Ukunikela Iindaba Ezilungileyo—Njengentsapho
1 Intsapho ezahluleleyo nenesabelo ngokupheleleyo kwinkonzo engcwele—utata, umama nabantwana bekhonza uThixo ngentliziyo yabo yonke—izisa indumiso kwigama likaYehova elikhulu. Siyavuyiswa kukuba iintsapho ezininzi ezinjalo zifumaneka kumabandla abantu bakaYehova emhlabeni wonke.
2 Kambe ke, utata unembopheleleko eyintloko yokunyamekela iintswelo zokomoya zentsapho yakhe. (1 Kor. 11:3) Ngentsebenziswano yomfazi nabantwana bakhe, intsapho yakhe inokuba nempembelelo enamandla kwabanye. (Mat. 5:16) Ziziphi ezinye iinkalo enokuboniswa kuzo le ntsebenziswano?
BAZALI KHOKELANI
3 Kwiimeko ezininzi, utata usenokuba ngumdala okanye isicaka solungiselelo. Oku kuthetha ukuba ukongezelela kwizilangazelelo zentsapho yakhe, elinye ixesha lakhe ufanele alichithele kwimicimbi yebandla. Imbopheleleko katata kukuqinisekisa ukuba ixesha analo ulisebenzisa ngokufanelekileyo ukuze angayityesheli intsapho yakhe. Oku kusenokungasoloko kulula ngenxa yezinto ezifuna ingqalelo yakhe ebudeni beli xesha lincinane analo. Kodwa ngenxa yokuba intsapho yakhe iyimbopheleleko yakhe eyintloko, ufanele azenzele ucwangciso oluthe rhoqo lokuba kunye nayo kwisifundo sentsapho, kwinkonzo yasentsimini, kwiintlanganiso nangezihlandlo zokuzihlaziya okufanelekileyo. Maxa wambi iimeko nezinye iimbopheleleko zisenokuluguqula ucwangciso lukatata, kodwa hayi indlela ekunomvuzo ngayo xa enokuchitha ixesha nyanga nganye kunye namalungu entsapho yakhe kwinkonzo yasentsimini!
4 Intsebenziswano yomfazi ibalulekile. Unokuba ngophumeza indima yakhe kwindoda yakhe ngeyona ndlela ibalulekileyo ngokuyincedisa ekuqeqesheni abantwana kubulungiseleli. Inzondelelo nokuzinikela kwakhe okungumzekelo kuya kuba negalelo elikhulu ekuphembeleleni abantwana ukuba babe noxabiso olungakumbi ngobulungiseleli.—2 Tim. 3:14, 15.
5 Kukho imizekelo emininzi emihle yeemeko ekuthi kuzo umzali omnye asingathe umthwalo wembopheleleko yokomoya aze abaqeqeshe ngokunempumelelo abantwana kubulungiseleli. Ngenxa yomzekelo obalaseleyo kamama okanye utata wabo, abantu abaninzi abaselula baye bayimela ngokuqinileyo inyaniso, bada bangenela nobulungiseleli bexesha elizeleyo.
IMBOPHELELEKO YABANTWANA
6 Kuthekani ngembopheleleko yabantwana? KwanoNyana kaThixo ofezekileyo, uYesu, ngoxa wayesengumntwana omncinane, wayephantsi kolwalathiso noyalelo lwabazali bakhe. (Luka 2:51) Ngoko ke, xa utata nomama belungiselela ukuba intsapho ichithe ixesha kunye kubulungiseleli, kuyimfanelo yabantwana ukubonisa uphawu lokuhlonel’ uThixo ngokuthi basebenzisane nabazali babo.—Efe. 6:1-3.
7 Ukunqula kunye njengentsapho—ukufundisisa, ukubandakanyeka kubulungiseleli basentsimini nokuya kwiintlanganiso—kuyawaqinisa amaqhina othando nomanyano kwisangqa sentsapho. Abazali nabantwana banembopheleleko efanayo kule nkalo.