Unganyamezela Njani Kubulungiseleli?
NGABA wakha waziva udiniwe kangangokude ufune ukuwuyeka umsebenzi wokushumayela? Inkcaso ekrakra, ixhala, impilo enkenenkene, ingcinezelo yoontanga, okanye ukungasamkeli kwabantu isigidimi sethu kungaluvavanya unyamezelo lwethu. Kodwa ke, khawucinge nje ngomzekelo kaYesu. Wanyamezela olona vavanyo lunzima “ngenxa yovuyo olwalubekwe phambi kwakhe.” (Heb. 12:2) Wayesazi ukuba xa engqina izityholo ezingoThixo zingeyonyaniso, wayesenza intliziyo kaYehova ibe nemihlali.—IMize. 27:11.
Xa unyamezela kubulungiseleli, nawe ungayenza ibe nemihlali intliziyo kaYehova. Kodwa, kuthekani ukuba kukho imiqobo ekwenza uzive umadolw’ anzima ukushumayela? UKrystyna, osele emdala ngeminyaka yaye onempilo enkenenkene, uthi: “Ndikhe ndizive ndidiniwe yaye ndingenathemba. Iingxaki ezihambelana nokukhula, njengempilo enkenenkene namaxhala obomi bemihla ngemihla ziyandiphazamisa kwinkonzo yam.” Unganyamezela njani kubulungiseleli phantsi kwezi ngxaki?
Xelisa Abaprofeti
Ukuze banyamezele kumsebenzi wokushumayela, abavakalisi abanyanisekileyo boBukumkani bangazabalazela ukuba nesimo sengqondo esifanayo nesabaprofeti bamandulo. Ngokomzekelo, cinga ngoYeremiya. Xa wabizelwa ukuba ngumprofeti, waqala wamathidala ukusamkela esi sabelo. Kodwa, uYeremiya wakwazi ukunyamezela umsebenzi wakhe onzima kangangeminyaka engaphaya kwama-40 ngenxa yokuba wafunda ukuthembela kuThixo ngokupheleleyo.—Yer. 1:6; 20:7-11.
Umzekelo kaYeremiya uyamomeleza uHenryk. Uthi: “Ebudeni bama-70 eminyaka ndikubulungiseleli, ngamaxesha athile bendiye ndidinyazwe yindlela abantu abasabela ngayo—ukuchaswa okanye ukungabi namdla kwabo. Ngamaxesha anjalo, ndiye ndizikhumbuze ngomzekelo kaYeremiya. Uthando lwakhe ngoYehova nokomelela kwakhe ngokomoya okwamkhokelela ekubeni aqhubeke eprofeta.” (Yer. 1:17) Omnye oye womelezwa ngumzekelo kaYeremiya nguRafal. Uthi: “Kunokuba anikele ingqalelo kuye nakwiimvakalelo zakhe, uYeremiya wathembela kuThixo. Waqhubeka ngenkalipho nangona wayechaswa ngokukrakra. Ndizama ukuhlala ndikukhumbula oko.”
Omnye umprofeti ongumzekelo wokunyamezela ngokuqhubekayo kubulungiseleli nguIsaya. UThixo wamxelela ukuba abantu bakowabo babengayi kumphulaphula. UYehova wathi: “Yenza intliziyo yesi sizwana ibe lukhuni, neendlebe zaso zenze zithi nkqi.” Ngaba uIsaya wayengenakuze aphumelele? UThixo wayengacingi ukuba kuza kuba njalo! Xa wathunywa njengomprofeti, wathi: “Ndikho! Thuma mna.” (Isa. 6:8-10) UIsaya wanamathela kuthumo lwakhe. Ngaba yindlela osabela ngayo leyo kumyalelo wokushumayela?
Ukuze sinyamezele kubulungiseleli nangona abantu bengasabeli, kanye njengoIsaya, kufuneka singanikeli ingqalelo kwinkcaso esinokudibana nayo. URafal uhlangabezana ngolu hlobo nokudimazeka: “Ndizama ukuba ndingakufaki engqondweni ukuthukwa ngabantu. Abantu endishumayela kubo banokuphendula nangayiphi na indlela abafuna ngayo.” UAnna waleka ngelithi: “Andibe ndicingana nezinto eziza kundidimaza. Into endincedayo kukuthandaza ndize ndihlolisise itekisi yosuku ngaphambi kokuya entsimini. Naziphi na iingcinga ezidimazayo zikhawuleza zimke.”
