Qhubeka Uthetha Inyaniso
1 Abapostile bathi: “Asinakuyeka ukuthetha ngezinto esizibonileyo nesizivileyo.” (IZe. 4:20) Nathi namhlanje simele siqhubeke sithetha inyaniso. Nangona ukusasaza IMboniselo noVukani! kuyindlela yokufumana abo banokuphulaphula, simele sibuyele ukuze sifundise abantu abanomdla okungakumbi ngenyaniso.
2 Xa ubuyela apho ubushiye khona u-“Vukani!” okhethekileyo kaMeyi onomxholo othi “Xa Iimfazwe Ziya Kuba Zingasekho,” usenokuqalisa isifundo seBhayibhile ngokubuza oku:
◼ “Kwixa elidluleyo, sincokole ngeemfazwe zamazwe nendima yonqulo kuzo. Ngaba ubusazi ukuba iziganeko ezinjalo zingqina ngokucacileyo ukuba siphila koko iBhayibhile ikubiza ngokuthi yimihla yokugqibela? [Mbonise incwadi ethi Ulwazi. Funda isiqendu sokuqala kwisahluko 11, ubalaselise ibhokisi ekwiphepha 102.] Le ncwadi iyawucacisa lo mbandela kunye neminye eli-18 edweliswe kwezi ziqulatho. [Mbonise iphepha 3.] Ukuba ubungathanda, bendingathanda ukukubonisa indlela le ncwadi enokukunceda ngayo uyazi le mibandela ibalulekileyo yeBhayibhile.” Ukuba uyavuma, qalisa isifundo kwiphepha 6.
3 Ukuba ubuthembise ngokubuya uze ucacise indlela ekunokwenzeka ngayo ukunandipha unqabiseko kwanangoku, usenokuthetha into efana nale:
◼ “Ukuqala kwethu ukubonana, ndikufundele indinyana yeBhayibhile esinika isizathu sokuba nethemba ngekamva lomntu. Namhlanje ndingathanda ukutsalela ingqalelo yakho kwinto ebonisa umntu onokusinika imvakalelo yonqabiseko kwanangoku.” Funda INdumiso 4:8. Tyhila kwiphepha 168 kwincwadi ethi Ulwazi ufunde isiqendu 19. Yandula ke ubuze: “Ngaba ubungethandi ukuba nesifundo seBhayibhile sekhaya sesisa esiya kubonisa ngokucacileyo indlela onokuthi nawe ulufumane ngayo olu nqabiseko ebomini bakho?” Ukuba uthi ewe, tyhila kwisahluko 1.
4 Ukuze wongezelele imizila yamaphephancwadi ngokufaka abo ububahambisele u-“Vukani!” kaJuni 8, usenokuzama le ntshayelelo:
◼ “Ndiphawule ukuba ubunomdla wokufunda uVukani! ebendikushiyele yena obethetha ngombandela wokukhathazwa ngokwesini kwiindawo zempangelo. Ngaba ibingumbandela obangel’ umdla kuwe lo? [Vumela impendulo.] Abantu abafunda uVukani! rhoqo basoloko besithi bayayixabisa indlela echazwa ngayo kakuhle nangokucokisekileyo imibandela ebaluleke ngolu hlobo. Ndicinga ukuba nawe uya kukufumanisa kunjalo oko kule nkupho yakutshanje. [Ngokufutshane balaselisa umxholo ongaphandle.] Ngaba ubungethandi ukuyifunda?”
5 Usenokusicela ngokungqalileyo isifundo seBhayibhile kwibuyelo ngokuthi:
◼ “Sisasaza la maphephancwadi ethu kwihlabathi lonke ukuze sazise abantu kwiindawo ngeendawo oko kufundiswa yiBhayibhile. Ukuba abantu bayakuxabisa oko bakufundayo, siye sicele ukubaqhubela isifundo seBhayibhile sekhaya sesisa. [Mbonise ibhokisi ethi ‘Ngaba Uya Kukuvuyela Ukutyelelwa?’ ngasemva kwiMboniselo.] Sisebenzisa le ncwadi ithi Ulwazi Olukhokelela Kubomi Obungunaphakade, njengesikhokelo. Makhe ndikubonise ngokufutshane indlela esiqhutywa ngayo esi sifundo.”
6 Ukuba siyaqhubeka sithetha inyaniso, sinokuqiniseka ukuba kuya kubakho abathile abaya kuphulaphula baze basabele kakuhle.—Marko 4:20.