Iintshayelelo Zokwenza Abaninimzi Baphulaphule
1 Yiyiphi eyona nxalenye ibalulekileyo yentshumayelo yakho yendlu ngendlu? Inkoliso yethu iya kuvuma ukuba yintshayelelo. Ukuba akukwazi ukuvusa umdla womninimzi kwisithuba semizuzwana yokuqala engama-30, mhlawumbi uya kuyiphelisa loo ncoko.
2 Ziziphi iinkalo ofanele uziqwalasele ekulungiseleleni intshayelelo ephumelelayo? Hlolisisa izithethe neentswelo zabantu osenokudibana nabo. Ngaba kusisithethe ukunabisa incoko kuhlekwe, okanye ulindeleke ukuba uhlab’ emxholweni ngokukhawuleza? Ngaba kukho izibini ezininzi eziselula kummandla wenu? Ziintoni abazixhalabeleyo? Ngaba abantu abaselumelwaneni baziphaphele iingxaki ezithwaxa uluntu ngokubanzi?
Usenokubenza baphulaphule ngokuthetha okufana noku:
◼ “Molo. Igama lam ngu————. Ndiyakhathazeka xa ndifunda ngabantu abalambayo nababulawa ezimfazweni. Ngaba nawe uvakalelwa ngendlela efanayo?” Eminye imibuzo esenokunceda ekuqaliseni incoko yile: “Siyintoni isicombululo kwiingxaki zehlabathi?” “Ngaba ucinga ukuba ukho umntu onokuphelisa iingxaki ezikhoyo namhlanje emhlabeni?” “Kuthekani ukuba bekukho umlawuli oneemfaneleko ezifana nezi zikhankanywe kuIsaya 9:6, 7? [Funda uze ugqabaze ngesi sibhalo.]”
3 Kweminye imimandla, abantu basenokubonakala bexhalabele kakhulu amakhaya neentsapho zabo kuneziganeko zazwenibanzi ezinjengoxolo lwehlabathi.
Usenokuvusa umdla ngokubuza oku:
◼ “Ucinga ukuba wena nentsapho yakho niya kube niphila ubomi obunjani kwiminyaka elishumi ezayo? Imbono yeBhayibhile ngekamva iyakhuthaza kakhulu kuba ixela kwangaphambili ngokuza komlawuli oya kulawula ngemilinganiselo egqibeleleyo. Phawula oko uIsaya 9:6, 7 akuthethayo ngaye.”
4 Ngaba uphila kummandla apho ulwaphulo-mthetho nokhuseleko lungundaba-mlonyeni? Abanye basenokubek’ indlebe ukuba usebenzisa intshayelelo yokuqala phantsi komxholwana othi “Ulwaphulo-mthetho/Ukhuseleko” kwiphepha 13 lencwadi Ukuqiqa.
Usenokuthi:
◼ “Molo. Sithetha nabantu ngombandela wokhuseleko lobuqu. Kukho ulwaphulo-mthetho oluninzi kwindawo esihlala kuyo, yaye luchaphazela ubomi bethu.” Emva koko umbuzo onjengothi “Siyintoni isicombululo?” okanye “Ngaba ucinga ukuba ukho umntu onokuphelisa ezi ngxaki zikhoyo ehlabathini?” okanye “Kuthekani ukuba kukho umlawuli oneemfaneleko ezifana nezi?” usenokunceda ekuqaliseni incoko. Unokwandula ke ufunde uIsaya 9:6, 7.
5 Sonke, kuquka abantu abaselula abakubudala bokuhamba isikolo, sinokuzisebenzisa ezi ntshumayelo zilula ezisekelwe kwisibhalo esinye. Eneneni, usenokuthanda ukuzama ukusebenzisa enye yazo xa unikela amaphephancwadi. Akuvumi na ukuba intshumayelo enjalo engokweZibhalo ibiya kuba yindlela entle yokubona enoba umphulaphuli wethu unomdla wokwenene kusini na? Siqinisekile ukuba abaninzi baya kukunandipha ukusebenzisa ezi ntshumayelo ebudeni bukaJanuwari, xa benikela amaphephancwadi naxa behambisa umnikelo oqhelekileyo wenyanga.
6 Ukuba uyisebenzisa ngokunempumelelo imizuzwana yokuqala engama-30 yotyelelo lwakho, kokubini ngesimilo sakho nangentshayelelo yakho, kusenokwenzeka ukuba ufikelele usukelo olubalulekileyo lokwenza abaninimzi baphulaphule.