Ukushumayela Kuyasahlula
1 Abantu abaninzi bayabuza, “Yintoni eyahlula amaNgqina kaYehova kwezinye iinkonzo?” Ubuya kuphendula njani? Ubunokuchaza ezinye zeenkolelo zethu ezisekelwe eBhayibhileni. Kodwa ukhe wacinga ngokuchaza indlela ubulungiseleli bethu basesidlangalaleni obusahlula ngayo kwezinye iinkonzo?—Mat. 24:14; 28:19, 20.
2 Namhlanje, ibathwana labantu beenkonzo bashukunyiselwa ukuba babelane nabanye ngeenkolelo zabo. Basenokucinga ukuba kwanele ukuthobela imithetho kaKesare, ukuphila ubomi bokuziphatha kakuhle nobundilisekileyo, okanye ukwenzela abanye ububele. Noko ke, abaziva benembopheleleko yokunceda abanye bafunde oko kuthethwa yiBhayibhile ngokufumana usindiso. Sahluke njani?
3 Inzondelelo yethu kubulungiseleli ngumahluko ophawulekayo kwimisebenzi yezinye iinkonzo. Ngaphezu kweminyaka eli-100, amaNgqina ale mihla aye azishumayela ngenkuthalo iindaba ezilungileyo ukusa eziphelweni zomhlaba, exelisa amaKristu amandulo. Injongo yethu ngokwenjenjalo kukuba sincede abantu abaninzi kangangoko kunokwenzeka ukuba bavisisanise ubomi babo nokuthanda kukaThixo.—1 Tim. 2:4; 2 Pet. 3:9.
4 Udume Ngantoni? Ngaba waziwa njengomshumayeli weLizwi LikaThixo onenzondelelo? (IZe. 17:2, 3; 18:25) Ngenxa yomsebenzi wakho wokushumayela, ngaba sele bewubona umahluko abamelwane bakho phakathi konqulo lwabo nolwakho? Ngaba waziwa njengomntu onehlombe lokwabelana nabanye ngethemba lakho? Ngaba unalo ucwangciso oluthe rhoqo lokuba nenxaxheba kubulungiseleli? Khumbula ukuba asizahluli ngegama lethu kuphela kodwa nangokwenza kwethu oko kuthethwa lelo gama—ukunikela ubungqina ngoYehova.—Isa. 43:10.
5 Uthando ngoThixo nommelwane lusishukumisela ukuba sibandakanyeke kumsebenzi wokushumayela. (Mat. 22:37-39) Kungesosizathu lento nathi, njengoYesu nabapostile, sifuna ukuxhakamfula kwathuba livelayo ukuze sabelane nabanye ngesigidimi soBukumkani. Ngamana singaqhubeka sishumayela iindaba ezilungileyo ngenzondelelo kwabo bakulungeleyo ukuphulaphula. Ukwenjenjalo kuya kunceda abantliziyo zinyanisekileyo ukuba ‘babone umahluko phakathi . . . komkhonzayo uThixo nongamkhonziyo.’—Mal. 3:18.