Indlela Yokwenza Abafundi Ngencwadi Ethi Ulwazi
1 Usukelo olunqwenelekayo kuwo onke amaKristu kukufundisa abanye inyaniso nokwenza abo ‘banotyekelo olufanelekileyo ngobomi obungunaphakade’ babe ngabafundi. (IZe. 13:48; Mat. 28:19, 20) Intlangano kaYehova isinike isixhobo esihle sokwenza oku—incwadi ethi Ulwazi Olukhokelela Kubomi Obungunaphakade. Umxholo wayo utsalela ingqalelo kwimbaluleka yokuqhuba izifundo zeBhayibhile zamakhaya, kuba ubomi obungunaphakade buxhomekeke ekungeniseni ulwazi ngoYehova, okuphela koThixo oyinyaniso, nangoNyana wakhe, uYesu Kristu.—Yoh. 17:3.
2 Ngoku incwadi ethi Ulwazi yeyona mpapasho yoMbutho iphambili ekuqhubeni izifundo zeBhayibhile zamakhaya. Xa siyisebenzisa, sinokufundisa inyaniso ngendlela elula, ecacileyo nangexeshana nje elifutshane. Oku kuya kufak’ isandla ekufikeleleni iintliziyo zabo sibafundisayo. (Luka 24:32) Kambe ke, kufuneka umqhubi asebenzise ubugcisa obuhle bokufundisa. Ukuze enjenjalo, kuye kwalungiselelwa esi sihlomelo sinikela amacebiso nezinto ezisikhumbuzayo ngokuphathelele iindlela zokufundisa eziye zangqineka zinempumelelo. Ngokusebenzisa ingqiqo, nangokweemeko zomntu ngamnye, usenokukwazi ukuwasebenzisa ngokuqhubekayo amanye okanye onke la macebiso alapha. Sigcine esi sihlomelo, uze usihlolisise rhoqo. Iingongoma ezahlukeneyo ezikuso zisenokukunceda ube nempumelelo ngakumbi ekusebenziseni incwadi ethi Ulwazi ekwenzeni abafundi.
3 Qhuba Isifundo SeBhayibhile Sekhaya Esinenkqubela: Yiba nomdla wokwenene kumntu omfundelayo umjonge njengalowo uza kuba ngumfundi ongumKristu nomzalwana okanye udade wokomoya. Yiba nobubele, ubuhlobo nehlombe. Ngokuba ngumphulaphuli olungileyo, usenokumazi loo mntu—imvelaphi nemeko yakhe ebomini—zinto ezo eziya kukunceda uqonde eyona ndlela ilungileyo yokumnceda ngokomoya. Kulungele ukuzincama ngenxa yomfundi.—1 Tes. 2:8.
4 Sakuba siqalisiwe isifundo, kucetyiswa ukuba izahluko ezikwincwadi ethi Ulwazi zifundwe ngokulandelelana kwazo. Oku kuya kwenza umfundi ayiqonde ngokuqhubekayo inyaniso, ekubeni le ncwadi ixubusha ngemibandela yeBhayibhile ngolandelelwano oluhle. Isifundo sigcine silula yaye sibangela umdla ukuze siphile size sihambele phambili. (Roma 12:11) Ngokuxhomekeka kwiimeko nesakhono somfundi, usenokukwazi ukugubungela izahluko ezininzi malunga nesithuba seyure, ngaphandle kokusileqa isifundo. Abafundi baya kwenza inkqubela entle xa umfundisi kunye nomfundi beligcina ixesha labo lesifundo iveki nganye. Ngaloo ndlela, kwinkoliso yabantu, kusenokuthabatha malunga nje neenyanga ezintandathu ukugqiba izahluko ezili-19 zale ncwadi.
