Ukuqhelisela Ukuhlonel’ UThixo Njengoko UKristu Wenzayo
1 Ibinzana eliseBhayibhileni elithi “ukuhlonel’ uThixo” libhekisela ekumhloneleni kwethu ngokunzulu uYehova uThixo nasekumkhonzeni ngokunyanisekileyo. Oyena mntu wayebalasele ekuhloneleni uThixo yayiyiNkosi yethu uYesu Kristu.
2 Ngendlela awayephila ngayo apha emhlabeni, uYesu wazingqina njengomntu omhlonela ngokugqibeleleyo uThixo. Ngoko ke, senza kakuhle ukuqwalasela iinkalo ezithile eziphathelele ubomi bakhe, ingakumbi njengoko zihlobene nendima yakhe njengoyena mmeli ubalaseleyo kaYehova uThixo.
UKUBA NENZONDELELO NENKALIPHO
3 UYesu wayenenzondelelo ekuvakaliseni oko uIsaya 61:2 akuchaza ‘njengomnyaka wetarhu likaYehova.’ Ngokulandela umzekelo kaYesu, sifanele sibe nenxaxheba ngenzondelelo kulo msebenzi wokusindis’ ubomi ebudeni bemihla yokugqibela yale nkqubo ingendawo yezinto. Kwakhona simele sibe nenkalipho njengokuba uYesu wayenjalo. Ngoba? Ngenxa yokuba isigidimi soBukumkani esisivakalisayo siyahlaba yaye sichasiwe ngabanye, ingakumbi xa sithetha ngomhla wempindezelo kaYehova.
4 Ukuze sizuze uncedo lokuthetha ngokungafihlisi size sibonakalise ukuhlonel’ uThixo, sifuna umoya kaYehova nolwalathiso lwakhe. KuLuka 4:18, uYesu wathi: “Umoya [kaYehova, NW] uphezu kwam.” Ngomoya kaYehova nangentsikelelo yakhe, nathi sinako ukuqhelisela ukuhlonel’ uThixo size simkholise uYehova. Ukuqhelisela into kuthetha ukuyenza ngokuphindaphindiweyo. Kuthetha ukuba loo nto iba yindlela yethu yokuphila yemihla ngemihla. Ukuhlonel’ uThixo kumele kube yindlela yokuphila yabakhonzi bakaThixo. Umpostile uPawulos wathi: “Ke ngoko nokuba niyadla, nokuba niyasela, nokuba nenza yiphi na into, zenzeleni uzuko lukaThixo izinto zonke.”—1 Kor. 10:31.
UKUHLONEL’ UTHIXO, INDLELA YETHU YOKUPHILA
5 Asimele siphelelwe ngumbono wemfuneko yokuqhubeka sixelisa uKristu ngokuthi sixhakamfule amathuba okwabelana nabanye ngeendaba ezilungileyo. Njengoko sisenjenjalo ebudeni benyanga kaJuni, kunconyelwa ukuba sibalaselise incwadi ethi Iphulo Loluntu Lokufuna UThixo.
6 Kubulungiseleli bethu, bambi abantu baya kuzichaza njengamalungu eqela elithile eliphambili lonqulo. Sinokukuvuma ngomoya omhle oku size, mhlawumbi, sithi: “Kubangel’ umdla ukudibana nabantu beenkonzo ezahlukeneyo. Uluntu luye lwamfuna uThixo ngeendlela ezininzi ezahlukeneyo. [Ukuba kubonakala kufanelekile, unokubhekisela kwiZenzo 17:26, 27.] Akuvumi na ukuba ngokuqhelekileyo abantu balandela unqulo lwabazali babo, kunokuba baziphandele ngokwabo ngoThixo? Ngamany’ amazwi, bakhonza kunqulo abazalelwe kulo. Yiloo ngongoma kanye ephuhliswayo kwisahluko sokuqala sale ncwadi ethi Iphulo Loluntu Lokufuna UThixo. [Mbonise iphepha 8, isiqendu 12.] Ukufunda okungakumbi ngezinye iinkonzo kuvul’ ingqondo yaye kuzuzisa ulwazi. Le ncwadi icacisa imvelaphi, uqheliselo neemfundiso zeenkonzo eziphambili ehlabathini.”
7 Indlela yethu yokuphila ayipheleli nje ekuvakaliseni umhla wempindezelo kaYehova nomnyaka wetarhu kodwa ikwaquka nokubonakalisa ukuhlonel’ uThixo kubomi bethu bobuqu nobentsapho. Simele sixelise uYesu, sifundisa abanye ngomzekelo esiwumiselayo oko ngenene kukuko ukuhlonel’ uThixo. Ngokulandela umzekelo kaKristu wokuhlonel’ uThixo, sisoloko sizabalazela ukuba nentshukumisa efanelekileyo kuyo yonke into esiyenzayo, sidumisa uYehova yaye sizingqina singabakhonzi bakhe abanyanisekileyo. Ngamana ukuqhelisela kwethu ukuhlonel’ uThixo kungabanceda abanye kwiphulo labo lokufuna uThixo kuze kwalathisele abanyanisekileyo ekuzuzeni ulwazi ngoThixo wenyaniso, uYehova.