Lutsha—Vuyisani Intliziyo KaYehova

¹ Xa ubani esebenzisa amandla nokudlamka kobutsha ngendlela elungileyo, ubomi bunokonwabisa ngokwenene. UKumkani uSolomon osisilumko wabhala oku: “Vuya, ndodana, ebutsheni bakho, ikuchwayithise intliziyo yakho ngemihla yobudodana bakho.” (INtshu. 11:9) Nina bantu baselula niya kuphendula kuThixo ngezenzo zenu.

² Indlela enibuphila ngayo ubomi benu ayichaphazeli nina kuphela kodwa ichaphazela kwanabazali benu. IMizekeliso 10:1 ithi: “Unyana olumkileyo uyamvuyisa uyise; ke unyana osisiyatha usisingqala sonina.” Kodwa okubaluleke nangakumbi kukuba, indlela enibuphila ngayo ubomi benu iyamchaphazela uMdali wenu, uYehova uThixo. Kungenxa yoko iMizekeliso 27:11 ikwakhuthaza abaselula ngokuthi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.” Nina baselula ninokuyivuyisa njani intliziyo kaYehova namhlanje? Oku kusenokuphunyezwa ngeendlela ezininzi.

³ Ngomzekelo Ofanelekileyo: Nina bantu baselula niphila ‘kumaxesha anomngcipheko’ axelwa kwangaphambili eLizwini likaThixo. (2 Tim. 3:1) Nisenokuba niphantsi kwengcinezelo yabantwana abangakholwayo enifunda nabo kwaneyabafundisi-ntsapho abasenokuzigculela iimbono zenu ezisekelwe eBhayibhileni. Ngokomzekelo, omnye umfundisi-ntsapho wathi ingcamango yendaleko iyinyaniso yaye iBhayibhile iyintsomi. Noko ke, umvakalisi oselula owayekwelo gumbi lokufundela ngokunyanisekileyo wayithethelela iBhayibhile. Ngenxa yoko, kwaqaliswa izifundo zeBhayibhile eziliqela. Abanye abanomdla baqalisa ukuya kwiintlanganiso. Ukholo lwenu bazalwana noodade abaselula luyaligweba ihlabathi elingahloneli Thixo luze lutsalele abantliziyo zinyanisekileyo enyanisweni.—Thelekisa amaHebhere 11:7.

⁴ Ngaba unokukhuthaza oontanga bakho ebandleni khon’ ukuze bangeyeli kokubi? Ngokumisela umzekelo omhle esikolweni, ekhaya nasebandleni, usenokomeleza ukholo lwabanye abavakalisi abaselula. (Roma 1:12) Vuyisa intliziyo kaYehova ngokubamisela umzekelo abanye.

⁵ Ngesinxibo Nangokuzilungisa: Omnye udade oselula wayehlekwa yaye egculelwa kuba enxiba ngokundilisekileyo yaye kwakusithiwa “ngungcwele-ngcwele.” Oku akuzange kumoyikise kuze kumenze aphile ngokwemilinganiselo yehlabathi elingahloneli Thixo. Kunoko, wachaza ukuba wayengomnye wamaNgqina kaYehova yaye wayegcina umlinganiselo ophakamileyo wamaNgqina. Ngaba ninenkalipho enjalo? Okanye ngaba nivumela ihlabathi likaSathana linasulele ngendlela yalo yokucinga neyokuziphatha? Hayi indlela ekuvuyisa ngayo ukubona abaninzi benu baselula bethobela imfundiso kaYehova yaye bechasa izimbo zobuxelegu, iifashoni, izithixo neemfundiso zeli hlabathi. Ngokwenene, simele siqonde ukuba ezo zinto zehlabathi ziphenjelelwa ziidemon!—1 Tim. 4:1.