5 Qalisa isifundo ngasinye ngamagqabaza amafutshane aya kuvusa umdla kuloo mbandela. Uya kuphawula ukuba umxholo wesahluko ngasinye ubonisa umbandela oxutyushwa kweso sahluko, ofanele ubalaseliswe. Umxholwana ngamnye ubalaselisa ingongoma eyintloko, nto leyo ekuncedayo ekubeni usoloko ubalaselisa umxholo wesahluko. Lumka ungathethi kakhulu. Kunoko, zama ukwenza umfundi athethe. Ukubuza umfundi oosingamibuzo abathile, abasekelwe koko sele ekwazi, kuya kumnceda aqiqe aze enze izigqibo ezichanileyo. (Mat. 17:24-26; Luka 10:25-37; bona Incwadi Yesikhokelo Yesikolo, iphepha 51, isiqendu 10.) Namathela kumbandela oshicilelweyo okwincwadi ethi Ulwazi. Ukufaka iinkcukacha ezongezelelekileyo kunokuzigalel’ amanzi okanye kuzigqumelele iingongoma eziziintloko kuze kusenze isifundo sithabathe ixesha elide. (Yoh. 16:12) Ukuba uphakamisa umbuzo ongenanto yakwenza nombandela ofundisiswayo, amaxesha amaninzi usenokuwuphendula ekupheleni kwesifundo. Oku kuya kwenza usigubungele isifundo saloo veki ngaphandle kokuphum’ emxholweni. Mcacisele umfundi ukuba uninzi lwemibuzo yakhe luza kuphenduleka njengokuba niqhubeka nifunda.—Bona Incwadi Yesikhokelo Yesikolo, iphepha 94, isiqendu 14.
6 Ukuba umfundi usakholelwa ngamandla kuBathathu Emnye, ukungafi komphefumlo, isihogo somlilo, okanye ezinye iimfundiso zobuxoki ezinjalo, yaye oko kuchazwe kwincwadi ethi Ulwazi akumanelisi, usenokumnika incwadi ethi Ukuqiqa okanye enye impapasho exubusha ngaloo mbandela. Mxelele ukuba uza kuwuxubusha naye loo mbandela emva kokuba eye wacinga ngoko akufundayo.
7 Ukuqalisa nokuqukumbela isifundo ngokuthandazela ukhokelo nentsikelelo kaYehova kusenza sindiliseke eso sihlandlo, kwenza ubani abe nesimo sengqondo sentlonelo, yaye kutsalela ingqalelo kuYehova njengoMfundisi wokwenyaniso. (Yoh. 6:45) Ukuba umfundi usatshaya, ekugqibeleni kusenokufuneka umcele ayeke njengoko niqhubeka nesifundo.—IZe. 24:16; Yak. 4:3.
8 Fundisa Ngokuphumelelayo Ngokusebenzisa IZibhalo, Imizekelo Nemibuzo Yempinda: Kungakhathaliseki ukuba uwufunde izihlandlo ezininzi kangakanani na umbandela kwixa elidluleyo, umfundisi onobuchule uya kusihlolisisa isifundo ngasinye ecinga ngomfundi othile. Oku kukunceda uyilungele eminye yemibuzo enokubuzwa ngumfundi. Ukuze ufundise ngokuphumelelayo, ziqonde kakuhle iingongoma eziziintloko ezikweso sahluko. Tyhila izibhalo ukuze ubone indlela ezingena ngayo kuloo mbandela, uze ugqibe ngezo zifanele zifundwe ebudeni besifundo. Cinga ngendlela onokufundisa ngayo usebenzisa imizekelo nemibuzo yempinda esekupheleni kwesahluko.
9 Ngokuzisebenzisa ngokuphumelelayo izibhalo, uya kumnceda umfundi aqonde ukuba eyona nto ayifundisisayo yiBhayibhile. (IZe. 17:11) Ngoxa usebenzisa ibhokisi ethi “Yisebenzise Ngokupheleleyo IBhayibhile Yakho,” kwiphepha 14 kwincwadi ethi Ulwazi, mfundise indlela yokukhangela izibhalo. Mbonise indlela yokwahlula iindinyana ezicatshuliweyo kwisifundo. Ukuba ixesha liyavuma, tyhilani nize nifunde izibhalo ezibonisiweyo ezingacatshulwanga. Umfundi makacacise indlela ezikuxhasa okanye ezikucacisa ngayo oko kuthethwe kwisiqendu. Balaselisa amacandelo aziintloko kwezo zibhalo ukuze aqonde oko kubalaseliswa ziingongoma eziziintloko kwisifundo eso. (Neh. 8:8) Ngokuqhelekileyo, akuyomfuneko ukuba umfundisi asebenzise izibhalo ezingakumbi kumbandela kunezo zisencwadini. Yithi gqabagqaba ngokubaluleka kokwazi amagama nokulandelelana kweencwadi zeBhayibhile. Ukufunda IMboniselo kaJuni 15, 1991, iphepha 27-30 kusenokumnceda umfundi. Xa kufanelekile, mkhuthaze ukuba asebenzise INguqulelo Yehlabathi Elitsha YeZibhalo ZamaKristu ZesiGrike. Ngokuqhubekayo unokumbonisa indlela yokusebenzisa iinxalenye zayo ezahlukeneyo, kuquka isalathiso samagama eBhayibhile.
