Kutheni Imitshato Emininzi Iqhekeka?

“Kweza [kuYesu] abaFarisi, bezimisele ukumhenda besithi: ‘Kusemthethweni na ukuba indoda iqhawule umtshato nomfazi wayo nangasiphi na isizathu?’”—Mateyu 19:3.

ABANYE abantu ababephila ngexesha likaYesu babethandabuza ukuba imitshato inokuphumelela. Wathi uYesu kubo: “Anizange nifunde na ukuba lowo wabadalayo ukususela ekuqaleni wabenza baba yindoda nebhinqa waza wathi, ‘Ngenxa yesi sizathu indoda iya kumshiya uyise nonina ize inamathele emfazini wayo, baze abo babini babe nyama-nye’? Ngako oko abasebabini, kodwa banyama-nye. Ngoko ke, oko uThixo akubophelele ngedyokhwe ndawonye makungahlukaniswa mntu.”a (Mateyu 19:4-6) Kuyabonakala ukuba uThixo wayefuna umtshato uphumelele.

Kumazwe amaninzi namhlanje, malunga nama-40 ekhulwini emitshato okanye ngaphezulu, iyaqhawuka. Ngaba icebiso leBhayibhile ngomtshato alisasebenzi? Ngaba imitshato isilela ngenxa yokuba ilungiselelo lomtshato linesiseko esixengayo?

Khawucinge ngalo mzekelo: Iintsapho ezimbini zithenga iimoto ezifanayo. Enye intsapho iyiphatha kakuhle imoto yayo. Imoto yayo ayonakali. Kodwa enye intsapho ayiyihoyi imoto yayo iyisebenzisa ngokungenankathalo. Le moto iyonakala ize iyishiye. Ibangelwe yintoni le ngxaki yimoto okanye ngabaniniyo? Kucacile ukuba ityala likubaniniyo.

Ngendlela efanayo, ukusilela kwemitshato akuthethi ukuba ezi ngxaki zibangelwa ngumtshato. Izigidi zemitshato ephumelelayo zibonisa loo nto. Loo mitshato ibenza bonwabe abo bantu, iintsapho zabo neendawo abahlala kuzo. Njengemoto umtshato ufuna ukunyanyekelwa ukuze uphumelele.

Enokuba unexesha elingakanani utshatile, icebiso eliseBhayibhileni ngendlela yokuwunyamekela liyanceda. Inqaku elilandelayo linamacebiso.

[Umbhalo osemazantsi]