⁶ Ngendlela Enizonwabisa Nenizihlaziya Ngayo: Abazali bafanele bakhumbule ukuba kufuneka bancede abantwana babo balukhethe ngobulumko uhlobo olufanelekileyo lokuzonwabisa nokuzihlaziya. Omnye umzalwana wayincoma kakhulu enye intsapho elungileyo awayithanda gqitha. Kuba babecinga ngezinto zokomoya, abazali banikela ukhokelo ababelusebenzisa nasekuzihlaziyeni kwentsapho. Lo mzalwana wathi: ‘Ndiyayithanda into yokuba besenza izinto kunye. Aba bazali abapheleli nje ekuncedeni abantwana babo balungiselele inkonzo, kodwa xa kulixesha lokuzihlaziya, bayakuvuyela ukubethwa ngumoya, ukutyelela iimyuziyam, okanye ukuhlala ekhaya bedlala okanye besenza umsebenzi othile. Ukuthandana kwabo nokuthanda abanye kwenza uzive uqinisekile ukuba baya kuhamba enyanisweni kwixesha elizayo, nokuba sekumnyam’ entla.’

⁷ Kakade ke, kukho amaxesha axa kungenzeki ukuba yonke intsapho izihlaziye okanye izonwabise. Nina baselula kufuneka nikwazi oku nobunzulu bokukhetha indlela eniya kulichitha ngayo ixesha eningenzi nto ngalo. USathana uzimisele ekukhohliseni abaninzi kangangoko kunokwenzeka. Abaselula nabangenamava bangamaxhoba akhethekileyo ezenzo zakhe ezichuliweyo nezikhohlisayo. (2 Kor. 11:3; Efe. 6:11) Ngoko namhlanje uSathana usebenzisa iindlela ezahlukahlukeneyo zokunihendela ekubeni niphambuke nize nilandele ikhondo lobomi lokuzingca lokufuna ukuziyolisa nelokungalungisi.

⁸ Umabonwakude ungoyena mlukuhli mkhulu okhuthaza indlela yobomi yokuthanda izinto eziphathekayo nokuziphatha okubi. Imifanekiso eshukumayo neevideo ngokufuthi zibalaselisa ugonyamelo nesini ngokuphandle. Umculo othandwayo uye ngokwandayo wangothob’ isidima nongcolileyo. Imigibe kaSathana isenokubonakala imsulwa, sekunjalo iye yabangela amawaka olutsha olungamaKristu ekubeni awele ekucingeni nakwihambo ephosakeleyo. Ukuze nixhathise iingcinezelo ezinjalo, nimele nilandele ikhondo lobulungisa ngamandla. (2 Tim. 2:22) Ukuba kufuneka uhlengahlengiso kwindlela enicinga ngayo okanye kwihambo yenu ngokuphathelele ukuzonwabisa nokuzihlaziya, ninokukwenza njani oku? Umdumisi uyaphendula: “Ndiya kuquqela kuwe ngentliziyo yam yonke; musa ukundilahlekanisa nemithetho yakho.”—INdu. 119:10.

⁹ Ukunqula amaqhawe ezemidlalo nawezolonwabo kuyinto eqhelekileyo. Ukoyika uYehova kuya kuninceda ninganquli abantu abangafezekanga. Kwanokuziphatha okubi ngokwesini kuyanqulwa ngabaninzi namhlanje. Nisenokululumkela olu tyekelo ngokuphepha imifanekiso ebonisa amanyala nomculo owonakalisayo. Ngokuphathelele umculo, inkupho yeMboniselo ka-Aprili 15, 1993, yathi: “Umculo sisipho esivela kuThixo. Noko ke, kwabaninzi uba yinto engakhiyo abachitha ixesha labo ngayo. . . . Kwenze usukelo lwakho ukugcina umculo ukwindawo yawo uze wenze umsebenzi kaYehova ube yeyona nto iphambili oyixhalabeleyo. Wukhethe uze uwulumkele umculo owuthandayo. Ngaloo ndlela uya kukwazi ukusisebenzisa—ungasisebenzisi kakubi—esi sipho sivela kuThixo.”

