Ukuzigcina Ndixakekile Entlanganweni KaYehova

Kubalisa uVernon Zubko

NDAKHULELA kwifama engaseStenen, ilali ekwiphondo laseSaskatchewan, eKhanada. Abazali bam, uFred noAdella, bazibhokoxa ekusinyamekeleni ngokomoya nangezinto eziphathekayo, mna nodadewethu omdala uAurellia nabantwana basekhaya abeza emva kwam uAlvin, uAllegra noDaryl. Kude kube namhlanje sisenombulelo kubazali bethu ngokusifundisa inyaniso.

UTata, owayengumKristu othanjisiweyo, wayengumvangeli onesibindi. Weyesiwa evuka esenza umsebenzi wokuziphilisa, kodwa wayeqinisekisa nokuba wonk’ ubani umazi njengeNgqina. Wayesoloko ethetha ngenyaniso. Andinakuze ndiyilibale inzondelelo nenkalipho awayenayo. Wayehlala esithi, “Zigcine uxakekile entlanganweni kaYehova, yaye uya kusinda ezingxakini ezininzi.”

Sasidla ngokunikela ubungqina basesitratweni eStenen nakwiindawo ezikufutshane. Kum, yayingasoloko ilula loo nto. Kwidolophu nganye kwakusoloko kukho iindlavini, ezazisigculela thina bancinane. Ngenye imini, xa ndandineminyaka esibhozo ubudala, ndandimi kweny’ ikona ndiphethe iMboniselo noVukani! kwaza kwafika ugxudululu lwabafana lwandirhangqa. Baxhwila umnqwazi wam omtsha bawuxhoma epalini eyayisecaleni kwam. Okuvuyisayo kukuba, umzalwana omdala kunam owayesoloko endigadile wayibona yonke loo nto yayisenzeka. Wasondela waza wandibuza esithi, “Vern, ikhon’ ingxaki?” Loo makhwenkwe aphel’ emehlweni ngokukhawuleza. Nangona kwakundicaphukisa oku, kwandifundisa ukuba xa sinikela ubungqina esitratweni asimele sime ndaweni-nye oku kwepali. Olo qeqesho endalufumana ndisakhula lwandinceda ndaba nenkalipho yokwenza umsebenzi wendlu ngendlu.

Ndabhaptizwa noAlvin ngoMeyi 1951. Ndandineminyaka eli-13 ubudala. Ndisawakhumbula amazwi kaMzalwan’ uJack Nathan, owayenikela intetho yobhaptizo, xa wayesibongoza ukuba ingaze iphele inyanga singakhange sithethe ngoYehova.a Ekhaya, inkonzo yobuvulindlela yayigqalwa njengolona sukelo esimele sibe nalo. Ngoko ke, emva kokugqiba isikolo ngowe-1958, ndafudukela eWinnipeg, eManitoba, ndaba nguvulindlela khona. Nangona uTata wayekuvuyela ukusebenza nam kwishishini lasekhaya njengomchweli, yena noMama bandikhuthazela inkonzo yexesha elizeleyo baza bandivumela ukuba ndiye kukhonza njengovulindlela eWinnipeg.

Ikhaya Elitsha Neqabane Elitsha

Ngowe-1959, iofisi yesebe yamema nabani na owayenokuzenza afumaneke ukuba aye kunceda eQuebec, apho kwakufuneka khona abashumayeli bevangeli. Ndaya kuba nguvulindlela eMontreal. Yaba lutshintsho olukhulu olu kum. Kwaba ngathi sisiqalo esitsha njengoko ndandifunda ulwimi lwesiFrentshi kunye nempilo yalapho. Umveleli wethu wesiphaluka wathi kum, “Ungaze uthi, ‘Izinto besizenza ngolu hlobo ekhaya.’” Yayilicebiso elihle elo.—1 Kor. 9:22, 23.

Ukuya kwam eQuebec, ndandingenaye uvulindlela endisebenza naye. Noko ke, udade oselula ogama linguShirley Turcotte, endandidibene naye eWinnipeg, waba liqabane lam emva kokutshata kwethu ngoFebruwari 1961. Naye wayekhulele kwintsapho ethanda uYehova. Ndandingayiqondi ngelo xesha into yokuba uya kundikhuthaza aze andomeleze kangaka ukutyhubela iminyaka.

