UYesu—Bathini Abantu Ngaye?
“UYesu waseNazarete . . . alithandabuzeki elokuba wayengoyena mntu ubalulekileyo embalini.”—UH. G. Wells, umbhali-mbali oliNgesi.
“UKristu . . . wayohluke ngokupheleleyo kuwo onke amaqhawe ekuthethwa ngawo embalini.”—UPhilip Schaff, umbhali-mbali okwangumfundisi wezakwalizwi waseSwitzerland.
NGUBANI okufanelekelayo ukubizwa ngokuba ngoyena mntu ubalaseleyo wakha waphila? Unokumbona njani umntu obalaseleyo? Ngokuba ngusomaqhuzu kwezemfazwe? Ngokuba sisigantsontso? Ngokuba krelekrele? Okanye ngaba unokumbona kwindlela amazwi nezenzo zakhe, ezibaphembelela ngayo abantu kwanakumzekelo awumiselayo?
Phawula oko kuye kwathethwa ngababhali-mbali, izazinzulu, abaphengululi, ababhali, iinkokeli zezopolitiko, nangabanye abantu—mandulo nakweli xesha lethu—ngendoda yaseNazarete, uYesu Kristu:
“Noko ke, bekuya kufuneka ube nezibakala ezivakalayo ukuze uphikise elokuba oyena mntu unempembelelo engenakuthelekiswa nanto—kungekhona nje kule minyaka engamawaka amabini edluleyo, kodwa kuyo yonke imbali yoluntu—nguYesu waseNazarete.”—UReynolds Price, umbhali nomphengululi weBhayibhile waseMerika.
“Indoda eyayingenatyala yazinikela njengedini ukuze kulungelwe abanye, kuquka iintshaba zayo, yaza yaba yintlawulelo yehlabathi. Esi yayisisenzo esigqibeleleyo.”—UMohandas K. Gandhi, inkokeli yaseIndiya yezopolitiko nonqulo.
“Ngoxa ndandisengumntwana, ndandifundiswa iBhayibhile neTalmud. NdingumYuda, kodwa ndithabathekile ngulo mntu ubalaseleyo waseNazarete.”—UAlbert Einstein, isazinzulu esiyinzalelwane yaseJamani.
“Kum uYesu Kristu ngoyena mntu ubalaseleyo kuyo yonke imbali yoluntu, njengoNyana kaThixo nanjengoNyana woMntu. Yonke into awayithethayo nawayenzayo ibalulekile kuthi namhlanje, yaye akakho omnye umntu ekunokuthethwa ngolo hlobo ngaye, ophilayo okanye ofileyo.”—USho·lem Asch, umbhali wezincoko wasePoland ocatshulwe kwiChristian Herald; akekeliswe ngabo.
“Kwiminyaka engama-35 yokudla kwam ubomi, kwakungekho nto ndiyikholelwayo. Kule minyaka mihlanu idluleyo ndiye ndeyiseka kwelokuba uYesu wayengengomntu wasentsomini. Ndakholelwa kwiimfundiso zikaYesu Kristu, baza ubomi bam batshintsha ngesiquphe.”—UCount Leo Tolstoy, umbhali wamabali nentanda-bulumko yaseRashiya.
“[UYesu] ngoyena mntu wayenempembelelo enkulu owakha waphila kwesi sijikelezi-langa yaye usabaphembelela abantu abaninzi nanamhlanje.”—UKenneth Scott Latourette, umbhali-mbali waseMerika.
“Ngaba sifanele sicinge ukuba imbali ekwiincwadi zevangeli yintsomi nje? Unotshe, akukho nento le ebonisa loo nto. Ngokwahlukileyo koko, imbali kaSocrates, ekungekho mntu unobuganga bokuyithandabuza, ayinabo ubungqina obufana nobukaYesu Kristu.”—UJean-Jacques Rousseau, intanda-bulumko yaseFransi.
Licacile elokuba, oyena mntu sifanele simxelise ebomini,nguYesu Kristu. UPawulos, isifundiswa senkulungwane yokuqala esanyulwa nguYesu ukuba sibe ngumlandeli wakhe yaye sithethe ngaye ezintlangeni, wasibongoza ukuba “sikhangele ngenyameko” kuYesu. (Hebhere 12:2; IZenzo 9:3) Yintoni esinokuyifundiswa nguYesu ngendlela esimele siphile ngayo? Unokungenelwa njani kwindlela awayephila ngayo?