10 Isifundo 34 seNcwadi Yesikhokelo Yesikolo Sobulungiseleli Sobuthixo sicacisa into yokuba imizekelo ivuselela amandla okucinga kabani ize yenze kube lula ukubamba iingongoma ezintsha. Inomtsalane engqondweni kwaye iyazifikelela iimvakalelo, yaye isidlulisela ngokucace ngakumbi isigidimi kunamazwi nje aqhelekileyo okuchaza inyaniso. (Mat. 13:34) Incwadi ethi Ulwazi inentaphane yemizekelo enemfundiso elula kodwa enempembelelo. Ngokomzekelo, umzekelo osetyenziswe kwisahluko 17 usenza sibe noxabiso ngendlela uYehova asinika ngayo ukudla, impahla nekhusi ngokomoya esebenzisa ibandla lamaKristu. Imifanekiso emihle yencwadi ethi Ulwazi inokusetyenziswa ngokuphumelelayo ekuvuseleleni umdla. Phantsi komxholwana othi “Uvuko Oluvuyisayo,” kwiphepha 185, ingongoma yesiqendu 18 iya kucaca ngakumbi ngokuthi ubonise umfundi umfanekiso okwiphepha 86. Oku kusenokumshukumisela ekubeni acinge ngovuko njengento yokwenene eya kuzaliseka kuBukumkani bukaThixo.
11 Abafundi beBhayibhile kufuneka benze inkqubela kwisifundo ngasinye. Ngenxa yesi sizathu, musa ukuyitsiba imibuzo yempinda ekwibhokisi ethi “Hlola Ulwazi Lwakho” esekupheleni kwesahluko ngasinye. Musa ukuphulaphula nje ukucengceleza kwakhe oko akufundileyo. Uninzi lwale mibuzo lwenzelwe ukumenza aphendule ngokusuka entliziyweni. Ngokomzekelo, bona iphepha 31, apho umfundi abuzwa oku: “Ziziphi iimpawu zikaYehova uThixo ezinomtsalane ngokukhethekileyo kuwe?”—2 Kor. 13:5.
12 Qeqesha Abafundi Basilungiselele Isifundo: Umntu osifunda kwangaphambili isifundo, akrwelele iimpendulo, aze acinge ngendlela yokuzichaza ngawakhe amazwi uya kwenza inkqubela ngokukhawuleza ngokomoya. Ngomzekelo nokhuthazo lwakho, unako ukumqeqesha asilungiselele isifundo. Mbonise eyakho incwadi, leyo uye waphawula okanye wakrwelela amagama namabinzana aziintloko kuyo. Mcacisele indlela yokufumana iimpendulo ezichanileyo zemibuzo esencwadini. Ukulungiselela isahluko kunye kusenokumnceda kakhulu umfundi. Mkhuthaze aphendule ngawakhe amazwi. Kuya kucaca ngoko ukuba uyawuqonda kusini na loo mbandela. Ukuba iimpendulo zakhe uzifunda encwadini, usenokuvuselela indlela acinga ngayo ngokumbuza indlela ebeya kumcacisela ngayo omnye umntu loo ngongoma esebenzisa amazwi akhe.
