Ngaba UAgasti Uza Kuba Yinyanga Ekhethekileyo?
1 Unyaka we-1963 wawukhethekile kubantu bakaYehova. Uyasazi isizathu soko? Kaloku ngaloo nyaka abavakalisi bafikelela kwisigidi ehlabathini lonke. Ukuba wawusele uyifumene inyaniso ngelo xesha, usenokuba uyayikhumbula indlela okwasichwayitisa ngayo ukubona abantu abaninzi ngolo hlobo beshumayela isigidimi soBukumkani! Ngoku, elo sele ilinani labavakalisi baseUnited States nje kuphela. Noko ke, ngokomlinganiselo, nyanga nganye eMzantsi Afrika, abangama-4500 kuthi abayifaki ingxelo yesabelo sabo kubulungiseleli.
2 Lwamkele Ucelomngeni: NgoAgasti sizimisele ukufikelela incopho entsha yabavakalisi abangama-65 000 eMzantsi Afrika. Ukuba inokuphumelela imigudu yethu, ngokwenene uAgasti uya kuba yinyanga ekhethekileyo! Sinokuphumelela ukuba sonke siyayenza indima yethu.
3 Abo baceba ukuya ekhefini banokuchitha ixesha elingakumbi kubulungiseleli ngaphambi kokuba bahambe. Yiba namaphecana, iincwadana ezinemifanekiso, okanye amaphephancwadi ukuze ukwazi ukunikela ubungqina kubantu oza kudibana nabo xa usekhefini. Kwakhona, xa ufikile apho ubusiya khona, unokuba nesabelo kubulungiseleli kunye nabavakalisi balapho.
4 Ukuba akukwazi kuzenzela nto, unokuba nesabelo kubulungiseleli. Unokunikela ubungqina koogqirha, abongikazi, okanye kwabo batyeleleyo. Mhlawumbi unokunikela ubungqina ngokubhala ileta okanye usebenzise imfonomfono.
5 Ngokungathandabuzekiyo abanye baya kukuxabisa gqitha ukuncedwa ukuze babe nesabelo kwinkonzo yasentsimini ngoAgasti. Abadala, izicaka zolungiselelo nabaqhubi bezifundo bafanele benze amalungiselelo okuba kunikelwe olu ncedo. Ngaphezu kwako konke, ungalibali ukufaka ingxelo yakho yenkonzo yasentsimini ngokukhawuleza ekupheleni kwenyanga ukuze ubalwe njengomvakalisi ngoAgasti.
6 Lixabise Eli Lungelo: Ubulungiseleli ‘yinto entle esiyiphathisiweyo.’ (2 Tim. 1:14) Siyalixabisa ilungelo esilinikiweyo lokushumayela iindaba ezilungileyo. (1 Tes. 2:4) Xa sicinga ngako konke uYehova asenzele kona, sifanele sishukunyiselwe ekubeni nesabelo ngokuqhubekayo kulo msebenzi ubaluleke gqitha unyaka wonke. Asifanele sivumele nantoni ukuba isiphazamise ekushumayeleni rhoqo. Masenze uAgasti abe yinyanga ekhethekileyo enkonzweni KaYehova size sizimisele ukunikela bungqina ngaye nakwiinyanga ezilandelayo!—INdu. 34:1.