Yiba Nenzondelelo Ekusasazeni Isigidimi SoBukumkani
1 UYehova unguThixo owenza imisebenzi emihle, ibe uyakuzondelela ukuyifeza. Yonke into ayenzayo yeyokulungelwa kwabo bamkhonzayo. UYesu wamisela umzekelo omhle ngokuxelisa ukuba nenzondelelo kukaYise. Ngesinye isihlandlo, ukuzondelela indlu kaYehova kwamshukumisela ukuba abakhuphe etempileni abo babeyenza indlu yokuthengisela. (Yoh. 2:14-17) Nathi simele sibonakalise inzondelelo enkonzweni yethu kuYehova uThixo ukuba sifuna ukufaniswa njengabantu “abazondelela imisebenzi emihle.”—Tito 2:14.
2 Imisebenzi emihle yamaKristu ibazisela iingenelo abanye. Eyona ngenelo inkulu sinokuyizisela omnye umntu kukumnceda azi uYehova aze amkhonze. (Yoh. 17:3) Sinikela uncedo olunjalo ngokushumayela uBukumkani ngenzondelelo nangomsebenzi wokwenza abafundi.
3 Kukuthini ukuba nenzondelelo? Kukukhuthala. Ukuba nenzondelelo komKristu kubangelwa kukuba nomnqweno onyanisekileyo wokwenza okulungileyo nokufanelekileyo. Igama lesiGrike eliguqulelwe ngokuthi “inzondelelo” lithetha “ukubila.” Njengabalungiseleli bakaThixo, sifanele sibonakalise olu phawu njengoko sisasaza isigidimi soBukumkani. Ngaba sinenzondelelo kubulungiseleli? Ngaba senza unako nako ukuze sincede abanye bafunde ngeenjongo zikaYehova?
BONAKALISA INZONDELELO EKUNIKELENI IINCWADANA EZINEMIFANEKISO
4 Ebudeni buka-Agasti, kwakhona siya kuba nelungelo lokunikela nayiphi na yeencwadana ezinemifanekiso nezinamaphepha angama-32 ngaphandle kwethi Isikolo NamaNgqina KaYehova. Sisenokunikela ethi Bunandiphe Ubomi Emhlabeni Ngonaphakade!, “Uyabona, Izinto Zonke Ndizenza Ntsha,” Ngaba Ufanele Ukholelwe KuBathathu Emnye?, Igama LikaThixo Eliya Kuhlala Likho Ngonaphakade, okanye ethi Urhulumente Oya Kuzisa IParadisi. Kulungele ukunikela nayiphi na incwadana enemifanekiso ebonakala ifaneleke gqitha entsimini kwanakumntu omfumana endlwini.
5 Ukuze sibe nenzondelelo ekusasazeni isigidimi soBukumkani, kufuneka silungiselele kakuhle. Ngaba siqhelene noMxholo Wencoko wangoku? Sinokuwunxibelelanisa njani uMxholo Wencoko nencwadana enemifanekiso esiyinikelayo? Ziziphi iingongoma ezikhethekileyo ezikwiincwadana ezinemifanekiso esinokuzikhankanya? Ukuba sizipha ixesha lokuziqhelanisa nezi ncwadana zinemifanekiso zintlanu size sivuselele ezingqondweni zethu ihlombe ngazo, siya kuxhotyiselwa ukuzinikela ngenzondelelo kwabo bakwintsimi yethu.
AMACEBISO NGOKUNIKELA IINCWADANA EZINEMIFANEKISO
6 Emva kokuba uzazisile, usenokuthi: “Ngaba ukhe wazibuza enoba uThixo uyakhathala kusini na ngobungendawo obenzeka ehlabathini namhlanje? [Vumela impendulo.] IBhayibhile icacisa ukuba kungekudala abangendawo baya kutshatyalaliswa. [Funda INdumiso 92:7.] Ekubeni oku kunjalo, ngubani esinokuphethukela kuye ukuze sifumane ukhokelo nenkuselo yokwenyaniso? [Funda INdumiso 145:20.] Ngoko ekuphela kwendlela esinokusindiswa ngayo kukuba nolwalamano noMdali wethu, uYehova uThixo. Kufuneka sihlolisise iintsikelelo azithembise lonke uluntu oluthobelayo.” Unokwandula ke utyhile kumfanekiso 49 kwincwadana enemifanekiso ethi Ubomi Emhlabeni uze ufunde amazwi apheleka umfanekiso, ubalaselisa iintsikelelo ezibonisiweyo. Okanye tyhila kwiphepha 29 lencwadana enemifanekiso ethi Urhulumente, uze uxubushe ngeentsikelelo ezichazwe apho. Bambi basengathanda ukusebenzisa isiqendu 49 nesama-50 kwincwadana enemifanekiso ethi “Uyabona,” ukuze bacacise oko uBukumkani bukaThixo buya kukwenzela uluntu.
7 Ekubeni la ingamaxesha anomngcipheko, isigidimi esisiphetheyo singxamisekile. Kufuneka sibe nenzondelelo ekusasazeni isigidimi soBukumkani, sikhuthaza abanye ukuba baziqhelanise noThixo kwaneLizwi lakhe. Ngokulusasaza ngenzondelelo olu lwazi lunik’ ubomi, sinikela ubungqina bokuzinikela kwethu kuThixo nokumthanda kwethu uYehova. Khawuzibuze oku: ‘Ngaba ndiyayizondelela imisebenzi emihle? Ngaba indlela endiwuxhasa ngayo umsebenzi wokushumayela inokuchazwa njengebonakalisa inzondelelo neyomphefumlo uphela?’ Iimpendulo zethu ziya kusixela okuninzi ngathi ngohlobo lwenzondelelo esinayo. Okukhona sisiba nesabelo ekusasazeni isigidimi soBukumkani, kokukhona iya kuba nkulu ngakumbi inzondelelo yethu. Abanye baya kubona ukuba ngenene singabantu abazondelela imisebenzi emihle.