Abona Bantu Banoyolo Emhlabeni
1 “Banoyolo abantu abaThixo wabo unguYehova!” (INdu. 144:15) Loo mazwi achaza amaNgqina kaYehova njengabona bantu banoyolo emhlabeni. Alukho uvuyo olungaphezu kolo lokukhonza okuphela koThixo oyinyaniso nophilayo, uYehova. Ekubeni ‘enguThixo onoyolo,’ abo bamkhonzayo babonisa uyolo analo. (1 Tim. 1:11) Ziziphi ezinye iinkalo zonqulo lwethu ezisenza sonwabe?
2 Izizathu Zokuba Noyolo: UYesu wasiqinisekisa ukuba siya konwaba ‘xa siphaphele intswelo [yethu] yokomoya.’ (Mat. 5:3) Ukufundisisa iBhayibhile ngokuqhubekayo nokuya kuzo zonke iintlanganiso zamaKristu kuyayanelisa loo ntswelo. Ukufunda inyaniso yeLizwi likaThixo kuye kwasikhulula kubuxoki bonqulo nakwiziphoso zalo. (Yoh. 8:32) Kwakhona iZibhalo ziye zasifundisa eyona ndlela isemagqabini yokuphila. (Isa. 48:17) Ngenxa yoko, sinandipha ubudlelane bobuKristu nabazalwana bethu abonwabileyo.—1 Tes. 2:19, 20; 1 Pet. 2:17.
3 Sifumana ulwaneliseko olungathethekiyo ngokuthobela imilinganiselo kaThixo ephakamileyo, kuba siyazi ukuba oku kuyasikhusela kuze kuyolise uYehova. (IMize. 27:11) Enye intatheli yephephandaba yathi: “Phezu kwayo nje imilinganiselo yawo engqongqo, amaNgqina kaYehova akabonakali engonwabanga. Kunoko angabona bantu bonwabileyo. Abadala nabaselula [abaphakathi kwawo] babonakala bonwabe ngendlela engaqhelekanga yaye balungelelene.” Sinokubanceda njani abanye bonwabe njengathi?
4 Nceda Abanye Bafumane Uyolo: Ihlabathi longanyelwe kukungonwabi, yaye ikamva labantu ngokubanzi libonakala limfiliba. Noko ke, sinembono eqaqambileyo kuba siyazi ukuba ngenye imini bonke ububi buya kuba yinto yexesha elidluleyo. (ISityhi. 21:3, 4) Ngoko ke, sinenzondelelo ngobulungiseleli, sikhangela abantu abantliziyo zinyanisekileyo esinokwabelana nabo ngethemba lethu neenkolelo zethu ngoYehova.—Hez. 9:4.
5 Omnye udade onguvulindlela wathi: “Ayikho into eyanelisa ngaphezu kokunceda abantu bazi uYehova nenyaniso yakhe.” Masenze konke esinako ukuze sikhuthaze abantu abaninzi ngakumbi bamkele isifundo seBhayibhile sekhaya. Ukukhonza uYehova nokuzinikela kwethu sincede abanye bamkhonze kubangela uvuyo olungathethekiyo.—IZe. 20:35.