Ngaba Ndifanele Ndiqhubeke Nditshintshatshintsha?
Zonke iinkupho zoBulungiseleli Bethu BoBukumkani zinikela iintshumayelo ezahlukahlukeneyo ezingokweZibhalo esinokuzisebenzisa xa sinikela ubungqina. Abavakalisi abaninzi abakhuthele ngokwenene bayakulangazelela ukufumana iimbono ezintsha nokusebenzisa iintshayelelo ezahlukeneyo. UBulungiseleli Bethu BoBukumkani buhlangabezana nentswelo yabo ngokunikela amacebiso ahlukeneyo nyanga nganye.
Noko ke, kusenokuba uvakalelwa kukuba akuyomfuneko ukuba uqhubeke ukutshintshatshintsha oko ukusebenzisayo. Usenokuba nyanga nganye uneeyure ezimbalwa zokuba nesabelo kumsebenzi wendlu ngendlu. Njengokuba ixesha lihamba, usenokuba uzakhele iintshumayelo ezithile owanelisekayo zizo, yaye xa uzisebenzisa uba nemiphumo emihle. Usenokuxhomekeka kwizibhalo ezisetyenziswa ngokufuthi, eziquka INdumiso 37:9-11, eyesi-2 kaPetros 3:13, ISityhilelo 21:4 nezinye. Ukuba kunjalo, akuyomfuneko ukuba uzive unyanzelekile ukutshintshela kwenye into ngokuthe rhoqo. Injongo yethu ephambili kukwabelana nabanye ngethemba loBukumkani size sibancede bafunde oko bamele bakwenze ukuze bafanelekele iintsikelelo zikaYehova. Ukuba ufumana iintshumayelo ezisexesheni nezinomtsalane kwincwadi Ukuqiqa okhetha ukuzisebenzisa yaye ufumana intsabelo entle ngokuzisebenzisa, musa ukuthandabuza ukuzisebenzisa.