Ngubani Onokwamkela Isifundo SeBhayibhile?
1 Umprofeti uAmos wathi kwakuza kubakho indlala kwilizwe lakwaSirayeli, ‘ingabi kuko ukulambela isonka, ingabi kuko ukunxanela amanzi; ibe kukulambela ukuva amazwi kaYehova.’ (Amos 8:11) Ukuze kuncedwe abo balambileyo nabanxaniweyo ngokomoya, intlangano kaYehova isasaza intabalala yoncwadi lweBhayibhile ehlabathini lonke.
2 Ukuza kuthi ga ngoku, sishicilele izigidi ezingama-70 zencwadi ethi Ulwazi kwakunye nezigidi ezingama-91 zencwadana enemifanekiso ethi Okufunwa NguThixo. Siyakuxabisa ukufundeka lula nempumelelo yezi mpapasho xa sifundisa inyaniso. Noko ke, ngokoqobo izihlwele zabantu eziye zafumana uncwadi lwethu azikayifundisisi kunye nathi iBhayibhile. Yintoni esinokuyenza ngale nto?
3 Incwadi Nganye Ehanjisiweyo Isenokukhokelela Kwisifundo! Khawuqwalasela la mava alo mvakalisi owacela ukuqhubela ibhinqa elithile isifundo kwisihlandlo sokuqala awathetha nalo emzini walo. Lasamkela ngoko nangoko. Kamva lamxelela oku, “Ungumntu wokuqala owakha wacela ukundiqhubela isifundo seBhayibhile.” Kumhlaba wakho, bangaphi abantu abasele benalo uncwadi lwethu abanokuthetha into efanayo? Incwadi nganye ehanjisiweyo isivulela ithuba lokubuyela nelesifundo seBhayibhile.
4 Ekubeni ngokufuthi sidibana nabantu abasele benazo iimpapasho zethu, sinokuwuvuselela njani umdla wabo wokufunda oko kuqulethwe luncwadi lwethu? Elinye iNgqina lambuza ngokungqalileyo umninimzi ukuba wayengenayo imibuzo yeBhayibhile kusini na, wasuka wathi, “Hayi.” Lo dade wazingisa, “Ngokuqinisekileyo unayo.” Eli bhinqa lalinayo, yaye kwaqaliswa isifundo. Kutheni ungambuzi umninimzi enoba ebengakuthanda kusini na ukufunda imbono yeBhayibhile ngombuzo okanye ngento emxhalabisayo? Kulungele ukubuza umbuzo ovus’ umdla ukuba akukho nto acinga ngayo. Iingxubuso ezinjalo zinokuvula indlela yesifundo esithe rhoqo seenyaniso ezisisiseko zeBhayibhile.
5 Umsebenzi wokuqhuba isifundo seBhayibhile ngundoqo wobulungiseleli bethu. Ekubeni singazi ukuba ngubani oya kusamkela isifundo, musa ukuba mathidala ukuthetha ngaso kuye wonke ubani odibana naye. Wuse kuYehova lo mbandela ngomthandazo, uze wenze ngokuvisisana nemithandazo yakho. Usenokufumanisa ukuba uthile ocela ukumqhubela isifundo uya kusamkela!—1 Yohane 5:14, 15.