Yintoni Esiya Kuyifeza Ebudeni Balo Nyaka Wenkonzo?
1 Njengoko siqalise unyaka wenkonzo we-1994 ngoSeptemba 1, eli lixesha elifanelekileyo lokuba sonke njengabantu bakaYehova sigqibe ngokucacileyo ezingqondweni zethu oko sifuna ukukufeza njengabantu ngabanye nanjengentlangano ebudeni balo nyaka wenkonzo mtsha.
2 Qhubeka Ukhula Ngokomoya: Ukuba sisandul’ ukungena enyanisweni, sifanele sibe nomnqweno wokomelela elukholweni. (Heb. 6:1-3) Ukuba sele somelele ngokomoya, asimele sanele nje ukunceda abasebatsha nabanye kodwa sikwamele sinikele ingqalelo kubumoya bethu, singaze sivakalelwe kukuba sinalo lonke ulwazi oluyimfuneko lweBhayibhile yaye sinamava awaneleyo ngobomi bobuKristu. Ngaba siyayiqwalasela itekisi yosuku, siyaqhubeka nocwangciso lofundo lweBhayibhile olukuCwangciso LweSikolo Sobulungiseleli Sobuthixo, yaye siyasilungiselela iSifundo Sencwadi Sebandla neSifundo seMboniselo? Ubuncinane oko kufanele kube lusukelo lwethu sonke. Sifanele siqhubeke sikhula ngokomoya ukuba sifuna ukusinda kwintshabalalo yale nkqubo yezinto ingendawo size sisindiselwe kwihlabathi elitsha likaThixo.—Thelekisa eyabaseFilipi 3:12-16.
3 Hlala Ucocekile Ngokomoya: Ukuze samkeleke ngokupheleleyo kuYehova, simele sicoceke kuko konke “ukudyobheka kwenyama nokomoya.” (2 Kor. 7:1) Xa sicocekile, kutheni sifuna ukuphinda ‘sizityikatyike eludakeni’ lweli hlabathi lidala lonakeleyo? (Thelekisa eyesi-2 kaPetros 2:22.) Simele sizimisele ukuhlala somelele yaye sicocekile ngokomoya. Ngoko asiyi kuba ngabangawaziyo amaqhinga kaSathana angendawo aze asoyise, siwele esonweni size siphulukane nenkoliseko kaYehova.—2 Kor. 2:11.
4 Thobela Isiluleko Sobulumko: IMizekeliso 15:22 (NW) ithi: “Ebuninzini babacebisi kukho okufezwayo.” Noko ke, khumbula ukuba indoda eyathetha loo mazwi, enguSolomon, kamva yavumela ‘abafazi bayo bayityekisela intliziyo yayo ekulandeleni thixo bambi’ kuba yasilela ukuthobela isiluleko sikaThixo sokuba ingathabathi abafazi bezinye iintlanga. (1 Kum. 11:1-4) Ngoko ukuba asisithobeli isiluleko sobulumko, singakulindela njani ukuphumelela enkonzweni kaYehova okanye sibe yimizekelo yokuxeliswa? (1 Tim. 4:15) Isiluleko seBhayibhile siya kusinceda silondoloze intliziyo yethu. (IMize. 4:23) Ezona zinto zisikhuselayo kukuthanda oko uYehova akuthandayo, sithiye akuthiyileyo, sifune ngokuzingisileyo ulwalathiso lwakhe nokwenza okumkholisayo.—IMize. 8:13; Yoh. 8:29; Heb. 1:9.
5 Unqulo lwethu kuYehova aluzenzekeli, alukokuhlonel’ uThixo okufana nokwabo bazibabaza bengamaKristu ehlabathini, kodwa lunentshukumisa, luyasebenza, yaye luyaphila ngokuvisisana nenyaniso efumaneka eLizwini likaThixo.—Yoh. 4:23, 24.
6 Usukelo lwethu lokwenza ukuthanda kukaThixo lusenokuvavanywa mihla le. Sifanele somelezwe kukwazi ukuba ‘abazalwana bethu ehlabathini’ bajamelana neengxaki ezifanayo yaye nguYehova oya kusomeleza. (1 Pet. 5:9, 10) Ngaloo ndlela siya kukwazi ukubuzalisa ubulungiseleli bethu ebudeni bonyaka wenkonzo we-1994.—2 Tim. 4:5.