Xelisa Ukholo Lwabo
1 Umpostile uPawulos waluchaza ukholo ‘njengolindelo oluqinisekisiweyo lwezinto ezithenjiweyo, imbonakaliso ebonakalayo yezinto zokwenene nangona zingabonwa.’ Wongezelela wathi “ngaphandle kokholo akunakwenzeka ukumkholisa kakuhle [uThixo].” (Heb. 11:1, 6) UPawulos wayesibongoza ukuba sibe nokholo, siphuphume lulo, size silusukele.—2 Kor. 4:13; Kol. 2:7; 2 Tim. 2:22.
2 Mininzi imizekelo ebalaseleyo yokholo ekubaliswa ngayo eBhayibhileni. KumaHebhere isahluko 11, uPawulos unikela uludwe olude lwamangqina awabonakalisa ukholo olungaxengaxengiyo. Kolu ludwe kukho noAbheli, umfeli-nkolo wokuqala. UNowa ukolu ludwe kuba wathi ngenxa yokholo lwakhe wabonakalisa uloyiko lobuthixo olwaluyimfuneko ukuze asindise intsapho yakhe. UAbraham unconywa ngenxa yokholo nokuthobela kwakhe. UMoses unconywa ngenxa yokuba wathi ngenxa yokholo lwakhe waqhubeka emi ngokuqinileyo wanga uyambona Lowo ungenakubonwa. Olu ludwe lwale mizekelo lwalulude kangangokuba uPawulos wathi ixesha lingamphelela ukuba wayengatyatyadula abalise ngabo bonke. Hayi indlela esinombulelo ngayo kuba sinokulomeleza ukholo lwethu ngokuhlolisisa ‘ihambo yabo yezenzo ezingcwele nezenzo zabo zozinikelo lobuthixo’!—2 Pet. 3:11.
3 Kwinkulungwane yokuqala, uYesu waphakamisa lo mbuzo: “Xa uNyana womntu efika, uya kulufumana ngokwenene na ukholo emhlabeni?” (Luka 18:8) Ngoko ke, ngaba sinayo imizekelo ephilayo yokholo phakathi kwethu namhlanje? Ngaba siyawabona amadoda namabhinqa, aselula nakhulileyo, ebonakalisa ukholo olungaxengaxengiyo kuYehova njengokuba kwakunjalo ngabantu bakaThixo kumaxesha okubhalwa kweBhayibhile?
4 Imizekelo Yanamhlanje Yokholo: Imizekelo ebalaseleyo yokholo ikho phakathi kwethu! Ukholo lwabaveleli abakhokelayo phakathi kwethu lufanele ukuxeliswa. (Heb. 13:7) Ukanti asingaba kuphela abanokholo olungumzekelo. Kuwo onke amabandla kukho abantu abanyanisekileyo abanexesha elide bekhonza uYehova ngokuthembeka, ngokufuthi bekhonza phantsi kweemeko ezinzima kakhulu.
5 Simele sibancome oodade wethu abathembekileyo abathe, kangangeminyaka emininzi, banyamezela ukuchaswa ngamadoda abo. Abazali abangenamaqabane omtshato kuye kwafuneka bajamelane nocelomngeni lokukhulisa abantwana bebodwa. Phakathi kwethu kukho abahlolokazi abakhulileyo abasoloko beyenza imisebenzi yebandla nangona bengenazintsapho zakubanceda. (Thelekisa uLuka 2:37.) Luyasikhwankqisa ukholo lwabo banyamezela iingxaki zempilo ezingayekeleliyo. Abaninzi bayaqhubeka bekhonza ngokunyaniseka nakuba nje kukho izinto ezibasikel’ umda nezibathintelayo ekubeni banikwe amalungelo awongezelelekileyo enkonzo. Kukho namaNgqina aselula aye athi ngenkalipho abonakalisa ukholo phezu kwako nje ukuchaswa esikolweni. Uzinikelo lwethu lobuthixo luya lusomelela xa sibona oovulindlela abathembekileyo bezingisa minyaka le nangona bejamelene neengxaki ezingathethekiyo. NjengoPawulos, kungade kuphele ixesha ukuba singazama ukubalisa ngawo onke amava enkonzo yoBukumkani nangezenzo zokholo zaba bazalwana noodade!
6 Le mizekelo yabantu abathembekileyo iyasithuthuzela yaye iyasikhuthaza. (1 Tes. 3:7, 8) Senza kakuhle ngokuxelisa ukholo lwabo kuba “abo benza ngokuthembeka uyakholiswa ngabo [uYehova].”—IMize. 12:22, NW.