Ngaba Ungumvakalisi WoBukumkani Ongaxhiphulisiyo?
1 Sonke savuya sakufunda ukuba uMzantsi Afrika ufikelele eyona ncopho yakha yaphakama yabavakalisi abangama-67, 069 ngoAgasti 1999. Eneneni yayingumgudu oyimbumba wokuzimisela! Ngokucacileyo kwiinyanga ezalandelayo, bambi baba bavakalisi baye banobunzima ekubeni ngabavakalisi abangaxhiphulisiyo boBukumkani, ukususela ngoko isilinganiselo senyanga besimalunga nama-63, 300. Oku kubonisa ukuba umvakalisi om-1 kwabali-16 akakhange afake ingxelo yokuba nesabelo kubulungiseleli nyanga nganye. Sikholelwa kukuba olu khuthazo lulandelayo lunokunceda ukunyanga le meko.
2 Lixabise Eli Lungelo: Sifanele sibe noxabiso olunzulu ngeli lungelo sinalo lokwabelana nabanye ngeendaba ezilungileyo zoBukumkani. Lo msebenzi uyayivuyisa intliziyo kaYehova uze uncede abantliziyo zinyanisekileyo ukuba bafunde indlela yokuphila. (IMize. 27:11; 1 Tim. 4:16) Ukunikela ubungqina rhoqo kwandisa amava ethu kubulungiseleli kuze kuphumele kuvuyo nasekufezeni okuthile.
3 Faka Ingxelo Yomsebenzi: Bambi ababa nesabelo kwinkonzo yasentsimini abayifaki kwangethuba ingxelo yomsebenzi wabo. Singaze sivakalelwe kukuba akufanele kunikelwe ingxelo ngomgudu esiwenzileyo. (Thelekisa uMarko 12:41-44.) Ngazo zonke iindlela, sifanele sinikele ingxelo ngoko sikwenzileyo! Ukuba nenkqubo ekhaya, enjengokusebenzisa ikhalenda, ukuze kubhalwe ixesha elichithelwe kubulungiseleli kuya kusebenza njengesikhumbuzo esihlala sihleli ukuze kwenziwe ingxelo echanileyo ngokukhawuleza ekupheleni kwenyanga nganye.
4 Nikela Uncedo Olufunekayo: Kusenokufuneka ukuba amalungiselelo asekuhlaleni okunceda abo bafuna uncedo ukuze babe nesabelo rhoqo kubulungiseleli aphuculwe. Unobhala webandla nabaqhubi besifundo sencwadi banokulungiselela ukuba abavakalisi abanamava banikele uncedo. Ukuba unabantwana abangabavakalisi abangabhaptizwanga okanye ezinye izifundo zeBhayibhile, baqeqeshele ukuba bayifake rhoqo ingxelo yabo nyanga nganye.
5 Khumbula ibali lobomi elithi, “Ndinombulelo Ngobomi Obude Enkonzweni KaYehova,” elikwiMboniselo kaOktobha 1, 1997. Udade Ottilie Mydland waseNorway waba ngumvakalisi othe rhoqo weendaba ezilungileyo ngaphambi kokubhaptizwa kwakhe ngowe-1921. Kwiminyaka engama-76 kamva, eneminyaka engama-99 ubudala, wathi: “Ndivuyiswa kukuba ndisakwazi ukuba ngumvakalisi ongaxhiphulisiyo.” Esinjani ukuba sihle isimo sengqondo abafanele basixelise bonke abakhonzi bakaYehova!