Ukunxiba Kakuhle Kubonisa Ukuba Siyamhlonela UThixo
1. Sinokubonisa njani ukuba siyayixabisa indibano esiya kuyo?
1 Kungekudala siza kuba nenyhweba yokuba ziindwendwe zikaYehova kwiNdibano Yezizwe Ngezizwe okanye YeSithili ‘Yokuzukisa UThixo’ Yowama-2003. Hayi indlela esinombulelo ngayo kuYehova kuba esimemile kwesi sihikahika sesidlo sokomoya! Sinokumhlonela size simbulele ngala malungiselelo okomoya ngendlela esinxiba nesizilungisa ngayo.—INdu. 116:12, 17.
2. Kutheni kubalulekile ukucoceka nokulungelelana?
2 Coceka Yaye Ulungelelane: Inkangeleko yethu ifanele ibonise imilinganiselo yoThixo wethu ococekileyo nolungeleleneyo. (1 Kor. 14:33; 2 Kor. 7:1) Iziqu zethu, iinwele, neenzipho zifanele zicoceke, yaye sifanele sizilungise kakuhle. Ukunxiba xazalala kuqhelekile namhlanje. Noko ke, mus’ ukuthi wakubona iqhawe elithile lemifanekiso-bhanyabhanya okanye lemidlalo linxibe dlakadlaka ulandele nawe njengomKristu. Xa silandela imikhwa ethandwayo, abantu basenokukufumanisa kunzima ukubona umahluko phakathi kwabo bakhonza uThixo wokwenyaniso nabo bangamkhonziyo.—Mal. 3:18.
3. Sinokuqiniseka njani ukuba inkangeleko yethu ivisisana nesiluleko esifumaneka kweyoku-1 kuTimoti 2:9, 10?
3 Isinxibo Esifanele Abalungiseleli AbangamaKristu: Xa umpostile uPawulos wabhalela umveleli webandla lamaKristu uTimoti, wakhuthaza ukuba “abafazi bazihombise ngesinxibo esilungiswe kakuhle, ngokuthozama nangengqondo ephilileyo, . . . ngendlela efanele abafazi abazibanga behlonela uThixo, oko kukuthi, ngemisebenzi elungileyo.” (1 Tim. 2:9, 10) Sifanele sicingisise nzulu ukuze siqiniseke ukuba isinxibo sethu silungiswe kakuhle. Sifanele sinxibe impahla elungiswe kakuhle, ecocekileyo, nendilisekileyo—kungekhona etsala amehlo, ebonisa amalungu omzimba afihlakeleyo okanye evuselel’ inkanuko.—1 Pet. 3:3.
4, 5. Ziziphi izinto afanele azilumkele amadoda namabhinqa angamaKristu?
4 UPawulos walumkisa ngokubaxwa ‘kwezimbo zokulukwa kweenwele nokunxitywa kwegolide neeperile nezambatho zeendleko ezinkulu.’ (1 Tim. 2:9) Ukulungelelana kwindlela esizinxiba ngayo izacholo, esiqaba ngayo izithambiso, nezinye izinto zokuhomba kulikhondo lobulumko elifanele lilandelwe ngamabhinqa angamaKristu.—IMize. 11:2.
5 Isiluleko uPawulos awayesibhekisa kumabhinqa angamaKristu sikwasebenza nakumadoda angamaKristu. Abazalwana bafanele baziphephe izimbo ezibonisa indlela yokucinga yehlabathi. (1 Yoh. 2:16) Ngokomzekelo, kwamanye amazwe impahla ewakuzelayo yinto ethandwayo, kodwa esi simbo asimfaneli umlungiseleli kaThixo.
6. Kutheni sifanele siwugcine uphakamile umlinganiselo wokunxiba nokuzilungisa xa sisiya naxa sibuya endibanweni, xa sisendibanweni, nasekupheleni kocwangciso losuku ngalunye?
6 Emva Kocwangciso Losuku: Inkoliso yabazalwana noodade imisela umzekelo wokuxeliswa kumbandela wesinxibo nokuzilungisa ebudeni bendibano. Noko ke, iingxelo zithi abanye baye banxibe ngendlela ebonisa ukungakhathali endleleni eya nebuya kwindibano okanye xa bezihlaziya emva kocwangciso losuku. Ngokwenene, inkangeleko yethu—enoba kusebudeni bocwangciso okanye ngamanye amaxesha—iyayiphembelela indlela abanye ababajonga ngayo abantu bakaThixo. Ekubeni sinxiba iibheji zendibano, sifanele sinxibe ngendlela efanele abalungiseleli abangamaKristu ngalo lonke ixesha. Oku kudla ngokwenza abanye basincome kuze kusinike ithuba lokushumayela.—1 Kor. 10:31-33.
7. Ukunxiba nokuzilungisa kwethu kakuhle kunokuba nawuphi umphumo kwabanye?
7 Kanye njengokuba uncumo lobuhlobo lusenza sijongeke, ukunxiba nokuzilungisa ngendlela efanelekileyo kusenza sibe nesidima isigidimi esisithweleyo nentlangano esiyimelayo. Abanye abasibonayo ebudeni beeNdibano ‘Zokuzukisa UThixo’ zalo nyaka basenokushukunyiselwa ukuba babuze isizathu sokuba sahluke yaye ekugqibeleni basenokuthi: “Siza kuhamba nani, kuba sivile [saza sabona] ukuba uThixo unani.” (Zek. 8:23) Ngamana ngamnye wethu angabonisa ukuba uyamhlonela uYehova ngendlela anxiba nazilungisa ngayo.
[Ibhokisi ekwiphepha 5]
Zilungise Ngendlela Endilisekileyo
▪ Xa usendleleni
▪ Xa usendibanweni
▪ Naxa uzihlaziya