Ukuzila Ukutya—Ngaba Kukusondeza KuThixo?

‘Ukuzila ukutya kuya kunceda ucamngce ngezinto zokomoya kuze kukukhumbuze ukuba izinto eziphathekayo ayizezona zinto zibalulekileyo ebomini.’—KUTSHO OMNYE UMFAZI WOMKATOLIKA

‘Ukuzila ukutya kukunceda unxibelelane noThixo ngokomoya.’—KUTSHO URABHI ONGUMYUDA.

‘Kwinkonzo yethu kunyanzelekile ukuba sizile ukutya, yeyona ndlela yokubonisa ukuzinikela kwam nokuba nombulelo kuThixo. Ndizila ukutya kuba ndimthanda uThixo.’—KUTSHO IBHINQA ELINGUMLANDELI KABAHÁ’I.

UKUZILA ukutya kuqhelekile kwiinkonzo ezininzi zehlabathi, eziquka ubuBhuda, ubuHindu, ubuSlamsi, ubuJainism nobuYuda. Abantu abaninzi bakholelwa ukuba ukuzila ukutya kangangexesha elithile kusondeza umntu kuThixo.

Ucinga ntoni wena? Ngaba ufanele uzile ukutya? Lithini iLizwi likaThixo iBhayibhile ngalo mba?

Ukuzila Ngamaxesha Okubhalwa KweBhayibhile

Ngamaxesha okubhalwa kweBhayibhile, abantu babezila ukutya ngenxa yezizathu ezahlukahlukeneyo ezazivunyelwe nguThixo. Abanye babezila xa bebuhlungu kakhulu okanye beguqukile kwizono zabo (1 Samuweli 7:4-6), becela uncedo lukaThixo, befuna ukhokelo lwakhe (ABagwebi 20:26-28; Luka 2:36, 37), okanye akwazi ukunikela ingqalelo ngoxa ecamngca.—Mateyu 4:1, 2.

Noko ke, iBhayibhile ithetha ngokuzila ukutya awayengakholiswa kuko uThixo. Ukumkani uSawule wazila ngaphambi kokuba aye egqirheni. (Levitikus 20:6; 1 Samuweli 28:20) Abantu abangendawo, abanjengoIzebhele nabanye ababenenzondelelo egqithiseleyo ababefuna ukubulala uPawulos, bazila ukutya. (1 Kumkani 21:7-12; IZenzo 23:12-14) AbaFarisi babesaziwa nanguthathatha ngokuthanda ukuzila ukutya. (Marko 2:18) Kodwa ke, wabagxeka uYesu, yaye noThixo akazange akholiswe ngabo. (Mateyu 6:16; Luka 18:12) Ngendlela efanayo, akazange akholiswe uYehova kukuzila ukutya kwamaSirayeli athile ngenxa yehambo neentshukumisa zawo ezingafanelekanga.—Yeremiya 14:12.

Le mizekelo ibonisa ukuba asikokuzila ngokwako okumkholisayo uThixo. Noko ke, uThixo waye wakholiswa luninzi lwabakhonzi bakhe abanyanisekileyo abaye bazila ukutya. Ngaba amaKristu afanele azile ukutya?

Ngaba AmaKristu Anyanzelekile Ukuba Azile Ukutya?

Umthetho kaMoses wawufuna amaYuda ‘ayixhwalekise imiphefumlo [yawo],’ oko kwakuthetha ukuba, ayemele azile ukutya, kanye ngonyaka ngoMhla woCamagushelo. (Levitikus 16:29-31; INdumiso 35:13) Yayikoku kuzila ukutya kuphela uYehova ayalela abantu bakhe ukuba bakwenze.a AmaYuda awayephila ngaphantsi koMthetho kaMoses afanele ukuba awuthobela loo myalelo. Kodwa amaKristu wona awanyanzelekanga ukuba agcine uMthetho kaMoses.—Roma 10:4; Kolose 2:14.

Nangona kubonakala ukuba uYesu wakuzila ukutya ngokuvisisana noMthetho, wayengadumanga ngokuthanda ukuzila ukutya. Wafundisa abafundi bakhe indlela ababefanele baziphathe ngayo xa bekhethe ukuzila ukutya, kodwa akazange abayalele ukuba bazile ukutya. (Mateyu 6:16-18; 9:14) Kwakutheni ukuze uYesu athi abafundi bakhe babeza kuzila ukutya emva kokuba efile? (Mateyu 9:15) Lo yayingengomyalelo. Amazwi kaYesu abonisa ukuba abafundi bakhe babeza kuba buhlungu emva kokuba efile nto leyo eyayiza kubenza bangakucaceli ukutya.

Iingxelo ezimbini zeBhayibhile zamaKristu enkulungwane yokuqala awazila ukutya zibonisa ukuba xa umntu ezila ukutya ngesizathu esifanelekileyo, oko kwamkelekile kuThixo. (IZenzo 13:2, 3; 14:23)b Ngoko ke, amaKristu akanyanzelekanga ukuba azile ukutya. Kodwa ke xa umntu efuna ukuzila ukutya ufanele azazi ingozi ezinokubakho.

Zazi Iingozi Zokuzila Ukutya

Enye yeengozi zokuzila ukutya kukuba kunokwenza ubani azibone elilungisa. IBhayibhile isilumkisa ukuba singabi “nentobeko yenkwalambisa.” (Kolose 2:20-23) Umzekeliso kaYesu womFarisi onekratshi owayecinga ukuba ubhetele kunabanye abantu ngenxa yokuba wayesoloko ezila ukutya wenza kucace ukuba akasithandi isimo sengqondo esinjalo uThixo.—Luka 18:9-14.