¹⁰ Hlakulelani ukukuthiya ngokupheleleyo okubi. (INdu. 97:10) Xa nilingelwa ekwenzeni okubi, cingani ngendlela uYehova akujonga ngayo oko, yaye cingani ngemiphumo: ukumitha okungafunwayo, izifo ezidluliselwa ngeentlobano zesini, ukukhathazeka, ukuphelelwa kukuzihlonela nokuphulukana namalungelo ebandleni. Kuphepheni ukuzichanaba kwiinkqubo zikamabonwakude, imifanekiso eshukumayo, iivideo, iingoma okanye iincoko ezikhuthaza ubungendawo. Kuphepheni ukunxulumana nabo iBhayibhile ithi ‘zizinyabi.’ (IMize. 13:19) Yibani ngabakhethayo; khethani ukunxulumana ngokusondeleyo nabo basebandleni abathanda uYehova nemilinganiselo yakhe yobulungisa.

¹¹ Ewe, ulutsha olufuna ngokwenene ukuvuyisa intliziyo kaYehova luya kuthobela isiluleko esihle esifumaneka kwabase-Efese 5:15, 16: “Khangelani ngoko, ukuba ningathini na, ukuze kucokiseke ukuhamba kwenu; ningabi njengabaswele ubulumko, yibani njengezilumko; nizongela ixesha eli, ngokuba le mihla ayindawo.” Yintoni eya kuninceda nihlale ‘nikhangele’ kwinkqubela yenu kule mihla yokugqibela?

¹² Ukunyamekela Iintswelo Zokomoya: KuMateyu 5:3 (NW ), uYesu wathi: “Banoyolo abo bayiphapheleyo intswelo yabo yokomoya.” Nani ninokuba noyolo ngokuphaphela intswelo yenu yokomoya. Ukuzalisa loo ntswelo kuquka ukuba nesabelo ngokunenzondelelo ekushumayeleni iindaba ezilungileyo, ekubeni oku kusakha ukholo lwethu kwizinto esizifundayo.—Roma 10:17.

¹³ Ngokusuka kumava obuqu niyazi ukuba akusoloko kulula ukuba nesabelo ngokuthe rhoqo kubulungiseleli. Ngokukodwa oku kusenokubangelwa kukungazithembi. Ngaloo ndlela, kufuneka nizimisele. Ngokuba nesabelo kubulungiseleli ngokuthe rhoqo, niya kuphucula ubuchule benu bokunikela ubungqina nize nibe nentembelo ngobuchule benu bokushumayela.

¹⁴ Yenzani amalungiselelo okusebenza nabavakalisi abanamava ngakumbi ebandleni, njengoovulindlela abathe ngxi nabadala. Ziphulaphuleni ngenyameko iintshumayelo zabo nendlela abasabela ngayo xa bechaswa emzini. Yisebenziseni kakuhle incwadi Ukuqiqa namacebiso anikelwa kuBulungiseleli Bethu BoBukumkani. Kungabanga thuba lide niya kufumana uvuyo olungakumbi kubulungiseleli ngenxa yokuba ninikela konke eninako kuYehova.—IZe. 20:35.

¹⁵ Abanye baye bakwazi ukusebenzisa amathuba okunikela ubungqina esikolweni yaye baye baphumelela ekwenzeni abafundi. (Mat. 28:19, 20) Omnye umKristu oselula uthi: “Xa singenzi nto kwigumbi lokufundela, ndiba namathuba amaninzi okunikela ubungqina, ngokukodwa ngamaxesha eeholide zehlabathi. Xa ndashiya iimpapasho zeBhayibhile phezu kwedesika yam apho abanye babenokuzibona, abafundi abaninzi abanomdla beza kum.” Ekugqibeleni, iqela labafundi kuquka nomfundisi-ntsapho laqalisa ukuya kwiintlanganiso zamaKristu. Enyanisweni, umfundisi-ntsapho uye wenza inkqubela ukusa kwinqanaba lokuba liNgqina elizahluleleyo. UYehova uvuya gqitha xa abanquli abaselula njengani bezukisa igama lakhe.