13 Mkhuthaze umfundi ajonge nezibhalo ezingacatshulwanga xa elungiselela veki nganye, ekubeni lisenokungabikho ixesha lokuzifunda zonke ebudeni besifundo. Mncome ngomzamo awenzayo kwisifundo sakhe. (2 Pet. 1:5; bona IMboniselo ka-Agasti 15, 1993, iphepha 13-14, ukuze ufumane amacebiso abhekele phayaa ngoko kunokwenziwa ngumfundisi nomfundi ukuze baphucule indlela yokufunda kwisifundo seBhayibhile.) Ngale ndlela, umfundi uqeqeshelwa ukulungiselela nokuba namagqabaza anentsingiselo kwiintlanganiso zebandla. Uya kuba ufunda indlela yokuhlakulela imikhwa emihle yofundisiso lobuqu eya kumxhobisela ekubeni aqhubeke ehambela phambili enyanisweni emva kokuba elugqibile ufundisiso lweBhayibhile kwincwadi ethi Ulwazi.—1 Tim. 4:15; 1 Pet. 2:2.
14 Yalathisela Abafundi Kwintlangano KaYehova: Kuyimbopheleleko yalowo wenza umfundi ukwalathisela loo mfundi kwintlangano kaYehova. Umfundi uya kuhambela phambili ekuqoleni ngokukhawuleza ukuba uyayiqonda yaye uyayixabisa intlangano ibe uyayiqonda imfuneko yokuba yinxalenye yayo. Sifuna afumane uvuyo lokunxulumana nabantu bakaThixo aze akhangele phambili ekubeni kunye nathi kwiHolo yoBukumkani, apho anokuxhaswa ngokomoya nangokweemvakalelo libandla lamaKristu.—1 Tim. 3:15.
15 Incwadana enemifanekiso ethi AmaNgqina KaYehova—Enza Ukuthanda KukaThixo Ngokumanyeneyo Zwenibanzi iye yaveliswa ngenjongo yokuqhelanisa abantu nekuphela kwentlangano ebonakalayo esetyenziswa nguYehova namhlanje ekwenzeni ukuthanda kwakhe. Sakuba siqalisiwe isifundo, kutheni unganiki umfundi umbhalo wayo? Zisuka nje, mmemele kwiintlanganiso rhoqo umfundi. Mcacisele indlela eziqhutywa ngayo. Usenokumxelela nomxholo wentetho yesidlangalala eza kubakho okanye umbonise inqaku eliza kuxutyushwa kwiSifundo seMboniselo. Mhlawumbi ungade umthathe aye kubona iHolo yoBukumkani xa kungekho zintlanganiso ukuze athobe naliphi na ixhala asenokuba unalo ngokuya kwindawo aza kuqala ukuya kuyo. Usenokumbonelela ngesithuthi ukuya kwiintlanganiso. Xa ekho, menze azive esekhaya yaye akhululeke. (Mat. 7:12) Mazise kwamanye amaNgqina, kuquka abadala. Sinethemba lokuba, uya kuqalisa ukulijonga njengentsapho yakhe yokomoya ibandla. (Mat. 12:49, 50; Marko 10:29, 30) Usenokumbekela usukelo, njengokuza kwintlanganiso enye ngeveki, uze ngokuthe ngcembe ulwandise olo sukelo.—Heb. 10:24, 25.
16 Njengoko isifundo sekhaya seBhayibhile sihambela phambili kwincwadi ethi Ulwazi, gxininisa amacandelo abalaselisa imfuneko yokuza rhoqo kwiintlanganiso zebandla. Ngokukhethekileyo phawula iphepha 52, 115, 137-9, 159, kunye nesahluko 17. Zityand’ igila kuye ngendlela oyixabisa ngayo intlangano kaYehova. (Mat. 24:45-47) Thetha ngendlela eyakhayo ngebandla lasekuhlaleni noko ukufundayo kwiintlanganiso. (INdu. 84:10; 133:1-3) Bekuya kuba yinto entle ukuba umfundi ebenokubukela ividiyo nganye yoMbutho, aqale ngethi Jehovah’s Witnesses—The Organization Behind the Name. Ukuze ufumane amacebiso abhekele phayaa ngendlela yokwalathisela abanomdla kwintlangano, bona IMboniselo kaNovemba 1, 1984, iphepha 14-18, nesihlomelo soBulungiseleli Bethu BoBukumkani bukaMeyi 1993.