Umprofeti uHezekile wasebenza phakathi kwamaYuda angoontamo-lukhuni awayethinjelwe eBhabhiloni. (Hez. 2:6) Ukuba lo mprofeti wayenokungabaxeleli abantu amazwi kaThixo baze abangendawo kubo bafe bengalunyukiswanga, wayeya kuba netyala. UYehova wathi kuHezekile: “Igazi lakhe ndiya kulibiza esandleni sakho.”—Hez. 3:17, 18.
UHenryk uzama ukujonga izinto njengoHezekile xa esithi: “Ndifuna ukuba msulwa egazini labantu bonke. Ubomi babantu obuxabisekileyo busemngciphekweni.” (IZe. 20:26, 27) UZbigniew uvakalelwa ngokufanayo: “Kwafuneka aqhubele phambili uHezekile nokuba abanye babecinga ntoni. Oku kuyandinceda ukuba ndijonge umsebenzi wokushumayela ngendlela uMdali awujonga ngayo.”
Akuwedwa
Akuwedwa emsebenzini wokushumayela. Njengompostile uPawulos, sinokuthi: “Singabasebenzi abangamadlelane kaThixo.” (1 Kor. 3:9) UKrystyna, othi ukhe adimazeke maxa wambi, uthi: “Kungeso sizathu ndiqhubeka ndimbongoza uYehova ndicela amandla. Akazange andiphoxe.” Sikufuna ngokwenene ukuxhaswa ngumoya kaThixo kubulungiseleli bethu!—Zek. 4:6.
Xa sikwinkonzo yasentsimini, umoya oyingcwele uyasinceda sibonakalise “isiqhamo somoya.” (Gal. 5:22, 23) Oko kusinceda sinyamezele kumsebenzi wokushumayela, enoba kwenzeka ntoni. UHenryk uthi: “Ukuya kushumayela kundinceda ndiphucule ubuntu bam. Ndifunda ukuba nomonde, ukucingela abanye nokunganikezeli ngokukhawuleza.” Ukunyamezela kubulungiseleli phantsi kwemiqobo eyahlukahlukeneyo kuya kukunceda usihlakulele ngakumbi isiqhamo somoya.
UYehova ukhokela lo msebenzi ukhethekileyo, esebenzisa iingelosi zakhe. (ISityhi. 14:6) IBhayibhile isixelela ukuba kukho “amashumi amawaka aphindwe ngamashumi amawaka namawaka amawaka” ezi zidalwa zomoya. (ISityhi. 5:11) Phantsi kolwalathiso lukaYesu, iingelosi zixhasa abakhonzi bakaThixo abasemhlabeni. Ngaba uhlala uyikhumbula loo nto ngalo lonke ixesha usentsimini?
UAnna uthi: “Ukucamngca ngesibakala sokuba iingelosi zikunye nathi kubulungiseleli kulukhuthazo kum. Ndiyaluxabisa uncedo ezilunikelayo zisalathiswa nguYehova noYesu.” Kulilungelo ngokwenene ukusebenza neengelosi ezithembekileyo!
Kuthekani ngabanye abavakalisi boBukumkani? Kuyintsikelelo ukwazi isihlwele esikhulu samaNgqina athembekileyo. Ngokuqinisekileyo ububonile ubunyaniso bomzekeliso weBhayibhile othi: “Intsimbi, ilolwa ngentsimbi. Ngoko umntu ulola ubuso bomnye.”—IMize. 27:17.
Ukusebenza nabanye kubulungiseleli kusinika ithuba elihle lokubona iindlela ezahlukahlukeneyo eziphumelelayo nezisenokuba zintsha kuthi. UElizbieta uthi, “Ukusebenza nabavakalisi abahlukahlukeneyo kundinika amathuba okubonakalisa uthando kwamanye amaKristu nakubantu esidibana nabo.” Zama ukusebenza nabavakalisi abahlukahlukeneyo entsimini. Uya kufumana imiphumo namava abangela umdla.
