Buyela Apho Ufumene Umdla
1 Abaninzi bethu baphumelele ekusasazeni amaphephancwadi neencwadana ezinemifanekiso. Kubalulekile ukuba sibuyele size sizame ukukhuthaza umdla ongakumbi. Ukuphumelela kwethu ekwenzeni oko kuya kuxhomekeka kwindlela esilungiselela ngayo ngaphambi kokuba sibuyele.
2 Khumbula ukuba inkoliso yabantu abaselula ixhalabele izinto ezifanayo nezabantu abakhulu. Inkupho kaVukani! kaMeyi nekaJuni inamanqaku ahlolisisa iingxaki ezikhoyo zabantu abaselula. La manqaku anikela ukuqonda okunokunceda abaselula nabazali babo, baqonde okubaluleke ngokwenene ebomini.
3 Ukuba ubuhambise u-“Vukani!” kaMeyi 8, usenokuceba ukuhambisa emva kwakhe inkupho kaJuni 8. Unokuthi:
◼ “Inkupho endikushiyele yona kwixa elidluleyo ibinenqaku elixubusha ngethemba ngabantwana. Abantu abaselula bethu bakhulela kwihlabathi elinganikeli themba ngekamva. Abaninzi kubo babonisa ingqumbo yabo ngokuvukela. Kodwa bakho abathile abalungeleleneyo nabaneenjongo eziphakamileyo. Eli nqaku likuVukani! wakutshanje lichaza indlela inkundla ephakamileyo ekuxhasa ngayo ukuma komnye okwishumi elivisayo. Ndicinga ukuba uya kukuxabisa oko likuthethayo.”
4 Usenokugqiba kwelokuba uhambise incwadana enemifanekiso usebenzisa le ntshayelelo:
◼ “Kwixa elidluleyo ndiyinandiphile ingxubusho yethu emfutshane engekamva lalo mhlaba. Ucinga ukuba ubomi buya kuba njani apha xa uThixo ephelisa ubungendawo nokubandezeleka? [Mbonise umfanekiso okwiphepha 31 kwincwadana enemifanekiso ethi Iyintoni Injongo Yobomi—Unokuyifumana Njani?] Phawula zonke ezi ndinyana zeBhayibhile zikwiphepha 29 nelama-30 ezichaza iintsikelelo eziya kuziswa buBukumkani bukaThixo. [Khetha isibhalo esinye, uze usifunde ngokungqalileyo kule ncwadana inemifanekiso.] Ndingathanda ukukushiyela yona ngomnikelo weesenti ezingama-90.”
5 Xa ubuyela, mhlawumbi uya kuphawula ukuba umninimzi ufumana uncwadi lonqulo lwakhe yaye uziva anelisekile lulo. Unokuthi:
◼ “Lungakhathaliseki unqulo esikulo, sonke siyachatshazelwa luninzi lweengxaki ezifanayo—ulwaphulo-mthetho, ukugula ngokungaginyisi mathe, izinto ezixhalabisayo zemeko-bume—akunjalo na? [Vumela amagqabaza.] Ngaba uvakalelwa kukuba sikho isicombululo sokwenene kwezi ngxaki? [Funda eyesi-2 kaPetros 3:13.] Injongo yoncwadi lwethu ichazwe kwiphepha 2 leMboniselo. [Funda isivakalisi osikhethileyo sibe sinye okanye zibe zibini.] Abantu abaninzi abangengomaNgqina kaYehova bayakunandipha ukufunda uncwadi lwethu ngenxa yesigidimi sethemba esikulo, esisekelwe eBhayibhileni.” Ukuba umninimzi unomdla, cacisa inkqubo yethu yesifundo seBhayibhile uze umhambisele amaphephancwadi akutshanje.
6 Usenokusebenzisa le ntshayelelo:
◼ “Ukugqibela kwam ukuza apha, sithethe ngethemba lekamva lehlabathi lethu. Ucinga ntoni ngale ngxelo? [Khankanya okuthile okuxhalabisayo okuphume kwiindaba zakutshanje.] Xa abantu besiva izinto ezifana nezo, kubenza bazibuze oko liya kuba kuko eli hlabathi, akunjalo na? Sikholelwa kwelokuba izinto ezinjalo zibonisa ukuba siphila ‘kwimihla yokugqibela’ eyaxelwa kwangaphambili eBhayibhileni kweyesi-2 kuTimoti 3:1-5.” Emva kokufunda iimbalasane, unokumbuza enoba ukhe wababona na abantu abafana nabo bachaziweyo. Qhubeka ngokuxubusha omnye wemixholwana ekwiphepha 135-40 kwincwadi Ukuqiqa.
7 Ukuba silungiselela kakuhle yaye sibonisa umnqweno wokwenene wokunceda, sinokuba nentembelo yokuba abantliziyo zinyanisekileyo baya kuphulaphula.—Yoh. 10:27, 28.