17 Khuthaza Abafundi Banikele Ubungqina Kwabanye: Usukelo lwethu ekufundisiseni nabantu kukwenza abafundi abanikela ubungqina ngoYehova. (Isa. 43:10-12) Oko kuthetha ukuthi umfundisi ufanele akhuthaze umfundi athethe nabanye ngoko akufunda eBhayibhileni. Oku kunokwenziwa ngokubuza oku: “Ubungayicacisa njani le nyaniso kwintsapho yakho?” okanye “Sisiphi isibhalo obunokusisebenzisa ukuze ungqine oku kumhlobo wakho?” Gxininisa kwiindawo ezithile zencwadi ethi Ulwazi apho kukhuthazwa ukunikela ubungqina, njengakwiphepha 22, 93-5, 105-6 nesahluko 18. Xa kufanelekile, umfundi usenokunikwa amaphecana athile anokuwasebenzisa ekunikeleni ubungqina ngokungacwangciswanga kwabanye. Mcele ukuba ameme amalungu entsapho yakhe abekho kwisifundo sakhe. Ngaba unabahlobo abebengakuthanda ukufundisisa? Mcele ukuba akuxelele abo banomdla.
18 Ngokuza kwiSikolo Sobulungiseleli Sobuthixo nakwiNtlanganiso Yenkonzo, lowo usenokuba ngumfundi unokufumana uqeqesho olongezelelekileyo nokhuthazo oluya kumnceda abe ngumvakalisi weendaba ezilungileyo. Xa esithi unomdla wokubhalisa kwesi sikolo okanye wokuba ngumvakalisi ongabhaptizwanga, kuya kulandelwa imigaqo eyandlalwe kwincwadi ethi Ubulungiseleli Bethu iphepha 98 nelama-99. Ukuba kukho into ethile ebomini bakhe emenza angafaneleki, usenokuphanda kwiimpapasho zoMbutho ukuze ufumane umbandela onento yokwenza naloo nto oya kuba luncedo uze wabelane naye ngawo. Ngokomzekelo, umfundi usenokuba nengxaki ekoyiseni ukukhotyokiswa licuba okanye zezinye iziyobisi. Incwadi ethi Ukuqiqa inikela izizathu ezinamandla ezingokweZibhalo zokuba amaKristu eyiphepha imikhwa eyingozi ngolo hlobo, yaye kwiphepha 412 ichaza indlela ezingqineke ziphumelela ngayo ekuncedeni abanye boyise. Wuthandazele kunye naye lo mbandela, umfundisa ukuba nentembelo kuYehova ukuze afumane uncedo.—Yak. 4:8.
19 Inkqubo emele ilandelwe ukuze kufunyaniswe enoba ubani uyakufanelekela kusini na ukuba nesabelo kubulungiseleli basesidlangalaleni yandlalwe kwiMboniselo kaJanuwari 15, 1996, iphepha 16, isiqendu 6. Ukuba umfundi uyafaneleka, kuya kuba luncedo ukuba niqhelisele kunye ukwenzela usuku lwakhe lokuqala kwinkonzo yasentsimini. Ngendlela eyakhayo, xubusha ngendlela abadla ngokusabela nabachasa ngayo abantu kwintsimi yenu. Ukuba kunokwenzeka mqalise kwindlu ngendlu, uze ngokuqhubekayo umqeqeshele neminye imisebenzi yenkonzo. Ukuba intshumayelo yakho uyigcina imfutshane kwaye ilula, kuya kuba lula ngaye ukuyixelisa. Yiba ngowakhayo uze ube lukhuthazo, ubonakalise uvuyo olubangelwa ngulo msebenzi, ukuze naye abe nalo moya unawo aze awubonakalise. (IZe. 18:25) Usukelo lomfundi omtsha lufanele lube kukuba ngumvakalisi weendaba ezilungileyo othe rhoqo, nonenzondelelo. Mhlawumbi ungamnceda azenzele ucwangciso olusebenzisekayo lwenkonzo. Ukuze aphucule ubuchule bakhe bokunikela ubungqina kwabanye, usenokumcebisa ukuba afunde IMboniselo ka-Aprili 1, 1985, iphepha 26-31 neka-Aprili 15, 1985, iphepha 25-9; Julayi 15, 1988, iphepha 9-20; Januwari 15, 1991, iphepha 15-20; nekaJanuwari 1, 1994, iphepha 20-5.
