphanqapha ecaweni ayasixabisa esi sithethe. Ngokomzekelo, kutshanje ibhinqa eliselula nelizinikeleyo kubuKatolika libhalele iphephancwadi iTimes, lathi: “Kungakhathaliseki ukuba ziziphi iinkolelo zobuKatolika esingavisisani ngazo, sisabambelele koko kusimanyanisayo kukholo lobuKatolika: ukuzinikela kwethu ekubhiyozeleni iDini LeMisa.”

Liyintoni iDini LeMisa? Ngaba abalandeli bakaKristu bafanele balibhiyozele? Makhe siqale sihlolisise indlela elabakho ngayo iDini LeMisa. Emva koko, siza kuqwalasela owona mbuzo ubalulekileyo: Ngaba ukubhiyozela iDini LeMisa kukwenza oko uYesu Kristu wathi masikukhumbule kwiminyaka engama-2 000 eyadlulayo?

IDini LeMisa NeNgqobhoko

Akumangalisi ukuva abanye besithi iDini LeMisa linento yokwenza nomlingo. Esona sihlandlo singundoqo seDini LeMisa kuxa kuthandazwa. ICatechism of the Catholic Church ithi ngalo mba: “Amandla namazwi kaKristu namandla oMoya Oyingcwele” zenza umzimba kaYesu negazi lakhe “zibe ngcwele.” Emva kokuba umfundisi etye isonka newayini, umema amarhamente athembekileyo ukuba atye uMthendeleko, ngokuqhelekileyo esidla isonka.

ICawa yamaKatolika ifundisa ukuba isonka newayini ziyaguquka ngokungummangaliso zibe ngumzimba negazi likaKristu ngokoqobo. Le mfundiso yavela ngokuthe ngcembe, yaza yamkelwa ngokusesikweni kwinkulungwane ye-13. Ngexesha LoHlaziyo LwamaProtestanti, iinkalo ezithile zeDini LeMisa yamaKatolika zehliwa amahlongwane. ULuther wayigatya le mfundiso, weza nemfundiso esondeleyo kuleyo. Wafundisa ukuba kunokuba isonka newayini ziguquke zibakho ngaxeshanye nenyama negazi likaYesu.

Ekuhambeni kwexesha, kwabakho ukungqubana kwezimvo phakathi kweemvaba ezahlukeneyo zeNgqobhoko ngokuphathelele intsingiselo yeDini LeMisa, indlela yokulenza nezihlandlo elimele lenziwe ngazo. Nakuba kunjalo esi sithethe siye saqhubeka singundoqo kuzo zonke iicawa zeNgqobhoko. Kodwa yintoni eyamiselwa nguYesu waza wathi simele siyikhumbule?

Ukuqalisa “Kwesidlo SeNkosi Sangokuhlwa”

YayinguYesu ngokwakhe owamisela “Isidlo SeNkosi Sangokuhlwa,” okanye iSikhumbuzo sokufa kwakhe. (1 Korinte 11:20, 24) Noko ke, ngaba uYesu wamisela isithethe apho abalandeli bakhe babeza kutya umzimba wakhe baze basele igazi lakhe?

UYesu wayegqiba kubhiyozela iPasika yamaYuda yaye esandul’ ukugxotha uYuda Skariyoti, umpostile owayeza kumngcatsha. UMateyu, omnye wabapostile abali-11 ababelapho, uthi: “Njengoko babeqhubeka besidla, uYesu wathabatha isonka waza, emva kokucela intsikelelo, wasiqhekeza, wanika abafundi, wathi: ‘Thabathani, nidle. Oku kuthetha umzimba wam.’ Wathabatha nendebe waza, akuba ebulele, wayinika bona, esithi: ‘Selani kuyo, nonke; kuba oku kuthetha “igazi lam lomnqophiso,” eliza kuphalala ngenxa yabaninzi ukuze kuxolelwe izono.’”—Mateyu 26:26-28.

