Ukuqalisa Izifundo ZeBhayibhile Zamakhaya
1 Amanye awona mava anomvuzo nawanelisayo kumaKristu okwenyaniso kukufundisa ubani inyaniso ngesifundo seBhayibhile sekhaya. Sekunjalo, bambi basenokuba abananxaxheba kule nxalenye yobulungiseleli inomvuzo neyanelisayo kuba bavakalelwa kukuba abakwazi ukuqalisa nokuqhuba isifundo seBhayibhile. Inkoliso yabavakalisi noovulindlela abaphumelelayo bakhe bavakalelwa ngolo hlobo. Noko ke, ngokuthembela kuYehova nangokusebenzisa amacebiso akuBulungiseleli Bethu BoBukumkani, bafunda indlela yokuqalisa nokuqhuba izifundo zeBhayibhile, yaye balwandisa uvuyo lwabo kubulungiseleli. Nawe unokuba nosukelo olunjalo.
2 Ukusebenzisa Indlela Engqalileyo Namaphecana: Enye yezona ndlela zilula zokuqalisa isifundo yindlela engqalileyo. Into abanye abantu abayifunayo kukucelwa ngokufudumeleyo ukuba bafunde iBhayibhile. Oku kunokwenziwa ngokubuza oku kumninimzi: “Ungathanda ukuba nesifundo seBhayibhile sekhaya uze wandise ulwazi lwakho ngeBhayibhile nangenjongo kaThixo ngomhlaba?” Okanye unokuxelela umninimzi ukuba uya kukuvuyela ukumbonisa indlela esiqhutywa ngayo isifundo seBhayibhile sekhaya. Nakubeni abaninzi besenokukuchasa oku, cinga ngovuyo oya kuba nalo ukuba ufumana ubani okwamkelayo!
3 Enye indlela yokuqalisa isifundo seBhayibhile kukusebenzisa elinye lamaphecana ethu. Nangona emancinane, anikela isigidimi esinamandla neseyisayo. Sinokuqaliswa njani isifundo kwiphecana? Kuphela ngokunika umninimzi iphecana okholelwa ukuba uya kuba nomdla kulo. Wandule ke, uqalise ngokucela umninimzi afunde isiqendu sokuqala kunye nawe. Hlolisisa izibhalo ezicatshuliweyo, uze uxubushe indlela ezidibana ngayo nalo mbandela. Kutyelelo lokuqala, usenokuqwalasela kuphela isiqendu esinye okanye ezibini. Xa umninimzi eqonda ukuba ufunda izinto ezinika umdla eBhayibhileni, usenokukwazi ukulandisa ixesha olichitha kwingxubusho yenu.
4 Ukusebenzisa IBhayibhile Kuphela: Maxa wambi umntu usenokuvuma ukuxubusha iBhayibhile kodwa abonakale emadolw’ anzima ukwamkela isifundo esicwangcisiweyo okanye ukusebenzisa enye yeempapasho zethu. Sekunjalo unokuqalisa uze uqhube isifundo seBhayibhile ngokulungiselela ingxubusho yeZibhalo enik’ umdla esekelwe kumacandelo athile encwadi ethi Unokuphila Ngonaphakade okanye ethi Ukuqiqa kodwa usebenzisa iBhayibhile kuphela xa ubuyela kuloo mntu unomdla. Iingxubusho ezinjalo zisenokuthabatha imizuzu eli-15 okanye engama-20, okanye ngaphezulu, kuxhomekeka kwiimeko. Ukuba oku ukwenza rhoqo nangendlela enenkqubela yokufundisa iinyaniso zeBhayibhile, uya kuba uqalise isifundo seBhayibhile, yaye unokufaka ingxelo yaso. Xa kufanelekile, hambisa incwadi ethi Unokuphila Ngonaphakade, uze uqhube isifundo esicwangcisiweyo kuyo.
5 Ukongezelela ekufumaneni amathuba entsimini, ngaba ukhe wazama ukuqalisa izifundo zeBhayibhile kubamelwane, izihlobo, okanye amalungu entsapho? Ngaba wakwenza kudala oko? Ngaba ukhe wakuzama kwakhona kutshanje? Ukuba enye indlela ayizange isebenze, ngaba ukhe wacinga ngokuzama enye?
6 Uya kuphumelela ekuqaliseni izifundo ukuba usebenzisa la macebiso anikelweyo, uyazingisa kwinkonzo yasentsimini, uze uthembele kwintsikelelo kaYehova. Ungaze uwajongele phantsi amandla enyaniso noncedo olunikelwa nguYehova. Ngamana ungalwandisa uvuyo lwakho kubulungiseleli ngokuqalisa nokuqhuba izifundo zeBhayibhile.