‘Hlalani Kwilizwi Lam’
“Ukuba nithe nahlala kulo izwi lam, ngokwenene ningabafundi bam, niya kuyazi inyaniso, yaye inyaniso iya kunikhulula.”—YOHANE 8:31, 32.
Oko kuthethwa Ngala Mazwi: Apha “ilizwi” likaYesu lithetha iimfundiso zakhe ezazivela kumthombo ongentla. UYesu wathi: “UBawo ondithumileyo undinike umyalelo mayela noko mandikuxele noko mandikuthethe.” (Yohane 12:49) Waphinda wathi xa ethandaza kuYise wasezulwini: “Ilizwi lakho liyinyaniso.” Wayesoloko ecaphula iLizwi likaThixo ukuze axhase iimfundiso zakhe. (Yohane 17:17; Mateyu 4:4, 7, 10) Ngoko ke, amaKristu okwenyaniso ‘ahlala kwilizwi lakhe’—ngamany’ amazwi amkela iLizwi likaThixo iBhayibhile ‘njengeliyinyaniso’ negunya eliyintloko kwiinkolelo zawo nakwindlela aphila ngayo.
Indlela Awayeqhuba Ngayo AmaKristu Enkulungwane Yokuqala: Oyena mKristu ubhale iincwadi zeBhayibhile ezininzi umpostile uPawulos, wayelihlonela njengoYesu iLizwi likaThixo. Wabhala wathi: “Sonke iSibhalo siphefumlelwe nguThixo kwaye siyingenelo.” (2 Timoti 3:16) Amadoda amiselwe ukufundisa amanye amaKristu ayefanele “abambelele eLizwini likaThixo eliqinisekileyo nelithembekileyo.” (Tito 1:7, 9, iThe Amplified Bible) AmaKristu enkulungwane yokuqala abongozwa ukuba agatye ‘intanda-bulumko nenkohliso elambathayo esekelwe kwizithethe zabantu, nakwizinto eziziziqalelo zehlabathi, kungekhona kuKristu.’—Kolose 2:8.
Ngoobani Abalandela Lo Mzekelo Namhlanje?: Ngokutsho kweDogmatic Constitution on Divine Revelation yaseVatican, eyamkelwa ngowe-1965 ecatshulwe kwiKhathikezi yeCawa [yamaKatolika] ithi: “Ayisebenzisi iZibhalo eZingcwele kuphela xa ifuna ukuqinisekisa izinto ezifundisayo. Ngoko ke izithethe ezingcwele neZibhalo eZingcwele zimelwe zamkelwe zize zihlonelwe ngokulinganayo.” Inqaku elikwiphephancwadi iMaclean lacaphula umfundisikazi waseToronto, eKhanada, owabuza ukuba: Kutheni le nto kufuneka sikhokelwe ‘ngumntu’ owayephila kwiinkulungwane ezimbini ezadlulayo? Sineendlela zethu ezisemagqabini, eziye zenziwa buthathaka kukusoloko sicaphula uYesu neZibhalo.”
Mayela namaNgqina kaYehova, iNew Catholic Encyclopedia ithi: “Ayijonga iBhayibhile njengokuphela komthombo weenkolelo zawo nendlela yokuziphatha.” Kutshanje enye indoda yaseKhanada yabetha emlonyeni iNgqina likaYehova xa lalizazisa yathi: “Ndiyakwazi ukuba ungubani,” isitsho isalatha iBhayibhile, “kaloku nini kuphela abasebenzisa iBhayibhile.”