¹⁶ Enye indlela yokwanelisa intswelo yenu yokomoya kukuba nesifundo sobuqu. Ukuze sivuyise intliziyo kaYehova, simele sizuze ulwazi ngaye, ngeenjongo zakhe nezinto azifunayo kuthi. Ngaba nibeka bucala ixesha lofundisiso lobuqu? Ngaba nifundisisa ngokuthe rhoqo, kanye njengokuba nizinika ixesha lokutya ngokuthe rhoqo? (Yoh. 17:3) Ngaba ninalo ucwangciso lobuqu lokufunda iBhayibhile ukongezelela ekuzameni ukuhambisana nocwangciso lokufunda iBhayibhile kwiSikolo Sobulungiseleli Sobuthixo? Ngaba nizilungiselela kakuhle zonke iintlanganiso? Ngaba nilifunda ngokuthe rhoqo iphephancwadi IMboniselo noVukani!? Ngokukodwa, ngaba nizinika ixesha lokufunda nqaku ngalinye kungcelele oluthi “Abantu Abaselula Bayabuza . . . ,” ngenyameko nifunda sibhalo ngasinye? Yaye ningayilibali incwadi uMbutho oyilungiselele iintswelo zenu zokomoya ngokukhethekileyo ethi, Imibuzo Yabantu Abaselula—Iimpendulo Eziluncedo. Ulutsha olungamaKristu nabazali balo ehlabathini lonke luye lwabhala lubulela indlela le ncwadi eluncede ngayo lwasondela kuYehova.

¹⁷ Xa nifunda iBhayibhile neencwadi zobuthixo zokufundisisa iBhayibhile, zinixelela ngoYehova, iingcinga zakhe neenjongo zakhe. Cingani ngendlela le nkcazelo eya kuba luncedo ngayo kuni. Nxulumanisani oko nikufundayo noko nikufunde ngaphambili. Oku kuquka ukucamngca. Ukucamngca kuvumela inkcazelo ukuba ifikelele intliziyo ize inikhuthaze.—INdu. 77:12.

¹⁸ Siyakuvuyela ukubona abaselula abayiphapheleyo intswelo yabo yokomoya besibakho kwiintlanganiso zebandla. Nina lutsha lungamaKristu ninokubakhuthaza abanye ngokunikela amagqabaza anentsingiselo ngokuthe rhoqo ebudeni beentlanganiso. Ubuncinane zenzeleni usukelo lokugqabaza kube kanye kwintlanganiso nganye. Hlakulelani ulwalamano olufudumeleyo nabo bonke abantu abakubudala obahlukahlukeneyo ebandleni ngonxulumano olwakhayo ngaphambi nasemva kweentlanganiso. (Heb. 10:24, 25) Omnye umzalwana oselula wachaza ukuba abazali bakhe bamkhuthaza ukuba ancokole ubuncinane nomzalwana okanye udade omnye okhulileyo kwintlanganiso nganye. Namhlanje uyawaxabisa amava awazuze ngokunxulumana namalungu akhulileyo ebandla.

¹⁹ Zibekeleni Usukelo Lokomoya: Ilusizi into yokuba ulutsha oluninzi luphila ubomi obungenanjongo nalwalathiso. Noko ke, ngaba akuyonto ilungileyo ukuba nemvakalelo ebangelwa kukuzibekela usukelo lobuthixo nize nilufikelele ngokunempumelelo? Olu sukelo, olunokufikelelwa ngoncedo lwemfundo yobuthixo, luya kwanelisa ngokobuqu ngoku ibe ekugqibeleni luya kukhokelela kusindiso lukanaphakade.—INtshu. 12:1, 13.

²⁰ Xa uzibekela usukelo, thandaza. Thetha nabazali bakho nabadala. Zihlolisise wena namandla akho, uze uzibekele usukelo olusengqiqweni ngokuvisisana noko unako ukukuphumeza kungekhona ngokuzithelekisa nomnye umntu. Wonk’ ubani wenziwe ngokwahlukileyo—ngokomzimba, engqondweni, ngokweemvakalelo nangokomoya. Ngoko ke, musa ukulindela ukuphumeza yonke into omnye ayiphumezayo.

