Ukuba Iyaphumelela, Yisebenzise!
1 UBulungiseleli Bethu BoBukumkani busoloko businika amacebiso ahlukahlukeneyo ngeentshumayelo esinokuzisebenzisa kubulungiseleli. Oku kusinika amacebo amatsha ngendlela yokuvuselel’ umdla kwisigidimi soBukumkani. Kusenokwenzeka ukuba nyanga nganye wenza umgudu wokufunda enye okanye ezingakumbi kwezi ntshumayelo. Noko ke, abanye abavakalisi basenokufumanisa ukuba enye inkupho yoBulungiseleli Bethu BoBukumkani ifika neentshumayelo ezintsha bengekayisebenzisi kuyaphi enye yazo. Ngokuqinisekileyo kusenokungenzeki kumntu wonke ukuba afunde intshumayelo entsha engekayazi engaphambi kwayo.
2 Kakade ke, kukho amawaka oovulindlela nabanye abavakalisi abachitha ixesha elininzi kwinkonzo yasentsimini. Ngaphezu koko, amabandla amaninzi ayigubungela rhoqo ngeeveki yonke intsimi yawo. Phantsi kwezi meko, abavakalisi bayakuxabisa ukufumana iindlela ezintsha zokuqalisa iincoko namacebo okudlulisela isigidimi. Oku kuyabanceda baphucule ubuchule babo. Kwakhona kwenza ubulungiseleli babo bubangele umdla yaye bube neziqhamo ngakumbi yaye kubanceda bahlangabezane nocelomngeni abajamelana nalo.
3 Enoba zinjani na iimeko, ukuba uye walungiselela intshumayelo ephumelelayo ekuhlakuleleni umdla, zama ngandlela zonke ukuba uqhubeke uyisebenzisa! Akuyomfuneko ukuyeka intshumayelo esebenzisekayo nenempumelelo. Unokusuka nje uyenze ivisisane nomnikelo woncwadi waloo nyanga. Njengoko uhlolisisa amacebiso akuBulungiseleli Bethu BoBukumkani, funa iingongoma ezibangel’ umdla osenokufuna ukuzifaka kwintshumayelo yakho.
4 Ngoko xa ufumana inkupho entsha yoBulungiseleli Bethu BoBukumkani, khumbula ukuba iintshumayelo eziquletheyo zingamacebiso nje. Ukuba unako ukuzisebenzisa, kuhle oko. Kodwa ukuba sele uyifumene intshumayelo enempumelelo kwintsimi yenu, yisebenzise! Eyona nto ibalulekileyo ‘kukubufeza ngokuzeleyo ubulungiseleli bakho,’ ukukhangela abo bafanelekayo nokubanceda babe ngabafundi.—2 Tim. 4:5.