“Abayonxalenye Yehlabathi”

“Ihlabathi liye labathiya, ngenxa yokuba abayonxalenye yehlabathi.”—YOHANE 17:14.

Oko Kuthethwa Ngala Mazwi: Ekubeni wayengeyonxalenye yehlabathi, uYesu akazange athathe cala kwiingxwabangxwaba zezopolitiko nezentlalo zexesha lakhe. Wahlabela mgama wathi: “Ukuba ubukumkani bam bebuyinxalenye yeli hlabathi, abalindi bam bebeya kulwa ukuze ndinganikelwa kumaYuda. Kodwa ubukumkani bam abusuki kulo mthombo.” (Yohane 18:36) Kwakhona waphinda wabongoza abalandeli bakhe ukuba bazikhwebule kwizimo zengqondo, intetho neendlela zokuziphatha ezigatywayo liLizwi likaThixo.—Mateyu 20:25-27.

Indlela Awayeqhuba Ngayo AmaKristu Enkulungwane Yokuqala: Ngokutsho kombhali ngezonqulo uJonathan Dymond, amaKristu enkulungwane yokuqala “akazange avume ukulwa [imfazwe] enoba lo nto yayiza kuphumela ekugculelweni, ekuvalelweni okanye ekubulaweni.” Akhetha ukubandezeleka kunokuba alalanise. Nendlela awayeziphethe ngayo yayahlukile. AmaKristu axelelwa ukuba: “Ngenxa yokuba ningaqhubeki nibaleka kunye nabo kweli khondo ukuya kumgxobhozo ofanayo woburheletyo, babhidekile yaye bahamba benitshabhisa.” (1 Petros 4:4) Umbhali-mbali uWill Durant wathi: “amaKristu abamisa mantsantsa abo bahedeni babethe phithi ziziyolo.”

Ngoobani Abalandela Lo Mzekelo Namhlanje? Ngokuphathelele ukungathathi icala komKristu, iNew Catholic Encyclopedia itsho phandle ukuba: “Akulunganga ukwala ukusebenzisa izigalo.” Inqaku elikwiReformierte Presse lithi kwingxelo equlunqwe ngumbutho olwela amalungelo abantu, kwimbubhiso eyayiseRwanda ngowe-1994 zonke iicawa zaba nenxaxheba “ngaphandle kwamaNgqina kaYehova.”

Ngokuphathelele ukubulawa kwabantu ngamaNazi, utitshala wamabanga aphezulu wakhalaza wathi “alikho iqela okanye umbutho owathetha ngokuphandle nxamnye nobuxoki, inkohlakalo nokubulawa kwabantu ngokungenalusini.” Emva kokuba eqhagamshelene neMyuziyam yaseMerika eneengxelo zokubulawa kwabantu ngamaNazi, wabhala wathi: “Ngoku ndinayo impendulo.” Wafumanisa ukuba amaNgqina kaYehova ema engagungqi kwinkolelo zawo nangona ayephethwe ngqwabalala.

Kuthekani ngendlela aziphethe ngayo? Iphephancwadi iU.S. Catholic lithi: “Uninzi lolutsha lwamaKatolika aluvumelani neemfundiso zecawa kwimibandela enje ngokuhlalisana nokwabelana ngesondo ngaphambi komtshato.” Lo lindixesha uphinda acaphule umdikoni wecawa owathi: “Umyinge omkhulu—ndicingela ukuba ungaphaya kwama-50 ekhulwini—utshata sele uhlalisana kakade.” IThe New Encyclopædia Britannica yaphawula ukuba amaNgqina kaYehova “abambelela kwimilinganiselo ephakamileyo yokuziphatha.”