UYesu njengabo bonke abakhonzi bakaThixo, ukuthandaza ngaphambi kokuba atye yayiyinto eqhelekileyo. (Duteronomi 8:10; Mateyu 6:11; 14:19; 15:36; Marko 6:41; 8:6; Yohane 6:11, 23; IZenzo 27:35; Roma 14:6) Ngaba kukho isizathu sokukholelwa ukuba xa uYesu wayethandaza wenza ummangaliso wokuba abalandeli bakhe badle inyama yakhe negazi lakhe?

“Oku kuthetha” Okanye “Nguwo Lo”?

Ezinye iinguqulelo zeBhayibhile ziyiguqulela ngolu hlobo le ndinyana: “Thabathani nidle; ngumzimba wam lo” nokuthi “Selani kuyo nonke, kuba ligazi lam eli.” (Mateyu 26:26-28, IBhayibhile YesiXhosa) Liyinyaniso elokuba igama lesiGrike elisetyenziswe apha linokuthetha ukuthi “yiyo.” Kodwa kwaesi senzi sifanayo sinokuthetha “umqondiso.” Okubangel’ umdla kukuba kwiinguqulelo ezininzi zeBhayibhile esi senzi siye saguqulelwa ngokuthi “lithetha” okanye “limela.”b Umongo usenza sazi eyona ndlela limele liguqulelwe ngayo eli gama. Ngokomzekelo kuMateyu 12:7, igama elithi e·stin liye laguqulelwa ngokuthi “lithetha” kwiinguqulelo ezininzi zeBhayibhile: “Ukuba benisazi okokuba ithetha ukuthini na le ndawo ithi eziBhalweni: ‘Ndithanda inceba andithandi mbingelelo ngeningabagwebanga abangenatyala.”—IBhayibhile YesiXhosa Yowe-1996.

Kulo mba, abaphengululi abaninzi beBhayibhile bayavumelana ngelokuba, ukuguqulela le ndinyana ngokuthi isonka “ngumzimba” okanye iwayini “ligazi” akuyidluliseli ngokuchanileyo ingcamango yamazwi kaYesu. Ngokomzekelo, emva kokuba uJacques Dupont ehlolisise isithethe nebutho labantu uYesu awayephila nalo wagqiba kwelokuba “eyona ndlela iqhelekileyo” yokuguqulela le ndinyana inokuba kukuthi: “Oku kuthetha umzimba wam” okanye “Oku kumela umzimba wam.”

Phofu ke, uYesu wayengenakuze athi kubafundi bakhe bamele batye ngokoqobo inyama yakhe basele negazi lakhe. Ngoba? Emva koMkhukula kaNowa uThixo wathi abantu babenokuyitya inyama yezilwanyana. Akazange abanike imvume yokutya inyama yomntu. Ngaphezu koko, wabayalela abantu ukuba bangalityi igazi. (Genesis 9:3, 4) Lo mthetho waphindwa kwakhona kuMthetho kaMoses nawawuthobela ngokupheleleyo uYesu. (Duteronomi 12:23; 1 Petros 2:22) Abapostile baphefumlelwa ngumoya oyingcwele ukuba bawuphinde kwakhona umthetho wokutya igazi ngaloo ndlela lo mthetho ubophelela onke amaKristu. (IZenzo 15:20, 29) Ngaba uYesu wayeza kusungula isikhumbuzo esasiza kwenza abalandeli bakhe bophule umyalelo ongcwele kaThixo uSomandla? Unotshe!

Licacile elokuba uYesu wasebenzisa isonka newayini njengomfuziselo. Isonka esingenagwele sithetha okanye simela umzimba wakhe ongenasono owawuza kubingelelwa. Iwayini ebomvu yayifuzisela igazi lakhe elaliza kuphalala “ngenxa yabaninzi ukuze kuxolelwe izono.”—Mateyu 26:28.

Injongo YeSidlo SeNkosi Sangokuhlwa

UYesu waqukumbela isikhumbuzo sokuqala seSidlo SeNkosi Sangokuhlwa ngala mazwi: “Hlalani nisenza oku nindikhumbula.” (Luka 22:19) Isikhumbuzo sisinceda sikhumbule uYesu nezinto ezintle ezafezwa kukufa kwakhe. Sisikhumbuza ukuba uYesu waphakamisa ulongamo lukaYise, uYehova. Sikwasikhumbuza ukuba ukufa kukaYesu njengomntu ofezekileyo nongenasono, wanikela “ngomphefumlo wakhe ube yintlawulelo ngenxa yabaninzi.” Idini lentlawulelo lenza bonke abaqhelisela ukholo kulo bakhululwe kwisono baze bafumane ubomi obungunaphakade.—Mateyu 20:28.

