Khetha Amanqaku Aza Kuvuselela Umdla Ebantwini
1 Njengabatoli abazijolisa ngenyameko iintolo zabo, uninzi lwabavakalisi noovulindlela bamabandla luphuma phambili ngokusebenzisa amanqaku akhethiweyo eMboniselo noVukani! ukuze luvuselele umdla wabantu abathile entsimini yalo. Luye lwacinga ngoyena mntu unokuvuyela ukufunda amanqaku athile ala maphephancwadi. Lukwenza njani oku?
2 Okokuqala, inkupho nganye luyifunda yonke. Lwandule ke luzibuze, Ngaba eli nqaku liya kuba nomtsalane kumntu onjani? Emva koko lwenza umgudu wokutyelela abathile abasenokuba nomdla wokufunda elo nqaku. Xa luqikelela ukuba inkupho ethile iya kuhambiseka entsimini yabo, luodola isixa esongezelelekileyo.
3 Amaphephancwadi Ethu Ahlonelwa Gqitha: Omnye orhumelayo nokwasebenzela elona phephancwadi lisasazwa kumazwe ngamazwe elifundwa kakhulu eNigeria wathetha wenjenje ngoVukani!: “Ndilothulel’ umnqwazi elona phephancwadi lixubusha imibandela ephangaleleyo nebangel’ umdla ehlabathini.” Omnye owafunda ngolangazelelo amaphephancwadi ethu wathi: “Ezinjani ukuxabiseka zona izisele zobulumko! Awukho umbandela ondibangel’ umdla endingawufumaniyo komnye waba [lindixesha].”
4 La maphephancwadi axubusha imibandela emininzi, kuquka iBhayibhile, iziganeko zehlabathi, izinto ezixhalabisa intsapho, iingxaki zentlalo, imbali, inzululwazi, ubomi bezilwanyana nobezityalo, xa sikhankanya nje embalwa. Ngokuqinisekileyo nabani na uba nomdla wokufunda into ethetha ngeentswelo, iimeko okanye umsebenzi wakhe. Ekubeni sithetha nabantu abaninzi, ngamnye ethanda izinto ezithile yaye eneengxaki ezithile, ukuwakhetha amanqaku aya kuba nomtsalane ngokukhethekileyo kubantu esidibana nabo kuya kuphumelela kakhulu.
5 Phawula okwenzeka xa amaNgqina amabini anika umbhali wemihlathi yephephandaba elithile inkupho kaVukani! kaSeptemba 8, 1996. Wabhala: “Ndithe ndingekalifumani nethuba eli lokuba ndithi andinamdla, suke omnye wawo wathi: ‘Kukho inqaku elithetha ngamaIndiya aseMerika. Siyazi ukuba kudala ubhala ngalo mbandela.’” Walithabatha elo phephancwadi waza, ebudeni besidlo sakusasa, walifunda inqaku elithetha ngamaIndiya, kamva wavuma esithi “lisemagqabini” yaye “alifihli makhuba kulinywa.”
6 Yintoni Etsala Umdla Wabantu Abakwintsimi Yakho? Yinto oye wayiphawula kumaphephancwadi eenyanga zakutshanje esenokuba nomtsalane koonovenkile nakwizifundiswa ezisentsimini yakho okanye kubamelwane, abo usebenza nofunda nabo? Yintoni enokuvuselela umdla kumagqwetha, kubahlohli, kubacebisi ngemibandela yentsapho neyezikolo, kubacebisi bolutsha, kwabezentlalo nakwezonyango? Ukuhlala ucinga ngabantu oshumayela kubo njengoko uphonononga inkupho nganye kuya kukunika iindlela ezisemagqabini zokusasaza ilizwi lenyaniso.
7 Xa ufumana umntu onomdla okhethekileyo kwinqaku elithile leMboniselo okanye uVukani! nowamkelayo la maphephancwadi, usenokuthi: “Xa ndiphinde ndabona inqaku kwinkupho elandelayo endicinga ukuba liya kukubangel’ umdla, ndiya kukuvuyela ukukuphathela umbhalo wayo.” Loo mntu usenokumfaka nakumzila wakho wamaphephancwadi, uman’ ukumphathela amaphephancwadi amatsha. Oko kufana noko kudla ngokwenziwa xa ubani esenza ibuyelo kumntu osenokuba nomdla okhethekileyo kumanqaku athile avela kumaphephancwadi ethu.
8 Balaselisa Izinto Zokomoya: Kwiminyaka embalwa edluleyo, enye indoda eyayithanda impumelelo ebomini yafumana uVukani! owayexubusha ngombandela owawuyibangel’ umdla. Noko ke, le ndoda inqulayo yafunda nenkupho yeMboniselo eyayihamba naye, eyayinenqaku elayenza yacingisisa nzulu ngenkolelo eyayikhule nayo kaBathathu Emnye. Kwiinyanga ezintandathu kamva yabhaptizwa! Ngoko, musa ukulibazisa ukuxubusha iZibhalo nabafundi bamaphephancwadi ethu. Usenokubanika incwadana enemifanekiso ethi Yintoni UThixo Ayifunayo Kuthi? uze ucele imizuzu embalwa ukuze nixubushe isifundo sibe sinye kwisihlandlo ngasinye umphathela amaphephancwadi amatsha.
9 Khawucingisise ngenyameko ukuba liliphi kumabuyelo akho okanye kubantu osebenzisana nabo onokuzithanda iinkupho zakutshanje zeMboniselo noVukani! Emva koko yenza umgudu wokubafikelela. Nika abaninzi kangangoko kunokwenzeka aba lindixesha baxabisekileyo. Yaye ungaze ulibale ukuba njengoko uzabalazela ukunceda abantu abangakumbi bafunde amaphephancwadi ethu, ‘uphosa isonka sakho phezu kwamanzi.’ Ethubeni, usenokuphumelela ekufumaneni abo baza kuba ngabafundi kunye nawe.—INtshu. 11:1, 6.