Ngaba Ukhe Wakulinga Ukunikela Ubungqina Ngamarhatya?
1 Sonke kuyasivuyisa ukuba nempumelelo emsebenzini wethu. Kwelinye icala, xa kungekho miphumo mihle, sinokutyhafa size singaneliseki. Umsebenzi omhle uyanelisa, yaye uyintsikelelo. (Thelekisa INtshumayeli 3:10-13.) Lo mgaqo sinokuwusebenzisa nakumsebenzi wethu wokushumayela. Sazi ngokuphuma kumava ukuba xa sisiya kwindlu ngendlu size sincokole nabantu ngeBhayibhile, sibuyela emakhaya sihlaziyekile ngokomoya. Siziva siphumeze okuthile ngokwenene.
2 Kweminye imimandla kuye kwanzima kakhulu ukufumana abantu emakhaya ebudeni beeyure ezithile zemini. Kwezinye iindawo iingxelo zibonisa ukuba bangaphezu kwama-50 ekhulwini abantu abangafumanekiyo emakhaya xa sibatyelela kusasa. Uninzi lwamabandla luye lwayicombulula le ngxaki ngokwenza amalungiselelo okunikela ubungqina ngamarhatya, ibe aye aphumelela kakhulu. Abavakalisi banikela ingxelo yokuba xa bebuyela emalanga, inkoliso yabantu abaninzi iba seyisemakhaya, ibe ngokuqhelekileyo, abantu badla ngokukhululeka baze baphulaphule ngakumbi kwisigidimi soBukumkani. Ngaba ukhe wakulinga ukunikela ubungqina ngamarhatya kweyakho intsimi?—Thelekisa uMarko 1:32-34.
3 Badala Yenzani Amalungiselelo Okunikela Ubungqina Ngamarhatya: Kweminye imimandla iintlanganiso zenkonzo eziqhutywa emalanga okanye ngorhatya ziye zaxhaswa kakhulu. Kusenokuboniswa ulwazelelelo ngabavakalisi abaselula abaphuma esikolweni emva kwemini nangabantu abakhulu abatshayisa emsebenzini emalanga. Abanye abavakalisi abangakwaziyo ukuya kwinkonzo yasentsimini ngeempela-veki bafumanisa ukuba ukunikela ubungqina ngamarhatya phakathi evekini kuyindlela esebenzisekayo kubo yokuba nesabelo rhoqo kumsebenzi wokushumayela.
4 Kukho izinto ezahlukahlukeneyo onokuzenza xa unikela ubungqina ngamarhatya. Usenokunikela ubungqina kwindlu ngendlu ngamaphephancwadi okanye ngokusebenzisa uncwadi oluhanjiswayo kuloo nyanga. Urhatya lixesha elihle lokutyelela abantu abebengekho emakhaya xa abavakalisi bebebatyelele kusasa okanye ngeempela-veki. Kwakhona kusenokubakho intsimi entle yokunikela ubungqina esitratweni, ekwenza udibane nabantu ababuyela emakhaya bevela emsebenzini. Abaninzi bafumanisa ukuba urhatya lelona xesha lihle lokubuyela kwabo babonise umdla.
5 Yiba Ngophaphileyo Uze Ulumke: Ukuhamba emva kokutshona kwelanga okanye ngongcwalazi kunokuba yingozi kweminye imimandla. Kusenokuba bubulumko ukuhamba ngababini okanye njengamaqela kwizitrato ezikhanyiswe kakuhle xa nityelela amakhaya okanye izakhiwo ezinamagumbi aqeshisayo kuphela xa niqinisekile ukuba niza kukhuseleka. Xa unkqonkqoza emnyango, yima kwindawo ebonakalayo, uze uzazise ngokucacileyo. Sebenzisa ingqiqo. Xa uphawula ukuba ufike ngexesha elibi, njengaxa intsapho isidla, cela ukubuya ngelinye ixesha. Kudla ngokuba kuhle ukunikela ubungqina xa kuqalisa ukuthi rhatya, kunokuya ebusuku, xa abaninimzi besenokuba balungiselela ukulala.
6 Ehlotyeni ngexesha ekurhatyela kade ngalo lixesha elifanelekileyo lokunikela ubungqina ngamarhatya. Njengoko sinikela kuThixo “inkonzo engcwele imini nobusuku,” ngokuqinisekileyo uYehova uya kuyisikelela imigudu yethu.—ISityhi. 7:15.