Ukhenketho Lokushumayela EGaspé

Emva kweminyaka emibini sitshatile, samiselwa njengoovulindlela abakhethekileyo eRimouski, eQuebec. Ngentwasahlobo elandelayo, iofisi yesebe yasicela ukuba siye kushumayela eGaspé Peninsula, ekunxweme olusempuma yeKhanada. Isabelo sethu yayikukutyala imbewu yenyaniso kangangoko kunokwenzeka. (INtshu. 11:6) Sazalisa imoto yethu ngamaphephancwadi angaphezu kwe-1 000 neencwadi ezimalunga nama-400 kunye nokusiwa phantsi kwempumlo nempahla enxitywayo, saza saqalisa ukhenketho lokushumayela olwasithabatha inyanga yonke. Sasebenza zonke iilali ezincinane zaseGaspé. Isikhululo sikanomathotholo sasekuhlaleni salumkisa ngelithi amaNgqina asendleleni, yaye saxelela abantu ukuba bangazithabathi iincwadi zethu. Kodwa ke, eso saziso asizange siqondwe luninzi lwabantu, lwaza lwacinga ukuba bekubhengezwa uncwadi lwethu, batsho bazithabatha.

Kuloo minyaka, inkululeko yokushumayela yayiseyinto entsha kweziny’ iindawo zaseQuebec, ngoko kwakungengomnqa ukumiswa ngamapolisa. Oku kwenzeka kwesinye isixeko apho sasihambisa iincwadi phantse kwindlu nganye. Samiswa lelinye ipolisa lathi masililandele ukuya kwisikhululo samapolisa, zange sale ke nathi. Ndafumanisa ukuba igqwetha leso sixeko lalikhuphe umyalelo wokuba siyeke ukushumayela. Ekubeni intloko yamapolisa yayingekho ngaloo mini, ndanika igqwetha elo ileta ebhalwe kwiofisi yesebe eseToronto echaza ngelungelo esinalo lokushumayela. Emva kokuyifunda lathi: “Jonga, andifuni nkathazo. Ibingumfundisi wenqila othe mandiniyekise ukushumayela.” Sakhawuleza saya kuqalisa ubulungiseleli apho besimiswe khona lipolisa, ukuze abantu bangacingi ukuba umsebenzi wethu awukho semthethweni.

Ngentsasa elandelayo xa saya kubona intloko yamapolisa, yaba ligqabi ngumsindo yakuva ukuba besikhe sayekiswa ukushumayela. Wawunokuva kwaindlela le eyayithetha ngayo nelaa gqwetha efowunini! Elo polisa lathi ukuba sikhe saphinda sanengxaki ze silifowunele yaye liya kusicombululela yona. Nangona sasingengobalapho yaye singasazi kakuhle isiFrentshi, abantu babesamkela ngobubele. Kodwa sasizibuza, ‘Ngaba baya kuze bayazi phofu inyaniso?’ Saphenduleka emva kweminyaka xa sabuyela apho ukuya kwakha iiHolo zoBukumkani kulo lonke elaseGaspé. Safumanisa ukuba uninzi lwabantu esanikela kulo ubungqina sele lungabazalwana bethu. Ngokwenene, nguYehova okhulisayo.—1 Kor. 3:6, 7.

Sifumana Ilifa

Intombi yethu uLisa yazalwa ngowe-1970. Eli lifa livela kuYehova lasivuyisa gqitha. UShirley noLisa babesebenza kunye nam kumsebenzi wokwakha iiHolo zoBukumkani. Emva kokugqiba isikolo uLisa wathi: “Mama noTata, ekubeni ndaniyekisa inkonzo yexesha elizeleyo, ndiza kuzama ukusivala eso sikhewu ngokuba nguvulindlela.” Sekudlule iminyaka engama-20 uLisa enguvulindlela, kodwa ngoku ukhonza kunye nomyeni wakhe uSylvain. Baye banelungelo lokusebenza kumsebenzi wokwakha kumazwe ngamazwe. Usukelo lwethu njengentsapho kukuphila ubomi obulula ukuze sikwazi ukuba nesabelo kwinkonzo kaYehova. Amazwi awathethwa nguLisa xa wayeqala ukuba nguvulindlela asankenteza nangoku. Eneneni, wandikhuthaza ukuba nam ndibuyele kwinkonzo yexesha elizeleyo ngowama-2001 yaye ndiye ndaqhubeka ndinguvulindlela ukususela ngoko. Ubuvulindlela bundifundisa ukukholosa ngoYehova kwinto yonke nokuphila ubomi obulula nobanelisayo.