20 Khuthaza Abafundi Bazahlulele Baze Babhaptizwe: Umfundi ontliziyo inyanisekileyo angakwazi ukuncedwa koko akufunde kwisifundo sencwadi ethi Ulwazi ade azahlulele kuThixo aze afanelekele ukubhaptizwa. (Thelekisa IZenzo 8:27-39; 16:25-34.) Noko ke, ngaphambi kokuba umntu akhuthazelwe uzahlulelo, ufanele ahlakulele ukuzinikela kuYehova. (INdu. 73:25-28) Ebudeni balo lonke ixesha lokuqhutywa kwesifundo, khangela amathuba okwakha uxabiso ngeempawu zikaYehova. Zityand’ igila ngendlela ovakalelwa ngayo ngoThixo. Mncede umfundi acinge ngokuhlakulela ulwalamano olufudumeleyo nolobuqu noYehova. Ukuba uyamazi yaye umthanda ngokwenene uThixo, uya kwandula ke amkhonze ngokuthembeka, kuba uzinikelo lobuthixo lunokuthanani nendlela esivakalelwa ngayo ngoYehova njengomntu.—1 Tim. 4:7, 8; bona Incwadi Yesikhokelo Yesikolo, iphepha 76, isiqendu 11.
21 Zabalazela ukuyifikelela intliziyo yomfundi. (INdu. 119:11; IZe. 16:14; Roma 10:10) Kufuneka abone indlela emchaphazela ngayo inyaniso ngokobuqu aze agqibe ngoko afanele akwenze ngakufundileyo. (Roma 12:2) Ngaba uyikholelwa ngokwenene inyaniso ayifundiswa iiveki ngeeveki? (1 Tes. 2:13) Ukuze ufumanise oko, unokumenza umfundi athethe ngokukhululekileyo ngokubuza imibuzo yembono, enjengale: Uvakalelwa njani ngale nto? Ungakusebenzisa njani oku ebomini bakho? Kwindlela aphendula ngayo unokubona apho lufuneka khona uncedo olungakumbi ukuze ufikelele intliziyo yakhe. (Luka 8:15; bona Incwadi Yesikhokelo Yesikolo, iphepha 52, isiqendu 11.) Amagama asemfanekisweni okwiphepha 172 nele-174 kwincwadi ethi Ulwazi analo mbuzo: “Ngaba uzahlulele kuThixo ngomthandazo?” nothi “Kwala ntoni na ukuba ungabhaptizwa?” Le mibuzo inokumkhuthaza ngokuphumelelayo umfundi.
22 Inkqubo emele ilandelwe xa umvakalisi ongabhaptizwanga enqwenela ukubhaptizwa yandlalwe kwiMboniselo kaJanuwari 15, 1996, iphepha 17, isiqendu 9. Incwadi ethi Ulwazi yabhalwa ngenjongo yokuxhobisa umntu akwazi ukuphendula “Imibuzo Yabo Banqwenela Ukubhaptizwa,” ehlolisiswa ngabadala kunye naye, kwisihlomelo sencwadi ethi Ubulungiseleli Bethu. Ukuba uye wazibethelela iimpendulo zemibuzo eshicilelweyo kwincwadi ethi Ulwazi, umfundi ufanele axhotyiswe kakuhle ukwenzela iintlanganiso zemibuzo eziqhutywa ngabadala belungiselela ukuba abhaptizwe.
