Incoko Yobuhlobo Inokuyifikelela Intliziyo
1 Incoko inokuchazwa ‘njengokuphakelana ngezimvo.’ Ukuqalisa incoko yobuhlobo ngombandela obaxhalabisileyo abanye kunokuyithimba ingqalelo yabo yaye kunokusinceda ekufikeleleni iintliziyo zabo ngesigidimi soBukumkani. Amava abonise ukuba kunempumelelo gqitha ukuncokola nabantu ngobuhlobo nangokukhululekileyo kunokubashumayeza.
2 Indlela Yokuqalisa Incoko Yobuhlobo: Isibakala sokuba sikwazi ukuncokola nabanye asithethi kuthi simele sizenzele uludwe lweengongoma nezibhalo ezibalaseleyo. Oku kubandakanya nje ukwenza omnye umntu ancokole nathi. Ngokomzekelo, xa sincokola ngobuhlobo nommelwane wethu, asincokoli sizibambile kodwa siyakhululeka. Asiye sicinge ngento elandelayo esiza kuyithetha kodwa impendulo iyazizela nje ngokwemvelo kwizinto azithethayo. Ukubonakalisa umdla wokwenene koko akuthethayo kusenokumkhuthaza aqhubeke encokola nathi. Oku kufanele kube njalo xa sinikela ubungqina kwabanye.
3 Imibandela enjengolwaphulo-mthetho, iingxaki zolutsha, iingxaki zasekuhlaleni, iimeko zehlabathi, okanye kwanemozulu inokusetyenziswa ekuqaliseni incoko yobuhlobo. Imibandela ebuchaphazela ngokungqalileyo ubomi babantu inempumelelo kakhulu ekuvuseni umdla wabo. Yakuba iqalisiwe incoko, ngobuchule sinokuyiphethulela kwisigidimi soBukumkani.
4 Ukuncokola ngokukhululekileyo akuthethi kuthi ukulungiselela kusengaphambili akuyomfuneko. Kuyimfuneko. Noko ke, akukho mfuneko yakude uzenzele ulwandlalo olungenakuhlengahlengiswa okanye uyicengceleze intshumayelo, nto leyo enokuphumela kwincoko engakhululekanga okanye engenakutshintshwa xa kuvela ezinye iimeko. (Thelekisa eyoku-1 kwabaseKorinte 9:20-23.) Eyona ndlela ibalaseleyo yokulungiselela kukukhetha ingongoma yeZibhalo ibe nye okanye zibe mbini, ngenjongo yokuqalisa incoko ngazo. Ukuhlolisisa imibandela efumaneka kwincwadi ethi Ukuqiqa kuya kungqineka kuluncedo kakhulu koku.
5 Iimpawu Ezibalulekileyo Zencoko Yobuhlobo: Xa sincokola nabanye, sifanele sibe nobubele size sinyaniseke. Ukuba noncumo nembonakalo yokuba ngowonwabileyo kuyanceda ekubonakaliseni ezi mpawu. Thina sinesona sigidimi sibalulekileyo ehlabathini; sesona sibangel’ umdla kubantu abantliziyo zinyanisekileyo. Ukuba bavakalelwa kukuba umdla esinawo kubo ubangelwa ngumnqweno ongazenzisiyo wokwabelana nabo ngeendaba ezilungileyo, baya kwandula ke bashukunyiselwe ukuphulaphula.—2 Kor. 2:17.
6 Ukuncokola kufanele kube ngamava amyoli. Ngoko ke, sifanele sibe nobubele size sibe nobuchule ekushumayeleni isigidimi soBukumkani. (Gal. 5:22; Kol. 4:6) Zabalazela ukumshiya loo mntu enembono efanelekileyo ngathi. Ngaloo ndlela, kwanokuba asiphumelelanga ekuyifikeleleni intliziyo yakhe kutyelelo lokuqala, uya kukulungela ngakumbi ukuphulaphula kwixa elizayo xa elinye iNgqina lincokola naye.
7 Ukuqalisa incoko yobuhlobo akubangelwa kukuba yincutshe ekunikeleni intshumayelo enzima. Kungumbandela nje wokuvusa umdla ngokusebenzisa umbandela oxhalabise umntu lowo. Sakuba silungiselele kusengaphambili, siya kwandula ke ukukulungela ukuncokola nabantu ngobuhlobo. Masizabalazele ukufikelela iintliziyo zabo sidibana nabo ngokwabelana nabo ngezona ndaba zilungileyo zinokufunyanwa, ezo zeentsikelelo zoBukumkani zikanaphakade.—2 Pet. 3:13.