Ukwakhiwa KweeHolo ZoBukumkani EMzantsi Afrika Nakumazwe Angabamelwane

¹ Xa siphos’ iliso ehlabathini lonke, kufudumez’ intliziyo ukubona ulwando olukhulu olwenzeka kwintlangano kaYehova esemhlabeni. Nyakenye apha eMzantsi Afrika kuphela, ngamabandla amatsha angama-37 aye asekwa, ngoxa kuye kongezelelwa isimbuku samabandla angama-3288 kwihlabathi liphela. Ngenxa yalo lonke olu lwando, akumangalisi ukuba kubekho imfuneko yeeHolo zoBukumkani ezingakumbi.

² Uninzi lwabazalwana noodade babonakalisa inzondelelo nenkxaso engathethekiyo kwintlangano kaYehova ngokunikela ngexesha nangobuncwane babo ekwakhiweni kweeHolo zoBukumkani. IiKomiti Zokwakha Zenqila ezingama-23 ezikhoyo kweli loMzantsi Afrika nakumazwe angabamelwane zinyamekela amabandla akwimimandla eziyabelweyo. Minyaka yonke, kwakhiwa iiHolo zoBukumkani ezintsha eziqikelelwa kuma-24 yaye eziliqela ziyahlaziywa. Ukususela kowe-1985, ziiHolo zoBukumkani ezingama-306 eziye zanikezelwa. Iikomiti zenqila ziye zathwaliswa imbopheleleko yokuvelela le misebenzi, ibe siyakuxabisa ukubulaleka kwazo. Lonke eli lungiselelo lokwakha iiHolo zoBukumkani liphunyezwa ngomoya wokupha wamaKristu nowokuzincama—moya lowo owahluke mpela kulowo uxhaphakileyo ehlabathini.—2 Tim. 3:2, 4.

³ Ukuze uncede ekwenzeni iiHolo zoBukumkani zibe semgangathweni, uMbutho sele uqalisile ukunika iikomiti zenqila iiplani zokwakha iiHolo zoBukumkani ezisemgangathweni ezikwiCAD (Computer Aided Design/Drafting). Oku kuya kufak’ isandla ekongeni ixesha nobuncwane bamatsha-ntliziyo. Kwakhona kuya kunceda nasekuphathweni ngobulumko kweNgxowa-mali YoMbutho YeeHolo ZoBukumkani. Ngoku abadala banokuzikhethela kwezi plani. Emva kokufumana esi sixhobo sitsha, enye iKomiti Yokwakha Yenqila eUnited States yathi: “Ayithetheki indlela esavuya ngayo nesachwayita ngayo sakufumana ezi plani. . . . Abazalwana abanamava ekuzobeni iiplani nakubunjineli baqikelela ukuba ixesha elongiwayo ngama-50 ukuya kuma-60 ekhulwini ngenxa yokusebenzisa ezi plani zintsha. Oku kusaya kusinceda nasekubeni nemigaqo efanayo yeeHolo zoBukumkani.” Njengoko amabandla esebenza ngaxhatha linye ekwakheni iiHolo zoBukumkani ezisemgangathweni, silindele ukuba umthwalo wabazobi beeplani, oononjineli kunye nabakhi abazinikeleyo abanikela ngoncedo lwabo ngokuzithandela ube khaphukhaphu kakhulu.

⁴ Amatsha-ntliziyo Axhasa Umsebenzi Omhle: UMbutho uwabulela kakhulu amatsha-ntliziyo amaninzi anceda ekwakheni iiHolo zoBukumkani. Kwanelisa ngokwenene ukubona amawakawaka amatsha-ntliziyo ezinikela kuyo yonke imisebenzi yokwakha iiHolo zoBukumkani. Impumelelo yeli lungiselelo iyabonakala ngenxa yalo moya uvumayo, wobubele nowentsebenziswano wamatsha-ntliziyo, anikela ngexesha ebenokulisebenzisa kakuhle emabandleni nakwiintsapho zawo. (INdu. 110:3; Kol. 3:23) Le ndlela enza ngayo itsho singakwazi ukuzibamba kodwa siwancome, sibe noxabiso ngawo size siwaxhase ngokupheleleyo.—Roma 12:10; Heb. 13:1.

⁵ Bonke abafanelekayo ekuncedeni iiKomiti Zokwakha Zenqila ngokuthe rhoqo baye bacelwa ukuba bazalise ifomu ethi Kingdom Hall Construction Worker Questionnaire (S-82). Ezi fomu zithunyelwa ngamabandla kwikomiti yenqila, echaza iimfaneleko nexesha afumaneka ngalo umntu lowo. Xa kukho utshintsho ngokuphathelele imeko yetsha-ntliziyo elo, njengaxa lifuduka okanye limiselwa njengesicaka solungiselelo okanye umdala, kufanele kuzaliswe iifomu ezintsha ngokukhawuleza zize zithunyelwe ngonobhala webandla. Ukuba itsha-ntliziyo alisafaneleki, abadala bafanele bazise ikomiti yenqila ngeleta. Xa kufuneka iifomu ezingakumbi, zisenokucelwa ngefomu eyiLiterature Order yanyanga zonke. Nomveleli wesiphaluka unomdla kwabo bazinikelayo kulo msebenzi wenkonzo engcwele. Ngoko ke, sihlandlo ngasinye etyelela ibandla uhlola ifayile enemibhalo enezi fomu zithi Kingdom Hall construction worker questionnaire.