²¹ Luluphi olunye usukelo onokulufikelela? Ukuba awukabi ngumvakalisi okanye awukabhaptizwa, kutheni ungenzi oku usukelo lwakho. Ukuba ungumvakalisi, usenokuzenzela usukelo lokuchitha ixesha elithile kubulungiseleli veki nganye. Sebenzela ekubeni ngumfundisi onobuchule kumabuyelo, yaye kwenze usukelo lwakho ukuqhuba isifundo seBhayibhile. Ukuba ungoselula obhaptiziweyo osahamba isikolo, kutheni ungazenzeli usukelo lokuba nguvulindlela ongumncedani ebudeni beenyanga zehlobo? Kukho “okuninzi okunokwenziwa kumsebenzi weNkosi.”—1 Kor. 15:58, NW.

²² Uncedo Lwabazali Lubalulekile: Ulutsha ebandleni alufanele luvakalelwe kukuba lulodwa kwimigudu yalo yokuzuza ubomi. UYehova, ngentlangano yakhe, unikele isiluleko sokunceda aba baselula ekwenzeni izigqibo zemihla ngemihla nasekoyiseni imiqobo ebomini. Kakade ke, abazali abazahluleleyo banembopheleleko eyintloko yokunceda abantwana babo benze izigqibo ezifanelekileyo. Kweyoku-1 kwabaseKorinte 11:3, iBhayibhile ithi indoda yintloko yentsapho. Ngoko ke, kwintsapho yamaKristu, umfazi esebenzisana ngokusondeleyo naye, ubawo uyakhokela ekufundiseni abantwana imiyalelo kaThixo. (Efe. 6:4) Oku kwenziwa ngokubaqeqesha ngenyameko ukususela ebusaneni. Ekubeni ingqondo yomntwana ikhula ngokuphindwe kathathu ebudeni beminyaka yokuqala yobomi, abazali abafanele baweye amandla okufunda osana lwabo. (2 Tim. 3:15) Njengokuba abantwana bekhula, kufuneka abazali babafundise ngokuqhubekayo bathande uYehova baze bahlakulele ulwalamano olulungileyo naye.

²³ Eyona nto bamele baqale ngayo kukumisela umzekelo omhle njengabazali. Oku kuya kubanceda ngakumbi abantwana bakho ngokomoya kunokuchitha ixesha elininzi ubaxelela ngoko bafanele okanye bangafanele bakwenze. Ukumisela umzekelo ofanelekileyo njengabazali kuya kuquka ukubonakalisa iziqhamo zomoya ekhaya, kwiqabane lakho nasebantwaneni bakho. (Gal. 5:22, 23) Abaninzi baye babona ngokusuka kumava ukuba umoya kaThixo uyimpembelelo enamandla ekwenzeni okulungileyo. Unokukunceda ekuxonxeni iingqondo neentliziyo zabantwana bakho.

²⁴ Kwakhona kufuneka abazali bamisele umzekelo omhle kwimikhwa yofundisiso lobuqu, ukuya kwiintlanganiso nokuba nenxaxheba ngokuthe rhoqo kubulungiseleli basentsimini. Ukuba nithetha ngenyaniso ngehlombe ekhaya, nikhokela ngenzondelelo kubulungiseleli, yaye niyaluthanda ufundisiso lobuqu, oko kuya kubakhuthaza abantwana benu babe nomdla ngokunyanisekileyo kwimibandela yokomoya.

