Okuphuma Koovimba Bethu
Ukulondoloza Izinto Ezixabisekileyo Zexesha Elidlulileyo
ABANTU bakaYehova banelifa elityebileyo lokomoya. Ingxelo echukumisayo yeli lifa inokufunyanwa kungekuphela nje kwiimpapasho kodwa nakwiifoto, iileta, amabali obomi nezinto zobugcisa ezinento yokwenza nonqulo lwethu, umsebenzi wethu wokushumayela kwakunye nembali yethu. Kodwa kusinceda ngantoni ukulondoloza ezo zinto nokuphanda ngezinto ezenzeke kwixa elidluleyo? Kaloku, iintloko-ntsapho zoSirayeli wamandulo zazifanele zifundise oonyana bazo ngemithetho nangezenzo ezimangalisayo zikaYehova ukuze “babeke intembelo yabo kuThixo.”—INdu. 78:1-7.
Oovimba bokuphanda baye badlala indima enkulu ekuphunyezweni kwenjongo kaYehova. Ngokomzekelo, xa abachasi babezama ukuthintela umsebenzi owawusenziwa kwitempile yaseYerusalem, uphando olusemthethweni olwenziwa kumaxwebhu akoovimba abakwidolophu elikomkhulu lamaMedi, iEkbhatana lwenza kwacaca ukuba, lo yayingumsebenzi owagunyaziswa nguKumkani uKoreshi. (Ezra 6:1-4, 12) Ngoko, itempile yakhiwa ngokutsha ngokuvisisana nokuthanda kukaThixo. Oovimba bokuphanda basetyenziswa nangumbhali weVangeli, uLuka ‘owalanda zonke izinto ukususela kwasekuqaleni ngokuchanileyo.’—Luka 1:1-4.
IQumrhu Elilawulayo linomdla ngokwenene kwimbali yethu yobuthixo. Lithetha ngemfuneko yokulondolozwa kwamaxwebhu nokudluliselwa kwelifa lethu lokomoya, elinye ilungu leQumrhu Elilawulayo lathi, “Ukuze sizazi apho siya khona, simele sazi apho sivela khona.” Ngenxa yoko, kutshanje kwikomkhulu lehlabathi eBrooklyn, eNew York kusandul’ ukusekwa Oovimba Besebe Lokubhala abaphantsi kweKomiti Yokubhala.
“IALBHAM YENTSAPHO” ‘NELIFA LENTSAPHO’
Njengoko ixesha lihamba siye sivakalelwe kukuba ngesasizigcinile izinto zakudala zentsapho. Oovimba Besebe Lokubhala, basebenza nzima bezama ukulondoloza nokwenza amaxwebhu aphathelele ilifa lethu elityebileyo nelikhulayo. Iifoto ezikwaba Vimba zigqalwa njengenxalenye “yealbham yentsapho.” Iimpapasho zethu ezindala, amabali obomi achukumisayo akudala neenkumbulo zangaphambili ezingenakuthelekiswa nanto, ziqukiwe kubuncwane obukwaba Vimba. Ezi zinto “zililifa lentsapho” elisikhanyisela ngembali yobuthixo yaye zisinceda sikhangele phambili sinentembelo kwikamva lentsapho yethu yokomoya.
Siyakukhuthaza ukuba ufunde izinto ezikooVimba Besebe Lokubhala kweli nqaku litsha linomxholo othi “Okuphuma KooVimba Bethu.” Liza kumana livela maxa wambi kuhlelo lokufundisa lweMboniselo. Ngokomzekelo, inkupho ezayo iza kube inomfanekiso ngenjongo yokuba kuphendulwe le mibuzo: Yayiyintoni iDawn Mobile? Yayisetyenziswa ngubani? Yayisetyenziswa nini, ngayiphi injongo?
Njengealbham eneenkumbulo zentsapho, ingqokelela yooVimba isichazela ngathi nangookhokho bethu bokomoya—ngokholo nangenkalipho yabo, ngovuyo nocelomngeni lokukhonza uBawo wethu onothando wasezulwini, ngokhokelo lukaThixo nangenkxaso yabantu bakhe. (Dut. 33:27) Sinentembelo yokuba uYehova uya kuyisikelela imigudu esiqhubeka siyenza yokulondoloza imbali yentlangano ukuze simanyane ngakumbi size somelezelwe ukuba siqhubeke sisenza ukuthanda kwakhe.
[Ibhokisi/Umfanekiso okwiphepha 31]
Makhe Sihlolisise Oku
Xa kusenziwa uncwadi lwamaKristu, ii-DVD nezinye izinto ezisekelwe eBhayibhileni, ababhali bethu, abazobi, abaphandi nabanye basebenzisa oovimba bokuphanda. Noko ke, ooVimba Besebe Lokubhala baqokelela baze balondoloze ingqokelela eninzi yembali efunyenwe kwiiofisi zamasebe, kumasebe aseBheteli, emabandleni, ebantwini nakumaziko athile. Khawuhlole indlela owenziwa ngayo lo msebenzi:
Ukufumana Nokuhlalutya: Kule ngqokelela yooVimba kuqhubeka kufakwa izinto ezixabisekileyo. Ezininzi kuzo ziye zafunyanwa kubazalwana abaye banikela ngazo okanye zibolekwa kubantu abaneentsapho ezineengxelo ezinamashumi ngamashumi eminyaka zokukhonza uYehova ngokuthembeka. Ukuhlalutya nokuthelekisa ezo zinto kusinceda siyiqonde ngakumbi imbali yethu neyabakhonzi bamandulo.
Ukwenza Uluhlu Lwezinto: Zingamawakawaka izinto ezikwaba Vimba Besebe Lokubhala, ezinye kuzo zineminyaka engaphezu kweenkulungwane zikho. Ziba ziintlobo ngeentlobo yaye kuye kufuneke kwenziwe uludwe lwazo ukuze zikwazi ukufumaneka lula mhla kusenziwa uphando kuzo kamva.
Ukulungiswa Nokulondolozwa: Iincwadi ezonakeleyo nezinto zakudala ziyalungiswa zize zilondolozwe kusetyenziswa iindlela eziphucukileyo zokuzilungisa. Amaxwebhu, iifoto, amanqaku eendaba, iifilimu nezinto ezirekhodiweyo zigcinwa ekhompyutheni. Le mibhalo ifakwa ekhompyutheni ize isetyenziswe ngoxa isekhompyutheni, kuze kugcinwe imibhalo yantlandlolo ukuze ingonakali.
Ukuzigcina Nokuzikhupha: Izinto ezikoovimba ziye zigcinwe zilungelelene yaye zikhuselekile, ukuze zingalahleki okanye zonakaliswe kukukhanya nokufuma. Kuye kwenziwe noluhlu oluncedayo xa kuphandwa naxa kukhutshelwa ubuncwane obuxabisekileyo bexesha elidluleyo.
[Imifanekiso ekwiphepha 32]
1. Iplakhadi “yePhoto-Drama of Creation.” 2. Uludwe lwemirhumo. 3. Imoto enesandisi-lizwi. 4. Uqweqwe lweMboniselo ka-Aprili 15, 1912. 5. Umyalelo wokubanjwa kukaJ. F. Rutherford. 6. Umboko wesandisi-lizwi we-WBBR. 7. Igramafoni. 8. Ibhokisi yeencwadi. 9. Amanqaku. 10. Umyalezo oya kuJ. F. Rutherford.