⁶ Ukugcina Iindleko Zokwakha Ziphantsi: IiKomiti Zokwakha Zenqila ziye zayalelwa ukuba zimisele isebe lokuthenga eliya kuvelelwa ngumdala ofanelekayo. Abazalwana abasebenza kweli sebe ngenkuthalo bakhangela amaxabiso amahle ngokuthelekisa amaxabiso eevenkile. Ngale ndlela, kunokwenziwa isigqibo ngaleyo kunokuthengwa kuyo nezinto zokwakha ezifanele zithengwe. Maxa wambi, ebudeni bokwakhiwa kweHolo yoBukumkani, abazalwana abafanelekayo kwibandla lasekuhlaleni bacelwa ukuba bancede kweli sebe.

⁷ Ukuqinisekisa ukuba imali ayisafazwa, kumele kufunyanwe imvume kwiKomiti Yokwakha Yenqila nanini na kusetyenziswa imali yokwakha, enoba kungokutyobela iitsheke okanye ngokubhala oonobumba bokuqala bamagama ayo kumaphepha okuthenga (voucher). Nanini na kusetyenzwa kwiHolo yoBukumkani, enoba intsha okanye iyahlaziywa, yaye kukho amatsha-ntliziyo avela kumabandla engeyoyawo loo holo, loo msebenzi umele wonganyelwe yikomiti yenqila.

⁸ Nawuphi na umntu onekontraka encedisayo ekwenzeni omnye wemisebenzi kwiHolo yoBukumkani ufanele abe nesiqinisekiso seinshorensi yemali-mbuyekezo xa kukho umntu owenzakeleyo apho kunye neinshorensi yokugubungela nawuphi na umonakalo owenzekayo, yaye nebandla lifanele lifakwe kuloo inshorensi, kunye nezivumelwano ezingelungelo lokuhlawulwa kwezinto ezisenokonakala. Oku akusebenzi kumatsha-ntliziyo ancedisayo ebudeni bolwakhiwo.

⁹ Ukunceda Amanye Amazwe: Kubakho amaxesha apho amazwe angabamelwane aye afune uncedo kwiikomiti zenqila. Uncedo olunjalo ludla ngokuba yimfuneko ekuqeqesheni iKomiti Yokwakha Yenqila yalapho. Kukubonakalisa uthando ngokwenene xa abazalwana abanembopheleleko beli lizwe bekulungele ukuhamba ngeendleko zabo ukuya kunceda kwelinye ilizwe. Xa uMbutho usamkela isicelo selinye ilizwe, ukhetha ikomiti yenqila esenokuba ayibambekanga kakhulu ekwakheni iiHolo zoBukumkani ukuba iye kunceda. Oku kwenza izinto zihambe ngocwangco.

¹⁰ Ngenxa yemfuneko ehlala isanda yeeHolo zoBukumkani kwamanye amazwe, kufuneka imali ekhoyo isetyenziswe ngobulumko kangangoko kunokwenzeka. Ngaloo ndlela, amabandla neekomiti zenqila ayakhuthazwa ukuba abe noqoqosho kangangoko kunokwenzeka ekwakheni iiHolo zoBukumkani ezintsha nasekuhlaziyeni ezo sele zikho. Esi sicelo siye samkelwa ngomoya omhle. Iminikelo evela kumazwe afumileyo isetyenziselwa ukunikela ngemali-mboleko kumabandla akumazwe apho kufuneka ngokungxamisekileyo iiHolo zoBukumkani ezingakumbi kodwa anobuncwane obulinganiselweyo nekukho iimeko ezimaxongo zoqoqosho kuwo.

¹¹ Imfuneko yeeHolo zoBukumkani ezingakumbi kumazwe athile ibalaseliswa kwiNcwadi Yonyaka Yowe-1997. Ngokomzekelo, kukhankanywe iUkraine, apho ukuza kuthi ga ngoku kwakhiwe iiHolo zoBukumkani ezingama-47 yaye kwakhiwa ezinye ezingama-56 sithetha nje. Intswelo kumazwe anjalo iyabonakala. Ingxelo ithi: “Kufuneka iiHolo zoBukumkani ezininzi ngakumbi kwelaseRashiya. Inani lamaNgqina landa ngokukhawuleza, kodwa ama-85 ekhulwini amabandla aphantsi kwesebe laseRashiya akanazo iindawo zeentlanganiso ezizezawo. Kanti kwelaseZimbabwe, apho kukho amabandla anokuba ngama-800, ekuye kufuneke ukuba uninzi lwawo luhlanganisane phandle. Oku kuye kwabangela abathile abasandul’ ukuba nomdla bangayi kwiintlanganiso.” Kukwanjalo nakwamanye amazwe akwiMpuma Yurophu, eAfrika nakuMbindi noMzantsi Merika. Kumabandla ali-1450 kule ntsimi yethu, anokuba ngama-400 aneeHolo zoBukumkani zawo ezinikezelweyo yaye amanye amabandla ali-140 asebenzisa kwaezi holo. Oku kuthetha ukuba kukho namanye amabandla amakhulu amalunga nama-300 azifuna ngokwenene iiHolo zoBukumkani.

¹² Nangona uthando lwabaninzi luye lwaphola ebudeni bale mihla yokugqibela, abantu bakaThixo bona basaqhubeka benikela ubungqina bokuthandana, uthando oloyisa imiqobo yobuhlanga neyemida. (Mat. 24:12) Njengoko sixelisa uBawo wethu osezulwini, kwanga singaqhubeka sibonakalisa olo thando ngokuxhasa ngokuvumayo ukwakhiwa kweeHolo zoBukumkani kweli loMzantsi Afrika nakumazwe angabamelwane. Ngokwenjenjalo ke siya kufumana intsikelelo nenkoliseko kaYehova.—Mal. 3:10; Heb. 6:10.