²⁵ Xa silungiselelwe kakuhle, isifundo seBhayibhile sentsapho esithe rhoqo nesinenjongo sinokubangela umdla size sinandipheke, sibe lixesha lokomeleza umanyano lwentsapho. Zinike ixesha lokufikelela iintliziyo zabantwana bakho. (IMize. 23:15) Ngoxa iintsapho ezininzi zisebenzisa esi sihlandlo ukuze zilungiselele iSifundo seMboniselo seeveki ngeeveki, izihlandlo ezininzi kusenokukhuthaza ukuqwalasela intswelo ethile yentsapho. Ukubuza imibuzo efuna imbono nokuphulaphula kumagqabaza elungu ngalinye lentsapho kuya kufundisa kuze kuhlaziye. Ukuqhuba isifundo esiyingenelo kwilungu ngalinye lentsapho kulucelomngeni lokwenene kwintloko-ntsapho. Kodwa hayi indlela ekuvuza ngayo xa onke ekhula ngokomoya! Ngokugcina wonk’ ubani ebandakanyekile, kuya kwesamela umoya ovuyisayo.

²⁶ Ingqeqesho yenu yothando, nekhethekileyo ibalulekile ngoku ukuze nisindise ubomi babantwana benu. (IMize. 22:6) Ninoku engqondweni, kulula ukuqonda ukuba le kusenokuba yeyona mfundiso ibalulekileyo eninokuyinikela. Ningaze nicinge ukuba ninedwa kulo msebenzi ukhethekileyo nobalulekileyo. Fundani ukuthembela ngokunzulu ngoYehova ukuze nifumane ukhokelo ekunyamekeleni iimbopheleleko zentsapho yenu. Akuphelelanga apho. Kukho nabanye abanokuba luncedo.

²⁷ Oko Kunokwenziwa Ngabanye Ukuze Bancede: Abadala basenokuquka abantu abaselula, nabazali babo, ekucoceni iHolo yoBukumkani. Bakhuthazeni abantwana kwiintlanganiso zebandla. Abadala nezicaka zolungiselelo abanezabelo kwinxalenye yeNtlanganiso yeNkonzo bafanele bakhangele izandla zabantwana eziphakanyisiweyo xa kukho iinxalenye abaphulaphuli abanenxaxheba kuzo. Khangelani amathuba ukuze nisebenzise abaselula abangumzekelo kwimiboniso nabazali babo. Kusenokudliwan’ iindlebe nabanye baze benze amagqabaza amafutshane.

²⁸ Musani ukungayisiso imigudu yabo. Abantu abaselula baye bangqineka beluncedo lokwenene ebandleni. Ngehambo yabo entle, abaninzi baye ‘bayivathisa imfundiso yoMsindisi wethu uThixo.’ (Tito 2:6-10) Yiphapheleni imfuneko yokuncoma abaselula abanenxaxheba kwanakwizinto ezincinane. Oku kubakhuthazela ukuba balungiselele baze babe nomnqweno wokuphinda kwakhona kwixesha elizayo. Umdla onjalo ubalulekile; uxabiseke gqitha. Wena njengomdala okanye isicaka solungiselelo uye kangaphi kumalungu aselula ebandla ngenjongo yokuwancoma ngentetho okanye umboniso kwiintlanganiso?

²⁹ Boovulindlela, yintoni eninokuyenza ukuze nincede? Kutheni ningaphindi nihlolisise ucwangciso lwenu ukuze nibone indlela yokuquka abantwana besikolo kumalungiselelo enu ngeemva kwemini nangeempela-veki? Ngaba nithetha ngokufanelekileyo ngokhetho lwenu lwenkonzo yexesha elizeleyo? Ngaba nibonisa ngembonakalo yenu yobuso ukuba nifumana uvuyo kubulungiseleli benu? Ngaba niyabuncomela kwabanye, ngokukodwa abaselula? Xa nisebenza kwindlu ngendlu, ngaba intetho yenu iyakha yaye ifanelekile? Ukuba kunjalo, ngoko nawe njengovulindlela unesabelo kulo msebenzi wokuqeqesha ubaluleke kangaka.