Bekuya kuba yimpazamo nokuyipapasha into yokuba wena uzila ukutya, okanye ukukuzila kuba uyalelwe ngomnye umntu. Ngokutsho kukaMateyu 6:16-18, uYesu wathi ukuzila ukutya kufanele kwenziwe emfihlekweni phakathi kwakho noThixo, yaye ungabaxeleli abanye ukuba uzile ukutya.

Akukho nabani na ofanele acinge ukuba ukuzila ukutya sisingxengxezo sokona. Ukuze ukuzila ukutya kwamkeleke kuThixo, kufanele kuhambisane nokuthotyelwa kwemithetho yakhe. (Isaya 58:3-7) Kukuguquka ngokunyanisekileyo kungekhona ukuzila ukutya okwenza izono zixolelwe. (Yoweli 2:12, 13) IBhayibhile igxininisa ukuba uYehova usixolela ngenxa yobubele bakhe obungasifanelanga obabonakaliswa ngedini likaKristu. Izono azinakuxolelwa ngenxa yemisebenzi, kuquka nokuzila ukutya.—Roma 3:24, 27, 28; Galati 2:16; Efese 2:8, 9.

UIsaya 58:3 uthetha nangenye impazamo abaqhele ukuyenza abantu. AmaSirayeli ayecinga ukuba uYehova wayefanele awabuyekeze xa eye azila ukutya, ngokungathi wayewatyala. Abuza esithi: “Kungasiphi na isizathu esathi sazila ukutya waza akwabona, saxhwalekisa imiphefumlo yethu waza wena akwaphawula nto?” Nanamhlanje baninzi abacinga ukuba xa beye bazila ukutya uThixo ufanele abahlawule ngento ethile. Ngamana singangaze sibe nesimo sengqondo esidelelayo nesichasene nezibhalo ngolo hlobo!

Abanye bakholelwa ukuba banokumkholisa uThixo xa bezivisa ubuhlungu ngokuzila ukutya, ngokuzityakatya okanye benze ezinye zezinto ezifana nezo. ILizwi likaThixo liyayigxeka loo nto, libonisa ukuba “ukuzivisa ubuhlungu akunakuyoyisa iminqweno yenyama.”—Kolose 2:20-23.

Imbono Elungeleleneyo

Ukuzila ukutya akunyanzeliswa yaye akuphosakalanga. Kunokuba luncedo maxa wambi ukuba iingozi ezikhankanywe ngasentla ziye zaphetshwa. Noko ke, ukuzila ukutya akuyiyo eyona nto ibalulekileyo ukuze unqulo lwethu lwamkeleke. UYehova ‘nguThixo onoyolo,’ yaye ufuna abakhonzi bakhe bonwabe. (1 Timoti 1:11) ILizwi Lakhe lithi: “Akukho nto ilunge ngakumbi kulo kunokuba . . . wonk’ umntu ufanele adle, asele aze ngokwenene abone okulungileyo kuko konke ukusebenza kwakhe nzima. Sisipho sikaThixo eso.”—INtshumayeli 3:12, 13.

Eyona nto ifanele ibalasele kunqulo lwethu luvuyo, kodwa iBhayibhile ayizange ikhe inxulumanise ukuzila ukutya novuyo. Ngaphezu koko, ukuba ukungatyi kwenza buthathaka impilo yethu kuze kusenze singabi nawo amandla afunekayo okwenza umsebenzi ovuyisayo uMenzi wethu awuphathise amaKristu—ukushumayela iindaba ezilungileyo zoBukumkani—ibiya kuba kukuqhwayel’ emva oko.

Enoba sizila ukutya okanye asikuzili kodwa kufuneka sikuphephe ukubagweba abanye. AmaKristu okwenyaniso akafanele anikele ingqalelo kakhulu kuloo mbandela, “kuba ubukumkani bukaThixo abuthethi kutya nakusela, kodwa buthetha ubulungisa noxolo novuyo ngomoya oyingcwele.”—Roma 14:17.

[Imibhalo esemazantsi]

[Amagama acatshulweyo akwiphepha 28]

AbaFarisi babenokuthobeka kwenkwalambisa xa bezile ukutya

[Amagama acatshulweyo akwiphepha 29]

“. . . Ubukumkani bukaThixo abuthethi kutya nakusela, kodwa buthetha ubulungisa noxolo novuyo ngomoya oyingcwele.”

[Ibhokisi ekwiphepha 29]

Kuthekani NgeLente?

Kuthiwa ukuzila ukutya iintsuku ezingama-40 ekuthiwa yiLente kusisikhumbuzo sokuzila ukutya iintsuku ezingama-40 okwenziwa nguKristu. Sekunjalo, uYesu akazange ayalele abafundi bakhe ukuba bakwenze oko yaye akukho bungqina bokuba bakhe bayenza loo nto. Ukuzila ukutya iintsuku ezingama-40 ngaphambi kwePasika kuthethwa ngako okokuqala kwileta ka-Athanasius, eyabhalwa ngowama-330 C.E.

Ekubeni uYesu wazila ngaphambi kokuba abhaptizwe kungekhona ngaphambi kokuba afe, isibakala sokuba ezinye iinkonzo zibhiyozela iLente ngaphambi kwePasika sinokuthandabuzisa. Noko ke, mandulo amaBhabhiloni, amaYiputa namaGrike ayezila ukutya iintsuku ezingama-40 ekuqaleni konyaka. Kuyabonakala ke ukuba eli siko “lamaKristu” livela apho.