Ngoku Lixesha Lokushumayela!
1. Kutheni ilixesha lokushumayela nje eli?
1 “Moyikeni uThixo nimzukise.” Kukho ingelosi eyalathisa ukuba kuvakaliswe esi sigidimi “kuzo zonke iintlanga nezizwe neelwimi nabantu.” Ngoba? “Kuba lifikile ilixa lokugweba kwakhe [uThixo].” Namhlanje, siphila kwelo ‘lixa lokugweba,’ eliya kufikelela kwincopho yalo ngokutshatyalaliswa kwale nkqubo yezinto. Kubalulekile ukuba abantu ‘banqule Lowo wenza izulu nomhlaba nolwandle nemithombo yamanzi.’ Indlela obaluleke nongxamiseke ngayo lo msebenzi wokuvakalisa ‘iindaba ezilungileyo ezingunaphakade’ ayinakuthelekiswa nawo nawuphi na umsebenzi owenziwayo namhlanje. Ewe, ngoku lixesha lokushumayela!—ISityhi. 14:6, 7.
2. Abakhonzi bakaYehova babonisa njani ukuba bayakuqonda ukungxamiseka kwamaxesha?
2 Kwiminyaka elishumi edluleyo, abakhonzi bakaYehova baye basebenza iiyure ezili-12 lamawaka ezigidi beshumayela ngoBukumkani yaye besenza abafundi. Abaninzi baye bahlengahlengisa ubomi babo ukuze babe nexesha elingakumbi kwisivuno sokomoya. (Mat. 9:37, 38) Ngokomzekelo, kulo nyaka uphelileyo, nyanga nganye abavakalisi abakumlinganiselo wama-850 000 bebesiba ngoovulindlela. Oovulindlela abathe ngxi kufuneka bashumayele umlinganiselo weeyure ezingama-70 nyanga nganye. Kwabangabancedani kufuneka iiyure ezingama-50.
3. Luluphi uhlengahlengiso abadla ngokulwenza abavakalisi ukuze bakwazi ukuba ngoovulindlela?
3 Oko Kufunekayo Kuvulindlela: Oovulindlela bazabalazela ukuphila ubomi obulula kuba bayaqonda ukuba “ixesha eliseleyo lifinyele.” (1 Kor. 7:29, 31) Bakhangela iindlela zokunciphisa iindleko ukuze ixesha labo elininzi bangalichithi kumsebenzi wempangelo. Ngokomzekelo, bambi baye bafudukela kwizindlu ezincinane. Abanye baye baphungula izinto eziphathekayo ezingabalulekanga nganto. (Mat. 6:19-21) Kwakhona, kuye kwafuneka banciphise izinto ezilusukelo lwabo. Konke oku bakwenza benenjongo yokunikela ixesha nengqalelo engakumbi entsimini. (Efe. 5:15, 16) Ngenzondelelo, ukuzinikela nokuthembela kuYehova ngomthandazo, abavakalisi abaninzi baye bakwazi ukuzenzela ucwangciso olusebenzisekayo nolubavumelayo ukuba babe ngoovulindlela.
4. Ngawaphi amanyathelo anokukunceda ube nguvulindlela?
4 Ngaba unokuba nguvulindlela? Kutheni ungabuzi oovulindlela abaphumelelayo ukuba benza njani? Sebenza nabo entsimini, uze unandiphe uvuyo abalufumanayo. Funda amanqaku akwiimpapasho zethu athetha ngobuvulindlela. Zibekele usukelo olunokukubangela ukuba ube nguvulindlela. Ukuba kukho imiqobo ekuthintelayo, thandaza kuYehova uze umcele ukuba akuncede uyisuse endleleni yakho.—IMize. 16:3.
5. Ubuvulindlela businceda njani siphucule ubuchule bethu entsimini?
5 Iintsikelelo Novuyo: Ubuvulindlela buyabuphucula ubuchule bethu bokusebenzisa iLizwi likaThixo, nto leyo esenza sivuye ngakumbi. Omnye udade oselula onguvulindlela wathi: “Kuyanceda ukukwazi ukuliphatha ngokufanelekileyo iLizwi likaThixo lenyaniso. Xa unguvulindlela, uyisebenzisa kakhulu iBhayibhile. Ngoku xa ndisiya kwindlu ngendlu, ndicinga ngezibhalo eziya kuba yingenelo kumninimzi ngamnye.”—2 Tim. 2:15.
6. Ubuvulindlela buqeqesha njani?
6 Kwakhona ubuvulindlela busifundisa ubuchule bokuphucula indlela esiphila ngayo. Bunokunceda abantu abaselula bafunde indlela yokucwangcisa ixesha ngobulumko, indlela yokusingatha imali nendlela yokukwazi ukusebenzisana nabantu. Ubuvulindlela buye benza abaninzi basukela izinto zokomoya ebomini. (Efe. 4:13) Ukongezelela koko, oovulindlela badla ngokuba nelungelo lokuyibona ngokoqobo indlela uYehova abanceda ngayo.—IZe. 11:21; Fil. 4:11-13.
7. Ubuvulindlela businceda njani sisondele kuYehova?
7 Mhlawumbi enye yezona ntsikelelo ezibangelwa bubuvulindlela kukuba businceda sisondele kuYehova. Oku kunokusomeleza xa silingwa. Omnye udade owakwaziyo ukunyamezela kwiimeko ezinzima wathi: “Ndiye ndancedwa kukuba nolwalamano olusondeleyo noYehova ngoxa ndinguvulindlela.” Walek’ umsundulo esithi: “Ndivuya ngokwenene kuba ndiye ndasebenzisa ubomi bam njengomntu omdala ndikhonza uYehova ixesha elizeleyo. Kundibangele ukuba ndizinikele ngeendlela ezingazange zithi qatha engqondweni yam.” (IZe. 20:35) Ngamana nathi singafumana iintsikelelo ezongezelelekileyo njengoko sisenza konke esinako kulo msebenzi ubalulekileyo wokushumayela.—IMize. 10:22.