23 Nceda Abo Basigqibileyo Isifundo SeBhayibhile Sekhaya: Kufanele kulindelwe ukuba ngexesha umfundi eya kube egqiba ukufundisisa incwadi ethi Ulwazi, ukunyaniseka kwakhe nokuba nomdla ongazenzisiyo ekunquleni uThixo kuya kube kuzicacele. (Mat. 13:23) Kungenxa yoko le nto umxholwana wokugqibela kule ncwadi ubuza oku, “Uya Kwenza Ntoni?” Iziqendu zokugqibela zibongoza umfundi ukuba anikele ingqalelo kulwalamano amele ukuba uye waluhlakulela noThixo, imfuneko yokusebenzisa ulwazi alufumeneyo, nemfuneko yokuba enze ngokukhawuleza ekubonakaliseni uthando lwakhe ngoYehova. Alikho ilungiselelo lokuba kufundisiswe enye impapasho nabo baye bayigqiba incwadi ethi Ulwazi. Mcacisele ngobubele nangokucacileyo umfundi osilelayo ukusabela kulwazi olungoThixo oko amele akwenze ukuze abe nenkqubela ngokomoya. Usenokumana umtyelela maxa wambi, ukuze azi ukuba usenalo ithuba lokuthabatha amanyathelo akhokelela kubomi obungunaphakade.—INtshu. 12:13.
24 Umfundi osemtsha owamkela inyaniso aze abhaptizwe kusafuneka akhule ngakumbi kulwazi nokuqonda kwakhe ukuze omelele ngakumbi elukholweni. (Kol. 2:6, 7) Kunokuba uqhubeke umqhubela isifundo seBhayibhile sekhaya emva kokuba egqibe incwadi ethi Ulwazi, usenokuzenza ufumaneke ukwenzela ukuba unikele naluphi na uncedo lobuqu asenokuba uyalufuna ukuze aqole ngokomoya. (Gal. 6:10; Heb. 6:1) Naye, unokulukhulisa ulwazi lwakhe ngokufunda iBhayibhile yonke imihla, ngokuzifundela IMboniselo nezinye iimpapasho ‘zekhoboka elithembekileyo,’ ngokulungiselela nangokuza kwiintlanganiso, nangokuxubusha ngenyaniso namanye amakholwa. (Mat. 24:45-47; INdu. 1:2; IZe. 2:41, 42; Kol. 1:9, 10) Ukufunda incwadi ethi Ubulungiseleli Bethu aze akusebenzise oko ikuquletheyo kuya kumnceda kakhulu ekubeni alungelelaniswe ngokobuthixo ukuze abufeze ngokuzeleyo ubulungiseleli bakhe.—2 Tim. 2:2; 4:5.
25 Hlakulela Ubugcisa Bokufundisa: Siye sanikwa uthumo ‘lokwenza abantu babe ngabafundi . . . , size sibafundise.’ (Mat. 28:19, 20) Ekubeni ubugcisa bokufundisa buhambisana nokwenza abafundi, sifanele sizabalazele ukuphucula njengabafundisi. (1 Tim. 4:16; 2 Tim. 4:2) Ukuze ufumane amacebiso angakumbi ngendlela yokuhlakulela ubugcisa bokufundisa, usengathanda ukufunda lo mbandela: “Ukwakha Ubugcisa Bokufundisa” nothi “Ukufikelela Intliziyo Yabaphulaphuli Bakho” kwiNcwadi Yesikhokelo Yesikolo, isifundo 10 nese-15; i-Insight Umqulu 2 kwindawo ethi “Teacher, Teaching [Umfundisi, Ukufundisa]”; nenqaku elithi “Ukwakha Ngezinto Zokwakha Ezingatshiyo” nelithi “Xa Ufundisa, Fikelela Intliziyo,” kwiMboniselo kaMatshi 15, 1985; kwekaMatshi 1, 1986, elithi “Ngaba Uqiqa Ngokunomphumo NgeZibhalo?”; nelithi “Indlela Yokufumana Uvuyo Ekwenzeni Abafundi,” kwekaFebruwari 15, 1996.
26 Njengoko uzabalazela ukwenza abafundi, usebenzisa incwadi ethi Ulwazi, ngamaxesha onke thandazela ukuba uYehova, “okhulisayo,” ayisikelele imigudu yakho ekufikeleleni iintliziyo zabantu ngeendaba ezilungileyo zoBukumkani. (1 Kor. 3:5-7) Ngamana ungafumana uvuyo ngokufundisa abanye baluqonde, baluxabise, baze benze ngokuvisisana nolwazi olukhokelela kubomi obungunaphakade!