³⁰ Bonke ebandleni bafanele ngenkuthalo bawuphaphele lo msebenzi ubalulekileyo wokuqeqesha abaselula. Ngaba unokwenza amalungiselelo aqinisekileyo okusebenza nabo kubulungiseleli basentsimini? Ngaba unokuqhelisela intshumayelo nabo ekulungiseleleni umsebenzi wendlu ngendlu? Ngaba uwaphaphele amathuba okukhuthaza imisebenzi yokomoya yexesha elizayo xa usebenza nabo kubulungiseleli? Mvakalisi ngamnye ufanele aqonde ukuba kwanamagqabaza amafutshane anokuvelisa iingcinga ezintle ngosukelo lokomoya lobomi bonke, nto leyo eya kuba yingenelo kanaphakade kumntu oselula.

³¹ Abantu Abaselula Banokuzinceda: Lutsha, sikhuthaza ngamnye wenu ukuba aqhubeke ethobela imfundiso kaYehova aze akuchase oko kunikelwa lihlabathi. Ngokuqhubekayo zivavanyeni ngokuhlolisisa ihambo neemvakalelo zenu zangaphakathi. Sinjani isimo senu sengqondo ngakuYehova nakoko akulindeleyo kuni kubomi bemihla ngemihla? Ngaba nilwa ngamandla nxamnye nempembelelo yeengcamango zikaSathana? (1 Tim. 6:12) Ekubeni abantu, ngokukodwa ulutsha, ngokwemvelo lunqwenela ukwamkeleka koontanga balo, ngaba nizifumanisa nihendelwa ekulandeleni isininzi ekwenzeni okubi? (Eks. 23:2) Umpostile uPawulos wayeqonda ukuba kukho ingcinezelo enkulu yokuzivisisanisa neendlela zehlabathi.—Roma 7:21-23.

³² Kufuneka inkalipho ukuze nixhathise impembelelo yehlabathi, nahluke koontanga benu behlabathi nize nithobele imfundiso kaThixo. Amadoda amandulo enjenjalo ngempumelelo enkulu. Khanicinge ngenkalipho kaNowa. Waligweba ihlabathi liphela ngokholo lwakhe nangokungazidibanisi nabenzi bobubi bexesha lakhe. (Heb. 11:7) Yilwani ngamandla kuba kuwufanele umgudu. Musani ukuxelisa ababuthathaka, abangenamandla okuxhathisa, abangamagwala abalandela isininzi sikaSathana. Ngokuchasene noko, nxulumanani nabo uYehova akholiswayo ngabo. (Fil. 3:17) Yibani phakathi kwezinxulumani eziya kungena nani kwihlabathi elitsha likaThixo. (Fil. 1:27) Khumbulani ukuba inye kuphela indlela ekhokelela kubomi obungunaphakade.—Mat. 7:13, 14.

³³ Ukuba siyavuya xa sibona ulutsha lusizisa indumiso nozuko kuThixo wethu, hayi indlela okumele ukuba oku kumvuyisa ngayo! Alithandabuzeki elokuba uYehova uyavuya xa ebona abantu abaselula besiba nesabelo ngokupheleleyo ekuvakaliseni iinjongo zakhe ezizukileyo. ‘Balilifa’ elivela kuye, yaye ubanqwenelela okona kulungileyo kuphela. (INdu. 127:3-5; 128:3-6) Ebonisa umdla kaYise, uKristu Yesu wayekuvuyela kakhulu ukunxulumana nabantwana abaselula, yaye wayezinika ixesha ebakhuthaza ekunquleni kwabo uYehova. Wabonakalisa umsa onothando ngabo. (Marko 9:36, 37; 10:13-16) Ngaba ulutsha lwethu silujonga ngendlela uYehova noKristu Yesu abalujonga ngayo? Ngaba abantu abaselula ebandleni lethu bayayazi indlela uYehova nezithunywa zezulu abakujonga ngayo ukunyaniseka nomzekelo wabo omhle? Bafanele banconywe baze bakhuthazwe ukuba bavuyise uYehova ngokuzibekela usukelo lokomoya. Lutsha, zibekeleni usukelo oluya kunizisela iintsikelelo ngoku nakwikamva.