Ukubakho Rhoqo Kwiintlanganiso—Kubalulekile Ukuze Sime Siqinile
1 Umpostile uPawulos wasibongoza ukuba sihlale ‘siphilile elukholweni.’ (Tito 1:9, 13) Kwiintlanganiso zebandla sixubusha ngeengongoma ezakhayo yaye sifundiswa indlela yokuhlala sixhobe sonke isikrweqe sokomoya ukuze ‘sime siqinile siwachase amaqhinga kaMtyholi.’—Efe. 6:11, NW; Fil. 4:8.
2 Iintlanganiso Zisinika Esikusweleyo: Ukubakho rhoqo kwiintlanganiso zebandla kubalulekile ukuze somelele. (1 Kor. 16:13) Kwiintlanganiso kuyathandazwa kubulelwa kuze kudunyiswe uThixo, yaye ebongozwa ukuba ancede ibandla anelise neentswelo zalo. (Fil. 4:6, 7) Ukucula iingoma zoBukumkani kuyasivuyisa yaye kusenza sibonise indlela esivakalelwa ngayo njengokuba sinqula uYehova. (Efe. 5:19, 20) Ukunxulumana eHolweni yoBukumkani ngaphambi nasemva kweentlanganiso kuyasikhuthaza, kuyasakha, yaye kuyasihlaziya.—1 Tes. 5:11.
3 NgoAprili intetho ekhethekileyo eyayisithi, “Isiphelo Sonqulo Lobuxoki Sisondele,” yabethelela ezingqondweni zabathandi benyaniso ukuba kungxamisekile ukuba baphume ngokukhawuleza kwiBhabhiloni Enkulu. (ISityhi. 18:4) NgoJuni nangoJulayi, hayi indlela ebekuchwayitisa ngayo ukuhlolisisa amanqaku afundisiswayo amathathu eMboniselo angemitha yokukhanya eqaqambise umendo wamalungisa! (IMize. 4:18) Cinga ngokwakusiphosile ukuba sasingekho kwezo ntlanganiso.
4 Incwadi ethi Ukulungelelaniselwa Ukufeza Ubulungiseleli Bethu kwiphepha 72 ibonisa ukuba iSikolo Sobulungiseleli Sobuthixo sililungiselelo lokufundiswa kwebandla liphela ngokuqhubekayo. Sithetha nje, kukho inxalenye yolu cwangciso esinceda siyazi kakuhle imbali yanamhlanje yentlangano ngokusebenzisa incwadi ethi Abavakalisi. Asimele siphoswe yile mfundo.
5 INtlanganiso yethu Yenkonzo isixhobisela ukuphumelela ngakumbi kubulungiseleli. Oku kwabonakala kakuhle kwintlanganiso esasiyalelwa kuyo ngokuba nesabelo ekusasazeni ngokubanzi iphecana iKingdom News No. 34. UYehova wawusikelela ngokwenene lo msebenzi, oko kubonakala kwimiphumo emihle ngokwenene ehlabathini lonke. (Thelekisa eyesi-2 kwabaseKorinte 9:6, 7.) Abo baya rhoqo kwiintlanganiso bakhuthazwa yaye baba negalelo ekuxhasweni kweli phulo.
6 KwiSifundo Sencwadi Sebandla, sikubona ngakumbi ukungxamiseka ngenxa yezinto esizifunda kwiLizwi likaThixo ngoncedo lwencwadi ethi Incopho YeSityhilelo. Ekubeni iziganeko zehlabathi zingemanga ndawonye, kufuneka sikuqonde ukuzaliseka kweziprofeto ezinzulu zeSityhilelo.
7 Ukubakho Rhoqo Kwiintlanganiso Makuze Kuqala: Kumazwe amaninzi apho abazalwana bethu bathwaxwa ziimvavanyo, basayiqonda indlela ekubaluleke ngayo ukuhlanganisana veki nganye. Ngokomzekelo, eBurundi, eRwanda, eLiberia, eBosnia naseHerzegovina, kwiintlanganiso kubakho abantu abasebatsha abanokuliphinda kabini okanye nakathathu inani labavakalisi. Le yindlela uYehova abanceda ngayo abazalwana bahlale beqinile moyeni mnye.—Fil. 1:27; Heb. 10:23-25.
8 Nabani obengezi rhoqo kwiintlanganiso ufanele azame ngoku ukwahlukana naloo mkhwa. (INtshu. 4:9-12) Ukuze sime siqinile, kufuneka sikhuthazane nabantu abaqolileyo, nto leyo esiyifumana ngokubakho rhoqo kwiintlanganiso.—Roma 1:11.