Ngokuyintloko iSidlo SeNkosi Sangokuhlwa ngumthendeleko. Ababandakanyekileyo (1) nguYehova uThixo, olungiselele intlawulelo (2) uYesu Kristu, “iMvana kaThixo,” oyintlawulelo (3) nabazalwana bakaYesu bokomoya. Ngokudla isonka nangokusela iwayini, aba bazalwana bakaYesu babonisa ukuba bamanyene ngokupheleleyo naye. (Yohane 1:29; 1 Korinte 10:16, 17) Bakwabonisa ukuba ‘bakumnqophiso omtsha’ njengabafundi bakaYesu abathanjiswe ngomoya. Aba baza kulawula noKristu emazulwini njengookumkani nababingeleli.—Luka 22:20; Yohane 14:2, 3; ISityhilelo 5:9, 10.

Simele senziwe nini iSikhumbuzo? Impendulo icaca ngakumbi xa sikhumbula ukuba uYesu wakhetha usuku oluthile xa wayesungula isikhumbuzo—kwakungePasika. Abantu bakaThixo babesenza isikhumbuzo nyaka ngamnye, ngoNisan 14 kwikhalenda zabo kangangeminyaka eli-1 500 ukuze bakhumbule indlela uYehova awabasindisa ngayo. Licacile elokuba, uYesu wayalela abalandeli bakhe ukuba benze ngolo suku isikhumbuzo esasiza kuba sesona senzo sikhulu sokusindisa kukaThixo ngokufa kukaKristu. Abalandeli bakaYesu bokwenyaniso nyaka ngamnye babakho kwiSidlo SeNkosi Sangokuhlwa ngosuku olungqamana noNisan 14 okwikhalenda yamaHebhere.

Ngaba bakwenza oko kuba bethanda izithethe? Ngeliphandle, yiloo nto ebangela abantu abaninzi balithande iDini LeMisa. Ibhinqa elikhankanywe ngaphambilana elabhalela iphephancwadi iTimes lithi: “Abantu abaninzi bayayoliswa kukuba nenxaxheba kwizithethe zamandulo.” Njengoninzi lwamaKatolika namhlanje, lo mbhali uncomela ukuba lo mbhiyozo uqhutywe ngolwimi lwesiLatin njengangaphambili. Ngoba kutheni? Lithi eli bhinqa: “Ndifuna ukuva iMisa iculwa ngolwimi endingaluqondiyo kuba andithandi ukuva iculwa ngolwimi lwesiNgesi.”

AmaNgqina kaYehova, kunye nezigidi zabantu abanomdla, baqhuba isikhumbuzo seSidlo seNkosi Sangokuhlwa ngolwimi lwabo kungakhathaliseki ukuba bahlala ndawoni. Bayavuyiswa kukuphucula indlela abakuqonda ngayo nabakuxabisa ngayo ukufa kukaKristu. Kufanelekile ukucamngca nokuthetha ngalo nyaniso unyaka wonke. AmaNgqina kaYehova aye afumanisa ukuba ukwenza iSikhumbuzo yeyona ndlela isemagqabini yokukhumbula uthando lukaYehova uThixo noNyana wakhe uYesu Kristu. Siyabanceda ‘bahlale bebhengeza ukufa kweNkosi, ide ifike.’—1 Korinte 11:26.

[Imibhalo esemazantsi]

[Amagama acatshulweyo akwiphepha 27]

Sasinjani isikhumbuzo esasungulwa nguYesu?

[Umfanekiso okwiphepha 28]

UYesu wasungula iSikhumbuzo sokufa kwakhe

[Umfanekiso okwiphepha 29]

Ukwenza iSikhumbuzo sokufa kukaYesu Kristu