Zinyamekele Kakuhle
Ukuze sigcine ihlombe kubulungiseleli bethu, kufuneka silungiselele size sicebe kakuhle, sibe nocwangciso oluhle lofundisiso size siphumle ngokwaneleyo. Ngamany’ amazwi, kufuneka sinyamekele ulwalamano lwethu noYehova kwakunye nemizimba yethu.
IBhayibhile ithi: “Amacebo okhutheleyo ngokuqinisekileyo ayingenelo.” (IMize. 21:5) UZygmunt, oneminyaka engama-88 ubudala, uthi: “Ukuba nocwangciso oluhle lokushumayela kundinceda ndibe nemveliso. Ndizilungelelanisa kakuhle izinto ukuze ndibe nexesha elaneleyo lokushumayela.”
Ulwazi oluchanileyo ngeZibhalo luyasomeleza yaye lusixhobisela ubulungiseleli. Njengokuba kufuneka sitye ukuze siqhubeke siphila, kufuneka sizondle ngokuthe rhoqo ngokutya kokomoya ukuze siqhubeke sishumayela. Ukuzondla ngeLizwi likaThixo yonke imihla nokutya ‘ukutya okufike ngexesha elifanelekileyo’ kuya kusixhobisela ubulungiseleli.—Mat. 24:45-47.
UElizbieta uye watshintsha izinto eziliqela ebomini bakhe ukuze aphucule ubulungiseleli bakhe. Uthi: “Ndiye ndalicutha gqitha ixesha endilichitha ndibukele umabonwakude ukuze ndikwazi ukuwulungiselela kakuhle umsebenzi wokushumayela. Xa ndifunda iBhayibhile ngengokuhlwa nganye, ndiye ndicinge ngabantu endiye ndadibana nabo entsimini. Ndiye ndikhangele izibhalo namanqaku anokubanceda.”
Ukuphumla ngokwaneleyo kuya kukunceda uhlale womelele yaye kuya kukwenza ube nenxaxheba engakumbi kubulungiseleli. Kwelinye icala, ukuchitha ixesha elininzi ekuzihlaziyeni kunokuwuphazamisa umsebenzi wakho. UAndrzej, umvakalisi onenzondelelo, uthi: “Ukungaphumli ngokwaneleyo kunokubangela ukuba ube yimfe kukudinwa, yaye kunokuba lula ukuba udimazeke. Ndenza konke okusemandleni ukuba ndikuphephe oko.”—INtshu. 4:6.
Sele senze loo migudu, bambalwa abantu abazixabisayo iindaba ezilungileyo. Kodwa, uYehova akasoze awulibale umsebenzi wethu. (Heb. 6:10) Nokuba uninzi lwabantu alufuni kuthetha nathi, lusenokuthetha ngotyelelo lwethu emva kokuba simkile. Iziphumo zisenokuba njengezo sizifundayo ngokuphathelele uHezekile: Abantu “ngokuqinisekileyo baya kwazi . . . ukuba bekukho umprofeti phakathi kwabo.” (Hez. 2:5) Liyinyaniso elokuba, ubulungiseleli bethu abuyondlwan’ iyanetha, kodwa buluncedo gqitha kuthi nakwabo basiphulaphulayo.
UZygmunt uthi: “Ukuba nenxaxheba kubulungiseleli kusinceda sambathe ubuntu obutsha size sibonakalise ukuba sithanda uThixo nabamelwane bethu.” UAndrzej waleka ngelithi: “Kulilungelo ukuba nenxaxheba kulo msebenzi usindisa ubomi. Awusayi kuphinda wenziwe ngalo mkhamo okanye phantsi kweemeko ezifanayo.” Nawe ungavuna iintsikelelo eziyintabalala ngokunyamezela kubulungiseleli namhlanje.—2 Kor. 4:1, 2.
[Imifanekiso ekwiphepha 31]
Ukunyamekela ulwalamano lwethu noYehova nemizimba yethu kusinceda sinyamezele kubulungiseleli