Imimangaliso Ezakwenzeka Kungekudala
UKUBA ugqirha ebeza kwenza utyando oluntsonkothileyo kuwe, ubuza kuvakalelwa njani xa ubunokufumanisa ukuba akazange alwenze olu hlobo lotyando ngaphambili? Akuthandabuzeki ukuba ubuza kuxhalaba. Kodwa kuthekani, ukuba kwelinye icala, ufumanisa ukuba lo gqirha oyingcali yeli candelo, uye watyanda amakhulu abantu abanesigulo esifana nesakho baza baphila? Ngaba ubungenakumthemba ngakumbi lo gqirha?
Ihlabathi eligulayo esiphila kulo namhlanje lifuna “ukutyandwa.” NgeLizwi lakhe, iBhayibhile, uYehova uThixo uye wathembisa ukuba uza kubuyisela iParadesi kulo mhlaba. (2 Petros 3:13) Kodwa ukuze yenzeke loo nto, kuza kufuneka kuqale kususwe ubungendawo, buncothulwe neengcambu. (INdumiso 37:9-11; IMizekeliso 2:21, 22) Zonke iimeko ezilusizi esizibonayo kufuneka zipheliswe ngaphambi kokuba ibuyiselwe iparadesi. Ukuze ikwazi ukwenzeka loo nto, kuya kufuneka kwenziwe ummangaliso!—ISityhilelo 21:4, 5.
AmaNgqina kaYehova akholelwa ukuba sekumbovu zenzeke ezo nguqu. Ngoba? Kungenxa yokuba imimangaliso asele eyenzile uYehova uThixo iqinisekisa ukuba unamandla okuzalisekisa izithembiso zakhe. Khawuthelekise imimangaliso emithandathu ebhalwe eBhayibhileni nezithembiso ethi ziza kwenziwa kwixa elizayo.
Ngamana ungaqhubeka ufunda izithembiso zeBhayibhile ngekamva. Njengoko ukholo lwakho lukhula, nethemba liya kukhula—ithemba lokuphila kwixesha laxa uya kuxhamla kwimimangaliso eyenziwa nguYehova.
[Ibhokisi/Imifanekiso ekwiphepha 9, 10]
UMMANGALISO:
UYESU WONDLA AMAWAKA ABANTU NGEZONKA NEENTLANZI EZIMBALWA.—MATEYU 14:13-21; MARKO 8:1-9;YOHANE 6:1-14.
ISITHEMBISO:
“Umhlaba uya kunika imveliso yawo; uThixo, uThixo wethu, uya kusisikelela.”—INDUMISO 67:6.
SITHETHA NTONI KUTHI:
AKAKHO UMNTU OYA KUZE APHINDE ABULAWE YINDLALA.
UMMANGALISO:
UYESU WENZA UMNTU OWAYENGABONI WABONA.—MATEYU 9:27-31; MARKO 8:22-26.
ISITHEMBISO:
“Aya kuvulwa amehlo eemfama.”—ISAYA 35:5.
SITHETHA NTONI KUTHI:
BONKE ABANTU ABANGABONIYO BAYA KUBONA KWAKHONA.
UMMANGALISO:
UYESU WAPHILISA IMILWELWE.—MATEYU 11:5, 6; YOHANE 5:3-9.
ISITHEMBISO:
“Isiqhwala siya kutsiba njengexhama.”—ISAYA 35:6.
SITHETHA NTONI KUTHI:
ZONKE IZIPHENE ZIZA KUPHILISWA.
UMMANGALISO:
UYESU WAPHILISA IZIFO EZAHLUKAHLUKENEYO.—MARKO 1:32-34; LUKA 4:40.
ISITHEMBISO:
“Akakho ummi wakhona oya kuthi: ‘Ndiyagula.’”—ISAYA 33:24.
SITHETHA NTONI KUTHI:
ZONKE IZIGULO ZIYA KUPHELA. SIYA KUNANDIPHA IMPILO EFEZEKILEYO.
UMMANGALISO:
UYESU WAYEKWAZI UKULAWULA INDALO.—MATEYU 8:23-27; LUKA 8:22-25.
ISITHEMBISO:
“Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kubulalekela ilize.”—ISAYA 65:21, 23.
“Uya kumiselwa ngokuqinileyo ngobulungisa. Uya kuba kude nengcinezelo—kuba akuyi koyika nto—nayo nantoni na enkwantyisayo, kuba ayiyi kusondela kuwe.” —ISAYA 54:14.
SITHETHA NTONI KUTHI:
AZISAYI KUBAKHO IINTLEKELE ZEMVELO.
UMMANGALISO:
UYESU WAVUSA ABANTU ABAFILEYO.—MATEYU 9:18-26; LUKA 7:11-17.
ISITHEMBISO:
“Bonke abo bakumangcwaba enkumbulo balive. . . baze baphume.”—YOHANE 5:28, 29.
“Ulwandle lwabakhupha abafileyo abakulo, kwathi ukufa neHadesi kwabakhupha abafileyo abalapho.”—ISITYHILELO 20:13.
SITHETHA NTONI KUTHI:
ABANTU ABAFILEYO BAYAKUVUSWA.