Amaxesha Ngamanye
1 IBhayibhile isixelela ukuba “imeko yeli hlabathi iyatshintsha.” (1 Kor. 7:31) Hayi indlela okuyinyaniso ngayo oko namhlanje! Kwanakweli xesha siphila kulo, siye sabona iinguqulelo ezinkulu kwindlela yokucinga nakwihambo yabantu bazo zonke iindidi. Ukuze siphumelele ekubafikeleleni ngesigidimi soBukumkani, indlela esishumayela ngayo imele ihambisane nala maxesha ethu atshintshayo. Sifuna ukuzishumayela iindaba ezilungileyo ngendlela ebangel’ umdla nefikelela iintliziyo zabantu.
2 Kwiminyaka edluleyo, umsebenzi wokunikela ubungqina wawahlukile emazweni amaninzi, kuba ubukhulu becala, abantu babeziphilela ubomi ngoxolo, ibe babeziva benqabisekile. Unqulo lwaluhloniphekile ebomini babo. IBhayibhile babeyixabise kakhulu. Ngezo mini ukunikela ubungqina kwakusoloko kubandakanya ukuxoxa ngemibandela engemfundiso. Namhlanje, ubomi babantu abusekho luxolweni. Unqulo seluyinto yentlekisa. Bambalwa abayikholelwayo iBhayibhile. Yaye ingcamango yendaleko, ishiye abaninzi bengakholelwa kuThixo.
3 Omnye umveleli ohambahambayo wathi: “Ngoku, kubonakala ukuba, ubomi babantu buzele ziingxaki nobunzima kangangokuba simele sibafundise indlela yokuziphatha.” Ngokuqhelekileyo eyona nto bayixhalabele ngamandla abantu ziziqu zabo, iintsapho zabo, neengxaki zabo. Ezi zizinto abasoloko bethetha ngazo xa bedibene. Kufuneka sikukhumbule oko kumsebenzi wethu wokunikela ubungqina.
4 UBukumkani BukaThixo Kuphela Kwethemba Eliqinisekileyo Ngekamva: Uninzi lwabantu alusenantembelo ingako koorhulumente babantu. Bavakalelwa kukuba akukho themba lokubona eli hlabathi libhetele kwixesha lokuphila kwabo. Unqulo lobuxoki alukwazanga ukubanika nasiphi na isizathu sokuba nethemba. Kungenxa yoko le nto intswelo yoluntu enkulu ikukuphulaphula iindaba ezilungileyo zoBukumkani bukaThixo. Babonise indlela obuya kuthi ngayo ekugqibeleni bucombulule zonke iingxaki zoluntu.
5 IBhayibhile Kuphela Komthombo Wokhokelo Onokuthenjwa: Namhlanje inkitha yabantu iye yalahlekiswa ziinkokeli ezikholose ngobulumko babantu neentanda-bulumko zehlabathi. Abantu kusafuneka baliqonde elokuba “akukhona endodeni ehambayo ukuqinisela ukunyathela kwayo.” (Yer. 10:23) Esona sifundo sibalulekileyo banokusifunda sesokuba bamele ‘bakholose ngoYehova ngentliziyo yabo yonke bangayami okwabo ukuqonda.’ (IMize. 3:5) Ngoxa amaxesha etshintshile, iBhayibhile ayitshintshanga. Ngenxa yoko, simele sibalaselise iLizwi likaThixo kubulungiseleli bethu ngamaxesha onke, sifundise abanye baluqonde ukhokelo lwayo oluphefumlelweyo noluvela kuThixo. (2 Tim. 3:16, 17) Ukuze senjenjalo, simele sibonise abantu ukubaluleka kweBhayibhile ngokuyicaphula kwiintshumayelo zethu, siyisebenzise ekuphenduleni imibuzo yabo, size sibalaselise imfuneko yokuyifundisisa nokusebenzisa ubulumko bayo obusebenzisekayo.
6 Nangona amaxesha anamhlanje etshintsha, injongo yethu ngobulungiseleli ayitshintshanga. Simele sishumayele iindaba ezilungileyo zoBukumkani, sakhe intembelo kwiLizwi likaThixo, size sincede abanye babone imfuneko yokufundisisa iBhayibhile kunye nathi. Esikuthethayo kumele kuhambisane neentswelo zakutshanje zabo sinikela ubungqina kubo. Ngokwenjenjalo, siya kwabelana nabanye ngeendaba ezilungileyo size ngaloo ndlela sifumane abantu abaninzi.—1 Kor. 9:19, 23.