Umsebenzi Wokwakha Ufuna Uthando, Ukunyaniseka Nokuthembeka

UYehova undifundise ukuba xa ndizenza ndifumaneke ndize ndamkele nasiphi na isabelo andinika sona, ndiya kufumana iintsikelelo ezininzi. Kulilungelo elikhethekileyo kum ukukhonza kwiKomiti Yokwakha Yenqila nokusebenza kumsebenzi wokwakha kunye nabazalwana noodadewethu kulo lonke elaseQuebec nakwezinye iindawo.

Nangona amanye ala matshantliziyo enganikeli zintetho zibalaseleyo, xa kusiziwa kumsebenzi wokwakha iiHolo zoBukumkani ankqenkqeza phambili. Aba bazalwana bathandekayo bayazinikela kulo msebenzi, yaye basebenzisa iziphiwo abanazo. Imiphumo ke isoloko iba zizakhiwo ezihle zokunqulela uYehova.

Abanye baye babuze, “Ziziphi iimpawu amele abe nazo umntu ukuze abe litshantliziyo kumsebenzi wokwakha iiHolo zoBukumkani?” Ngokwamava am, okokuqala umntu umele athande uYehova noNyana wakhe kunye nabazalwana bonke. (1 Kor. 16:14) Okwesibini, kufuneka anyaniseke yaye athembeke. Umntu onyanisekileyo uya kuqhubeka elandela ulwalathiso lwentlangano enoba izinto azihambi ngendlela ebefuna ngayo. Ukuthembeka kuya kumshukumisela ukuba ancede nakweminye imisebenzi.

Ndiyambulela UYehova

Nangona uTata wafa ngowe-1985, icebiso lakhe lokuba ndizigcine ndixakekile entlanganweni kaYehova lisabethelelekile engqondweni yam nangoku. Njengabanye abasele befumene isabelo sabo kwinxalenye yentlangano kaYehova yasezulwini, akuthandabuzeki ukuba naye uxakekile. (ISityhi. 14:13) UMama ngoku unama-97 eminyaka ubudala. Ngenxa yokubethwa sistroke akasakwazi kuthetha kakuhle; kodwa usayazi iBhayibhile yakhe. Kwiileta asibhalela zona ucaphula izibhalo ezikhuthaza ukuba siqhubeke simkhonza ngokuthembeka uYehova. Hayi indlela esinombulelo ngayo sisonke ngokuba nabazali abanothando ngolu hlobo!

Ndiyambulela uYehova nangoShirley, inkosikazi yam ethembekileyo. Usaligcinile icebiso awalinikwa ngunina xa wathi, “UVern uza kuxakeka yimisebenzi yentlangano, ngoko umele wazi ukuba kuza kufuneka achithe ixesha nabanye.” Ukutshata kwethu kwiminyaka engama-49 eyadlulayo, sazimisela ukuba siya kwaluphala sikhonza uYehova kunye yaye ukuba siyasinda kwisiphelo sale nkqubo yezinto sibe batsha sobabini size siqhubeke simkhonza ngonaphakade. Siye ‘sanokuninzi kokwenza emsebenzini weNkosi.’ (1 Kor. 15:58) UYehova ebesinyamekela eqinisekisa ukuba asisweli nantoni na.

[Umbhalo osemazantsi]

[Umfanekiso okwiphepha 31]

“Usukelo lwethu njengentsapho kukuphila ubomi obulula ukuze sikwazi ukuba nesabelo kumsebenzi kaYehova”