Ukushumayela Ngamaqela Kuzisa Uvuyo
1 Xa wayethumela abafundi bakhe abangama-70 ukuba baye kushumayela, uYesu wabaxelela oko babemele bakuthethe, wabahambisa ngababini, waza wabaxelela nommandla ekwakufuneka bawugubungele. Oku kwabazisela uvuyo. (Luka 10:1-17) Ngokufanayo namhlanje, ukushumayela ngamaqela kuyabaxhobisa, kubalungelelanise kuze kubakhuthaze abantu bakaThixo kumsebenzi wokushumayela.
2 Abadala Bayakhokela: Abadala banendima ebalulekileyo ekuncedeni bonke babe nesabelo rhoqo kumsebenzi wokushumayela. Ngumveleli wenkonzo okhokelayo ekwenzeni amalungiselelo entsimi yaphakath’ evekini. Umveleli wesifundo sencwadi ngamnye unembopheleleko yokulungiselela intsimi yeqela lakhe, ngokukodwa ngeempelaveki. Ngezinye izihlandlo, xa kusenziwa intlanganiso yenkonzo yebandla, njengasemva kweSifundo SeMboniselo, umveleli wesifundo sencwadi ngamnye ufanele alungelelanise iqela lakhe.
3 “Ngokundilisekileyo Nangolungelelwano”: Lowo wabelwe ukuqhuba intlanganiso yenkonzo yasentsimini ufanele aqalise kusengethuba yaye angadluli kwimizuzu eli-10 okanye eli-15. Kuya kuba kuhle ukuba alungelelanise amaqela aze achaze ummandla ekuza kushunyayelwa kuwo (ngaphandle kokuba oku kuza kwenziwa ngabaveleli bezifundo zencwadi, njengoko bekuchaziwe ngaphambili) ngaphambi komthandazo wokuqukumbela. Oku kubangela ukuba abavakalisi bangabi sisiqhu entsimini, nto leyo enokuwuthoba isidima umsebenzi wethu. Kwakhona oku kuvisisana nesiluleko sikaPawulos esithi: “Zonke izinto mazenzeke ngokundilisekileyo nangolungelelwano.” (1 Kor. 14:40) Bonke abakhoyo kwezi ntlanganiso bafanele bafak’ isandla kwimpumelelo yala malungiselelo ngokufika kwangethuba, basebenzisane ngokupheleleyo nalowo ukhokelayo, baze emva komthandazo bahlukane ngokukhawuleza bangene entsimini.
4 Bayamanyana: Ilungiselelo lokushumayela ngamaqela libangela ukuba sazane ebandleni. Ngoxa ingachaswanga into yokuba ucebe ukusebenza nothile kusengaphambili, kuya kuba nomvuzo nokuya kwiintlanganiso zenkonzo yasentsimini ungenamalungiselelo owenze kwangaphambili. Sisenokwabelwa ukuba sisebenze nomntu esingamqhelanga, nto leyo ebangela ukuba ‘siluphangalalise’ uthando lwethu.—2 Kor. 6:11-13.
5 Ukushumayela ngamaqela kuyasikhuthaza yaye kuyasimanyanisa ‘njengabasebenzi abangamadlelane kuyo inyaniso.’ (3 Yoh. 8) Ngamana singanenxaxheba ngokuzeleyo ekushumayeleni ngamaqela!